Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Anyoika bo Nuisisianakini Oni Ebaibuli?

 ESULA LOIKANYETKAUNI

Anyoin Bo Ajakanut Naka Edeke?

Anyoin Bo Ajakanut Naka Edeke?

1. Ani bo ailipasit naejenara naibuni oni aitetem?

IMILIONIN lukaitunga ejenete ailipasit naejenara naenyaritai Papakosi, arai bo ailipasit naka Ejakait. Etosomai Yesu ailipasit na kanu aisisianakina ikesisiakake eipone loebeitor ailip. Anyoika bo nuelipit Yesu? Ido kanukinyo eraar ailipasit na naepol kane ijai oni lolo?

2. Inyoika bo iboro iuni luepolok luisisianakinit Yesu oni ailip?

2 Abu Yesu kotema ebe: “Kilipenenete yesi kwanata: Papakosi loejai toma akuj, ekonikiror kitalaunai. Akonijakanut kobu. Nuikoto kiswamai kakwapin kwape iswamaere kotoma akuj.’” (Kosiom Matayo 6:9-13.) Kanukinyo esisianakina Yesu oni ailip iboro ngun iuni?—Koany Nuengesete 20.

3. Anyoika bo nuibusakinit oni ajenun kanuikamunitos Ajakanut naka Edeke?

3 Kidau oni aisiaun ebe ekiror Edeke ngesi Yawe. Ido idau bobo oni aitetem nuikamunitos akote naka Edeke kanuka itunga ka akwap. Konye anyoin bo apolou naenerar Yesu ebe: “Akonijakanut kobu”? Ibuni oni aisisiaun anyoin bo Ajakanut naka Edeke, nuebuni Ajakanut ngin aswam ka eipone lo italaunia ngesi ekiror loka Edeke.

ANYOIN BO AJAKANUT NAKA EDEKE?

4. Anyoin bo Ajakanut naka Edeke, ido ingai bo Ekabakake?

4 Abu Yawe kosipok apugan naka Ajakanut ido abu koseu Yesu kwape Ekabaka. Enyarit Ebaibuli apugan  ngin Ajakanut naka Edeke. Erai Yesu “Ekabaka loka ikabakan, Ejakait da loka ijaka.” (1 Timoteo 6:15) Epedori Yesu aswam nuitelekarito ediotunganan loipugai, ido epol apedorike adepar epugak kere.

5. Ebuni bo Ajakanut naka Edeke aipuga akwap kojai bo ai? Inyo ipugai ngesi?

5 Ketuboros apaarasia akaisaongon akaulo naetajarunere Yesu, abu ngesi kobongo toma akuju. Abu Yawe kodakak ngesi araun Ekabaka loka Ajakanut. (Aswamisio 2:33) Ebuni Ajakanut naka Edeke aipuga akwap kojai toma akuj. (Apukokinio 11:15) Nges enyaritor Ebaibuli Ajakanut ngin ‘Ajakanut naka akuj.’—2 Timoteo 4:18.

6, 7. Kanukinyo eraar Yesu ekabaka loitelekarit ikabakan kere?

6 Ebala Ebaibuli ebe erai Yesu ekabaka loitelekaarit ikabakan kere naarai erai nges “lobon ejai amamus atwanare.” (1 Timoteo 6:16) Epugak kere etwakete, konye mam Yesu bobo etwani. Iswamakini ngesi oni nuejokuka ikar kere.

7 Ebakasi adwareta nuka Ebaibuli ebe erai Yesu loejok ido kosiana: “Iboie emoyo loka EJAKAIT kanges, Emoyo loka acoa ka ajenun, Emoyo loka ainerun ka agogong, Emoyo loka aijen ka ayongit EJAKAIT; Isiyalamikinit ayongit EJAKAIT. Mam etubokini kwape eanyuniata akekonye, Karaida aitoron kwape epupioto akeki: Konye etubokini lukican kadolit.” (Isaia 11:2-4) Ikotokin kereka ijo ekabaka loikoni nen?

8. Biai ijenunia oni ebe mam Yesu ebuni aipuga bon?

8 Abu Edeke koseu itunga ice alosit toma akuj aipuga keda Yesu kotoma Ajakanutuke. Kwape aanyunet, alimokinit ekiyakia Paul Timoteo ebe: ‘arai kititingikini,  kirumi da nepepe kanges kwape ikabakan.’ (2 Timoteo 2:12) Imwaasi bo ai irumete ka Yesu kwape ikabakan?

9. Imwaasi bo ai irumete ka Yesu kwape ikabakan? Iwori bo ageunia Edeke aseunun kes?

9 Kwape isisiator Kosula lo 7, aponi koinakinai ekiyakia Yokana aitapoet naanyunia ngesi Yesu kwape ekabaka ka ikabakan ice 144,000 kotoma akuj. 144,000, lubo angai kesi? Itetemit ekiyakia Yokana ebe ‘iwadikatai ekiror loka Yesu, ka ekiror loka Papake oreetakec.’ Abala bobo ngesi ebe: “Ngul kes luetupito Imerekek kama elosi kere; Ngul kes lualakunio otunga.” (Kosiom Apukokinio 14:1, 4.) Ikristayon 144,000 kesi luaseu Edeke ‘airum akwap kwape ikabakan’ nepepe ka Yesu. Itajarunio kesi Ketwakata kanu alosit toma akuj. (Apukokinio 5:10) Ageun apakio nuka ikiyakia eseununei Yawe ice kokristayon lumunon kanu araun ikabakan 144,000.

10. Kanukinyo eraar amina kanu Yawe aitemokin itunga 144,000 aipuga nepepe ka Yesu?

10 Emina Edeke oni noi naarai etemoki lucetunga aipuga ka Yesu kwape ikabakan. Erai Yesu epugan loejok ido emisiikinit ngesi oni. Ejeni ngesi aiticanitoi naka itunga. Itogogongit Paul cut ebe epodokinit Yesu oni, ngesi da “epedori arieba nepepe kaoni akalanyanutuwok,” ido ‘aponi kocodunai ngesi kakiro kere ariaka kaoni.’ (Iburanian 4:15; 5:8) Itunga lu 144,000 da ejenete atiokisio nuka itunga. Ejenete kesi ebe mam oni irai luidolit ido kidekanakin da. Kotoma abeit kijeni ebe emisiikinitos Yesu ka itunga 144,000 epone loipupia oni kanuka atiokisiowok.

 ANYOIKA NUEBUNI AJAKANUT NAKA EDEKE ASWAM?

11. Kanukinyo abalar Yesu ikesisiak ailip ebe kiswamai akote naka Edeke kotoma akuj?

11 Abala Yesu ikesisiak ailip ebe kiswamai akote naka Edeke kotoma akuj. Kanukinyo? Isisiat oni kosula kalo 3 ebe abu Satan komwang Yawe. Akaulo na Satan aimwang Yawe, abu Yawe kojalak Satan ka imalaikan lumam emunooko, arai bo nat ajokin aiboi kotoma akuj apak na euriana. Kapak kangin mam kere kesomaete akote naka Edeke kotoma akuj. Kosula kalo 10, ibuni oni aisisiaun nuipu nuikamunitos Satan ka akejokin.

12. Inyoika bo iboro iarei luapotu kotakanutu luitetemitai kotoma Apukokinio 12:10?

12 Itetemit Ebaibuli ebe abu Yesu kitiji Satan katipet nadakakinere ngesi araut Ekabaka kotoma akuj. (Kosiom Apukokinio 12:7-10.) Kokokoro kalo 10 itetemitai iboro iarei luapotu kotakanutu. Ageuni Yesu aipuga kotoma Ajakanut naka Edeke kwape ekabaka, ido abu kocaku Satan kwap. Kwape idaunia oni aisisiaun, adautu ngun aiswamaun.

13. Anyoika nuapotu kotakanutu kokuju nacakunere Satan kwap?

13 Itetemit Ebaibuli aiyalama napotu imalaikan luemunoko kodumutu akaulo nacakunere Satan ka akejokin kwap. Esioma kwanata: “Kolel, ijo akuj, ka yesi da luiboiete kotomake!” (Apukokinio 12:12) Ejai kwana ainapakina naepol ka aimorikikina toma akuj naarai ngul luejaasi ngina kere iswamaete akote naka Edeke.

Ejai aiticanitoi naepol toma akwap ageun nacakunere Satan ka akejokin. Ebuni aiticanitoi na ainang

14. Anyoika nuapotu kotakanutu kakwap nacakunere Satan kotoma akuj?

14 Konye kwana etiono aijar kakwap. Iswamasi  iboro lueroko kakwap “naarai ejesun ekejodijodon,” ido “ejai kanyunyura naepol, naarai ejeni ebe edit akepak!” (Apukokinio 12:12) Enyunyura Satan. Aponi kocakunai kotoma akuj, ido ejeni ngesi ebe eyapie amudiar nges. Iswamai ngesi kagogong ayangaunun atiokisio, ariebo ka aiticanitoi kotoma akwap.

15. Anyoin bo akote naka Edeke kanuka akwap?

15 Konye mam akote naka Edeke ijulakina. Eroko ngesi ekoto itunga luedolito aijar koparadais kakwap. (Isabulin 37:29) Aso eipone bo ani epedoria Ajakanut naka Edeke aswam ngun?

16, 17. Anyoika nuisisiauni oni kotoma Daniel 2:44 kanuikamunitos Ajakanut naka Edeke?

16 Ebala adwaretait naka Daniel 2:44 ebe: “Kapaarasia nuka ikabakan ngul edakakini Edeke loka akuj ajakanut namam emudiario ikaru kere, Karaida airumuke ajalakinio itunga ice; konye ebilibilei ido emudiari da ajakanuto ngun kere, ido kojaenena ikar kere.” Anyoika nuisisiauni oni kotoma adwaretait kana kanuikamunitos Ajakanut naka Edeke?

17 Nasodit, elimokinit oni ebe egeunit Ajakanut naka Edeke aipuga “kapaarasia nuka ikabakan ngul.” Apolouke ebe ageu Ajakanut aipuga eroko apuganisinei ace eyaitos akwap. Nakiareit, ejaenena Ajakanut ngin ikar kere ido mam einakinio airumuke otunga ice. Nakiuniet ejaun ejie kiding Ajakanut naka Edeke ka apuganisinei nuka akwapin. Ajakanut naka Edeke nges ipikori ido ebuni araun apugan adiope bon naeyait akwap kere. Erai na apugan naejok kakere, elelakinete itunga nges noi.

18. Ani ekiror loenyaritai ejie lokawasia loejaun kiding Ajakanut naka Edeke ka epugak luka akwap?

 18 Epone bo ani ebunia Ajakanut naka Edeke ageun aipuga akwap? Eroko ejie lokawasia, loenyaritai Arumagedon ebunio, epote ajokin aingalaar “ikabakan luka akwapin kere, atukonokin kesi ojie loka apaaran nakapolon naka Edeke Lokapedor kere.” Eebo, epote apuganisinei nuka akwapin aitiji Ajakanut naka Edeke.—Apukokinio 16:14, 16; koany Nuengesete 10.

19, 20. Kanukinyo ipudar oni Ajakanut naka Edeke aipuga akwap?

19 Kanukinyo kipudar oni Ajakanut naka Edeke? Kanuka akiro auni. Nasodit, irai oni ikadiakanarak ido kitwaki da. Konye ebala Ebaibuli ebe kotoma Ajakanut naka Edeke, ibuni oni aijar ikar kere. Kabeit, ebala Yokana 3:16 ebe: “Komina Edeke akwapin kwanata, abu koinak Okokuke loteluna, tetere nginitunganan yeniyuuni ngesi kinye aolior, konye kojaas kaijar naka ikar kere.“

20 Akirot nakiyareit naipudar oni Ajakanut naka Edeke ngesi na ebe epuata itunga luiswamaete nueroko. Apoloor aisab, akoko ka adoteu. Mam oni ipedori alemar aronis kakwap, konye Edeke ngesi epedori. Ebeit ngesi amudiar itunga luiswamaete nueroko. (Kosiom Isabulin 37:10.) Akirot nakiuniet naipudar oni Ajakanut naka Edeke ngesi na ebe eraasi epugak luka akwap kana luedit agogong, luededeng arai bo luemidicete apiyai. Mam kesi ekotosi aisisianakin itunga arimaar Edeke. Ebala Ebaibuli ebe ’eyait etunganan ediopet loce aiswamakin nges aronis.’—Ekalimonokinan 8:9.

21. Eipone bo ani epedoria Ajakanut naka Edeke aswam akote naka Edeke kakwap?

 21 Akaulo naka Arumagedon, ebuni Ajakanut naka Edeke ayangaun akote naka Edeke aiswamaun kakwap. Kwape aanyunet, ebuni amudiar Satan ka akejokin. (Apukokinio 20:1-3) Kawasiake, emameun bobo yenedekanakin ka atwanare. Kanuka alucet, epote itunga luemunokina Edeke aiboi kakwap ikar kere. (Apukokinio 22:1-3) Ebuni Ajakanut aitalaun ekiror loka Edeke. Anyoin bo apolou kanu? Apolouke ebe naipuga Ajakanut naka Edeke akwap, epote itunga kere aiturit ekiror loka Yawe.—Koany Nuengesete 21.

IWORI BO ARAUNOR YESU EKABAKA?

22. Eipone bo ani ijenia oni ebe mam Yesu abu koraun Ekabaka neajaar ngesi toma akwap araibo katipet naetajarunere ngesi?

22 Abu Yesu kisisianak ikesisiak ailip ebe: “Akonijakanut kobu.” Aso edelelei do ebe abeit Ajakanut naka Edeke abunere koingaren. Abeit Yawe asipokin akepugan kosodi aitaraun Yesu ekabaka. Aponi kereka kitaraunai Yesu kwape Ekabaka nape abongoria ngesi kuju? Mam, abeit ngesi aidarakin ber. Ketubor  apak naedit akaulo naetajarunere Yesu, apotu Petero ka Paul kitacautu adwaretait naikamunit Yesu naejai oitabo loka Isabulin 110:1. Kadwaretait kangin enera Yawe: “Kiboikin akanika nakoteten aitodol naebwaikinia lukasurupokon kwap kakejenekon.” (Aswamisio 2:32-35; Iburanian 10:12, 13) Ebusakinit Yesu aidareikin adaun apak naetia bo ai eroko Yawe itaraunia ngesi Ekabaka?

Ebuni Ajakanut naka Edeke ayangaun akote naka Edeke aiswamaun toma akwap

23. (a) Iwori bo ageuna Yesu aipuga kwape Ekabaka loka Ajakanut naka Edeke? (b) Inyoin bo ibuni oni aisisaun kosula loetupakini?

23 Ikar luipu kokau, apotu ikristayon luemunoko komisikisi ebe abuni ekaru 1914 araun ekaru loitegelikina kadwareta nuka Ebaibuli. Nuapotu kotakanutu kokaru kangol itodunitos ebe enerasi teni kesi abeit. Abu Yesu korau Ekabaka kokaru kangol. (Isabulin 110:2) Akaulo kangin, aponi kocakunai Satan kwap ido “edit akepak” naideuna. (Apukokinio 12:12) Kosula loetupakini, ibuni oni aanyun iboro luitodunitos ebe ijai oni toma apakio ngun. Isisiauni bobo oni katipet ebuni Ajakanut naka Edeke ayangaun akote naka Edeke aiswamaun kotoma akwap.—Koany Nuengesete 22.