Kosomar nuejaas toma

Skip to table of contents

Ajenak Luka Yawe

Koseu Angajep Ateso

 ESULA LOITOMONET AKANY AONGON

Kosalak ijaanakini Yawe

Kosalak ijaanakini Yawe

1, 2. Ai bo ipedori oni adumakin ayuwara kapaarasia kanu?

KOOMOOM ber ijo bala ilosi korot kokusi ekwam loepol. Isunyit akwap amutonor, imilia eipiei, kirurumai akuj. Katipet kogeuni edou aitep. Imouni ijo aiboisit namecet. Eraun aiyalama naepol noi arai kidum ijo aiboisit namecat naeonit koyuwara!

2 Oni da ijai lolo toma ojautene kwape kangol. Iyata ejautene loka akwap aroniar. Aticepak ipedori aomoom ebe, ‘Ai bo apedori eong adumakin ayuwara?’ Abu ekewadikan Isabulin kiwadik ebe: “Alimuni nu EJAKAIT ebe, ‘Ngesi neekirianaraka ka abwasika; Ekadeke, loamuno.’” (Isabulin 91:2) Eebo, epedori Yawe aingarakin oni kotoma atiokisiowok kwape kwana, ido ijaikinit ngesi oni amuno najokan nakoingaren.

3. Eipone bo ani ipedoria oni aitaraun Yawe neekerianarawok?

3 Eipone bo ani eyuwaria Yawe oni? Epedori ngesi aingarakin ijo atitingikin atiokisio nuijaatar oni, ido erai ngesi loepol apedor adepar idiotunganan kere yenetami aimusung oni. Arai etakanikisi oni nueroko, ipedori oni amunokin ebe elemari Yawe atiokisio ngun kere koingaren. Isinyikokit oni Ebaibuli ebe: “Kidarasi bonik toma amina naka Edeke.” (Yuda 21) Ibusakinit oni aitogogong eidicanewok keda Yawe kanu ngesi aingarakin oni kotoma atiokisiowok kere. Konye eipone bo ani ipedoria oni aswam ngun?

KISIYALAMIK EDEKE KANUKA AKEMIN

4, 5. Eipone bo ani etodukinia Yawe oni akemin?

4 Kanu aisal ijaanakini Yawe, ibusakinit oni amisiikin  ejok amina naetodiki ngesi oni. Koomoom ber ijo akiro nueswamak Yawe oni. Ejaiki ngesi oni akwap naibus ka iraan ka itiang luegelegela. Ejaiki bobo ngesi oni inyamat ka akipi. Kitosomai Ebaibuli, etijeniki Yawe oni ekekiror ka ikeponesio lueumokina. Aitelekarit kakere, abu ngesi kitodik oni aminake kanuwok naejukunia ngesi Okokuke loteluna, Yesu, toma akwap kanu aijaikin akeijar kanuwok. (Yokana 3:16) Ido kanuka alucet kangin, ijaatar oni keda amuno najokan nakoingaren.

5 Ejaiki oni Yawe Ajakanut naeyait Okokuke Yesu Kristo. Erai apugan naka akuj naebuni alemar aiticanitoi kere katipet. Ebuni Ajakanut ngin aitaraun akwap paradais, naejaun ainapakin ka aiyalama ikar kere. (Isabulin 37:29) Eipone bobo ece loetodikinia Yawe oni akemin ngesi aisisianakin oni eipone loibusakinitor aijar kwape kwana. Ekoto ngesi oni ailip, ido ekapakina ngesi aiiranar ailipasinei wok. Etodiki Yawe cut itunga kere akemin.

6. Anyoika bo nuibusakinit ijo aswam kanuka amin naka Yawe?

6 Anyoika bo nuibusakinit ijo aswam kanuka amin naka Yawe? Kisiyalamik ngesi kanu iboro kere lueswamaki ngesi ijo. Nukaiturur, mam itunga luipu isiyalamikinitos ngesi. Araasi itunga luikote nen kapaarasia nuka Yesu. Kadiope paaran, abu Yesu kitangaleu itunga itomon luadekasi atapon, konye ediopet bon abu kisiyalamik. (Luka 17:12-17) Ekoto oni aputoorit etunganan loabu kisiyalamik Yesu. Ekoto oni araasi luisiyalamikinit Yawe duc duc.

7. Eipone bo ani ibusakinitor oni amina Yawe ketau kere?

7 Ekoto oni da aitodun ebe imina oni Yawe. Abu Yesu kolimok ikesisiakake ebe ibusakinit kesi amina Yawe ketaukec kere, kaijarakec kere, ka akec acoa da kere. (Kosiom Matayo 22:37.) Anyoin apolou kangun?

8, 9. Eipone bo ani ipedoria oni aitodun ebe imina oni Yawe?

 8 Edolit kereka oni einer bon ebe imina oni Yawe? Mam. Arai imina oni Yawe ketau kere, kaijarawok kere, ka acoawok kere, ibusakinit oni aitodun ngun kotoma aswamisiowok. (Matayo 7:16-20) Isisianakini Ebaibuli ebe arai imina oni Edeke, ekoto oni arimaar aicorakinetake. Etiono kereka aswam ngun? Mam, naarai ‘mam aicorakineta nuka Yawe elangir.’—Kosiom 1 Yokana 5:3.

9 Arai irimaarit oni Yawe, idumuni oni aiyalama ka aijar najokan. (Isaia 48:17, 18) konye inyoin bo epedori aingarakin oni ainyikokin aijaanakin Yawe? Kaanyutu ber oni.

KINYIKOK AIDAR EIDICANEKON KA YAWE

10. Kanukinyo ibusakinitor ijo ainyikokin aisisiaenen nuikamunitos Yawe?

10 Eipone bo ani egeunor epaperonekon keda Yawe? Kotoma aisisia Ebaibuli, kobu ijo kojenu ebe ejok Yawe ido iduku ijo epaperone keda ngesi. Eputosi do eidicanekus kede akim naenoki. Kwape ekotor akim ayatanakinio akito, ibusakinit ijo ainyikokin aisisia nuikamunitos Yawe tetere itogogongi eidicanekon keda ngesi.—Awaragasia 2:1-5.

Kwape kakim, ekoto aminakon kanuka Yawe aiyatanakinio akito, tetere esali enoki

11. Epone bo ani epedoriata aisisianakineta nuka Ebaibuli aingarakin ijo?

11 Kinyikok ijo aisisiaenen Ebaibuli, idumuni ijo akiro nuisiyalamikinete ekonitau noi. Koany epone loapotu esisiak iarei luka Yesu kopupuniata naesisianakinia Yesu kes akiro nuadwarit Ebaibuli. Apotu kesi kingitanakinos kobakasi ebe: “Mam tope amulaete iwokotaon naenerar kaoni korot, ka aikujonokin oni nukiwadikatai?”—Luka 24:32.

12, 13. (a) Inyoin bo epedori atakanikin aminawok kanuka Edeke arai mam oni inyikokit aisisia Ebaibuli? (b) Eipone bo ani ipedoria oni ainyikokin amin Edeke?

 12 Kwape apotu ikesisiak kiyalamikinotor naarai apotu komisiikis aiwadikaeta nuka Ebaibuli, ipedori jo da aiyalamikin arai kimisiik ijo aiwadikaeta nuka Ebaibuli. Ingarakinete ngun ijo ajenun Yawe ka aminun nges. Mam icamakini amina ngin ajoniar.—Matayo 24:12.

13 Kwape idaunia ijo araun epapero loka Edeke, ekoto ijo aitogogong edicanekon keda Yawe. Ibusakinit ijo aisisiaenen nuikamunitos Yawe ka Yesu kosodi aomoom epone loipedoria aibwaikin nuisisiai ijo toma aswamisioit. (Yokana 17:3) Neisiomia ijo Ebaibuli, ekoto ijo aingitakin ebe: ‘Anyoika nuesisiauni eong kanuikaminitos Yawe kane? Kanukinyo ibusakinitor eong amina Yawe?’—1 Timoteo 4:15.

14. Eipone bo ani epedoria ailip aitogogong aminawok kanuka Yawe?

 14 Arai ejai ijo epapero, ido kinerenenasi ijo kangesi duc, egogongor epaperonekus. Kwape kwangin, nainerenena oni keda Yawe kotoma ailip, itogogongi ngin aminawok kanuke. (Kosiom 1 Isesalonikan 5:17.) Erai ailip ainakinet naejok noi kanejai Papawok lokokuju. Ibusakinit oni duc ainerenena keda ngesi kolomunite otau. Eebo, kinyikok oni aisisia Ebaibuli ka ailipenen kotoma otau, egogongor aminawok kanuka Yawe.

ALIMONOKIN LUCETUNGA AKIRO NUIKAMUNITOS YAWE

15, 16. Ikote bo ai akiro nuka alimonokin kamakon?

15 Kanu oni asalakin ijaanakini Yawe, ibusakinit oni alimonokin lucetunga akiro nuikamunitos aiyuuniwok. Alimonokin lucetunga akiro nuikamunitos Edeke erai arereng naejok noi ido ebunit kama ejai Yawe. (Luka 1:74) Ido erai ngin aswam nabu Yesu kijaik Ikristayon lukabeit kere. Ibusakinit oni kere alimonokin akiro nukajokak nuka Ajakanut naka Edeke. Iswamai kereka ijo ngun?—Matayo 24:14; 28:19, 20.

16 Aseseni ekiyakia Paul aswam naka alimonokin kwape naketiai; anyarit ngesi alimonokin kwape ‘abar.’ (2 Ikorinton 4:7) Alimonokin luce akiro nuikamunitos Yawe ka alosikinetake erai aswam naepol naibusakinit oni aswam. Erai ngol eipone loipedoria ijo aijaanakinia Yawe, ido isiyalamikinit ngesi nuiswamai ijo noi. (Iburanian 6:10) Epedori alimonokinikon aitajar ijo nepepe kaluilimonokini ijo naarai ingarakini ijo luce da araun luijaanakinete Yawe tetere edumunete aijar naka ikar kere. (Kosiom 1 Ikorinton 15:58.) Ejai kereka aceswam naejok adepar ngin kamakon?

17. Kanukinyo eraar alimonokin naka naisunyakinit katipet?

 17 Erai alimonokin aswam naisunyit katipet noi. Ibusakinit oni ‘alimonokin akirot,’ ido ekoto oni ‘asunyakit katipet.’ (2 Timoteo 4:2) Ekoto itunga kopuputu akiro nuikamunitos Ajakanut naka Edeke. Ebala Ebaibuli ebe: “Eapie apaaran nakapolon naka EJAKAIT, eapie, iwonyunit noi!” ‘Mam awasia iyapi!’ (Sepania 1:14; Kabakuk 2:3) Eebo, katipet noi, ebuni Yawe amudiar akwap naka Satan naileleba aronis. Ekoto oni alingakin aikwenyar itunga eroko amudiario ebunio tetere kesi eseunete aijaanakin Yawe.

18. Kanukinyo ibusakinitor oni aijaanakin Yawe nepepe ka Ikristayon lukabeit?

18 Ekoto Yawe oni aijaanakin ngesi nepepe ka Ikristayon lukabeit. Ebala Ebaibuli ebe: “Kaomoomas aisinyikokin bonik ka bonik amin ka aswam nuejokuka, kenyeis apalun atukonokin nepepe, kwape iswamaata ice, konye kecoras; ido keyatanakinito ngun kwape ianyuniata apaaran ngin eyapuunit adolun.” (Iburanian 10:24, 25) Ibusakinit oni aswam nuipedori kere abunenen airiamununeta kere. Ijaikinitos oni airiamununeta arereng na aitogogong ka aisinyikonokin bonik ka bonik.

19. Inyoin epedori aingarakin ijo amin inacanawok?

19 Neijaunor ijo airiamununeta, idumuni ijo ipapero lukabeit luepedorete aingarakin ijo aijaanakin Yawe. Ibuni ijo airiamun keda inacan luiswamaete kagogong aima ngesi, ido kwape kajo, eraasi kesi da lumam edolitos ido ibucanarete. Arai kiswamakisi ice kakesi ijo nueroko, ekoto ijo aitim kesi. (Kosiom Ikolosain 3:13.) Ekoto ijo asesen iponesio luajokak luka inacan kotoma atukot, naarai ingarakini ngin ijo aminun kes ka aikunyakin nejai Yawe.

 AIJAR NAERAI AIJAR OBE

20, 21. Inyoin bo “aijar naerai ajar obe”?

20 Ekoto Yawe ipaperoke kere adumun aijar najokan. Isisianakini Ebaibuli oni ebe ebuni aijarawok nakoingaren ajokunar adepar nalolo.

Ekoto Yawe ijo ailel aijar naerai “aijar obe.” Icamunit kereka ijo?

21 Ibuni oni aijar ikar kere, mere bobo ikar 70 arai 80 bon. Ibuni oni adumun “aijar naka ikar kere” keda angaleu najokan, ainapakin ka aiyalama koparadais. Enyarit Ebaibuli ngin “aijar naerai aijar obe.” Isumunit Yawe aijaikin oni aijar na erai aijar obe, konye ibusakinit oni aswam kagogong ‘tetere itingi aijar naerai aijar obe.’—1 Timoteo 6:12, 19.

22. (a) Eipone bo ani ipedoria oni adumun “aijar naerai aijar obe”? (b) Kanukinyo mam aijar naka ikar eraar eropit loetacitere oni?

22 Eipone bo ani ipedoria oni aiting “aijar na erai aijar obe”? Ekoto oni ‘aswam nuejok’ ido ‘kabaritos kotoma aswamisio nuejok.’ (1 Timoteo 6:18) Apolouke ebe ibusakinit oni aibwaikin toma aswamisio akiro nuidau oni aisisiaun kotoma Obaibuli. Konye, mam aijar naerai aijar obe erai eropit loetacitere oni. Erai na ainakinet kanejai Yawe nejaasi ngul luemunokina ngesi, kwape aanyunet naka “asianut.” (Iromayon 5:15) Ekoto Papawok lokokuju aijaikin oni ainakinet ngin.

23. Kanukinyo ibusakinitor ijo aswam aseununeta nuajokak kwape kwana?

23 Ekoto ijo aingitatakin, ‘Amai kereka eong Edeke koipone loitojokitor ngesi?’ Arai kidum ijo ebe ibusakinit ijo aswam aijulanakineta kotoma aijarakon, ekoto ijo aisunyakin aswam ngun katipet. Arai imunokin oni Yawe kasodete aswam nuipedori kere kanu arimar ka amunokina nejai Yawe, eraun Yawe nekerianara wok. Ebuni Yawe aidar itunga luemunosi ngesi kotoma  apaarasia nukawasia. Ido ebuni Yawe aijaikin oni aijar koparadais kakwap. Eebo, ipedori ijo adumun aijar na erai aijar obe arai kiswamau ijo aseununeta nuejokuka!