1-3. Anyoika bo aingiseta nuetapit itunga luipu aingit, ido eipone bo ani ebongonokiniata idiinin luipu?

ISUMUNIT Ebaibuli ebe “mam bobo ejaun atwanare.” (Apukokinio 21:4) Kosula kalo 5, apotu oni kesisiautu ebe epedori alucet ainakin oni adumun aijar naka ikar kere. Konye eroko itunga etwakete. (Ekalimonokinan 9:5) Adiopet kaingiseta nuepolok nges na ebe, Anyoika bo etakanikinete oni kitwaka?

2 Ipudakin oni adumuni abongokinet naka angiset kangin arai itwakiarit oni luminatawok. Kingisi oni ebe: ‘Ai bo elosit ngesi? Eseseni kereka ngesi oni? Ingarakini kereka ngesi oni? Kiyanyuni kereka oni ngesi bobo?’

3 Einakinitos idiinin luipu abongonokineta nuegelegela kanuka angiset kana. Isisianakinete ice ebe arai irai ijo itunganan yenajokan, ilosi ijo toma akuj ido ebe arai irai ijo itunganan yenaronon, ilosi ijo akim namam edungei. Ebakasi ice ebe kitwana ijo iraun ijo emoyo loijari keda lukatwakakon. Ido ice ebakasi ebe arai kitwana ijo etubokinio ijo, kiurunio ijo bobo, arai bo ijaikinio ijo akuan ace, kwape itunganan arai bo nat itiang.

4. Anyoin aomosioit adiope na emoritos idiinin luipu?

4 Esubitos idiinin luipu bala ejaasi kaisisianakineta luegelegela. Konye emoritos aomisioit adiope. Isisianakinete kesi ebe arai ketwana itungananan, ekui emoyoke atwanare. Erai kereka ngin abeit?

 AI BO ILOSI ONI KITWAKA?

5, 6. Anyoika bo etakanikinete oni kitwaka?

5 Ejeni Yawe nuetakanikinete oni kitwaka, ido alimok ngesi oni ebe ketwana itunganan, anangaki aijarake. Erai atwanare ailocokinet naka aijar. Aso ketwana itunganan, mam bobo ngesi inyikoni aipup ka aomoom kanenicie. * Arai kitwaka oni mam bobo kipedori asesen, aipup, karaida aomoom.

6 Ewadikat Ekabaka Solomon ebe “mam ikatwak ejenete ibore.” Mam ikatwak epedorete amina araibo nat angara oni ido “emamei aswam, karaida ainerun, karaida aijen karaida acoa kokatwak.” (Kosiom Ekalimonokinan 9:5, 6, 10.) Ido koitabo loka Isabulin 146:4, elimokinit oni Ebaibuli ebe arai ketwana etunganan, “eoliorete aomisioke.”

NUINERIT YESU KANUIKAMUNITOS ATWANARE

Abu Yawe kosub itunga kanuka aijar ikar kere kotoma akwap

7. Anyoika abu Yesu kinerite kanuikamunitos atwanare?

7 Natwania Lasaro loarai epapero loka Yesu, abu ngesi kolimok ikesisiakake ebe: “Opaperowok Lasaro ejotoi.” Konye mam Yesu apeleikinit atemar ebe iyengi Lasaro. Abu Yesu kiyatak atemar ebe “atwana Lasaro.” (Yokana 11:11-14) Abu Yesu kituput atwanare kede ajo. Ido mam ngesi abu kotema ebe elosit Lasaro toma akuj arai bo nat airiamun kede ipajanake luetwakito. Ido mam bobo abala ebe abu Lasaro kolot akim namam edungei arai bo aurunio kwape itunganan ice arai itiang. Asubit Lasaro bala ajotoi noi. Itupusitos aiwadikaeta ace nuka Ebaibuli atwanare keda ajo. Ebala Ebaibuli ebe neatwania Sitepan, abu ngesi “kojotoor.” (Aswamisio 7:60) Ewadikat  ekiyakia Paul da ebe apotu Ikristayon ice ‘kojotooros’ kotoma atwanare.—1 Ikorinton 15:6.

8. Eipone bo ani ijenunia oni ebe mam Edeke asubit itunga tetere etwakete?

8 Asubit kereka Edeke Adam ka Keba tetere kesi etwakete? Mam! Asubit Yawe kesi tetere ejarete ikar kere kongalete. Neasubia Yawe itunga, abu ngesi kijaik kesi eipud lokaijar ikar kere. (Ekalimonokinan 3:11) Mam auriak iyalamasi asesen idwekec emojongete kotwakete da, ido epupi Yawe da kwape kwangin kanuwok. Konye arai kosubite Edeke oni kanu aijar ikar kere, kanukinyo kitwakia?

 KANUKINYO KITWAKIA?

9. Kanukinyo araar aicoretait naejaikinit Yawe Adam ka Keba napatana arimaar?

9 Komanikor loka Eden, abu Yawe kolimok Adam ebe: “Inyamenenei kwape ikotor araito nuka ngolikitoi komanikor: dimarai mam inyami nuka ekitoi loka ajenun nuejok ka nueroko: naarai kapaaran nainyamia ngun itwani cut.” (Ageun 2:9, 16, 17) Acaii aicoretait ngin ido mam ationo arimaar, ajaatar Yawe keda apedorosio nuka alimokin Adam ka Keba nuibusakinit aswam kanumam ibusakinit. Korai korimaaritos kesi Yawe, ti kesi kitodutu ebe eyongitos kesi eyaitene loka Yawe. Abeit bobo kes aisiyalamikin Yawe kanu ainakin kesi iboro kere luepudasi kesi.

10, 11. (a) Eipone bo ani abu Satan kingalakinia Adam ka Keba? (b) Kanukinyo amameor aitimio kanuka adiakar naka Adam ka Keba?

10 Nukaiturur, apotu Adam ka Keba koseutu aimwang Yawe. Abala Satan ingisi Keba ebe: “Abala teni Edeke ebe, ‘Mam inyamenenete araito nuka ekitoi kere lokomanikor’?” Kobongok Keba kobala ebe: “Kisiikinitai ainyam araito nuka ikito lukomanikor; dimarai araito nuka ekitoi loejai kiding omanikor, ngun abala Edeke ebe: ‘Mam inyamenenete, karaida atiror, kinyeis atwakare.’”—Ageun 3:1-3.

11 Kosodi kotema bobo Satan atiar: “Mam cut itwakete. Naarai ejeni Edeke ebe apaaran napinyamiata ngun, nges ekwenyuniata akusikonye, iraunos yesi da bala Edeke, ajenenen nuejok ka nueroko.” (Ageun 3:4-6) Akoto Satan Keba aomoom ebe apedori ngesi alopet aseun aswam nuejok arai nueroko. Kwangin, abu Satan kingalak Keba kanuikamunitos nuepote atakanikin nges arai kemwang  Edeke. Abala Satan ebe mam Keba etwani, kosodi do Keba ainyam araito koinak da okilenike konyam. Ajenete Adam ka Keba ebe kecorakit Yawe kesi ebe mam ainyam araito. Nanyamiata kesi araito, apotu kesi komwangata aicoretait na acai ido kopatana arimaar. Kanu anyamiata kesi araito apotu kesi kitodutu ebe mam kesi ayongitos Papakec lokokuju loemin. Amamei do kesi aitimio kanuka akecediakar!

12. Kanukinyo abu adiakar naka Adam ka Keba kitakadikinia Yawe?

12 Apotu do auriak wok lusodit kitakadikis Yawe Lokasuban kec! Epone bo ani ipupunio ijo arai kitopolou ijo idwe kosodete aimwang ijo? Mam kereka ijo kikadakini?

Kesubitai Adam kapua, ido abu kobongo da apua

13. Anyoin bo apolou na abalar Yawe elimokini Adam ebe “ibongori da apua”?

13 Namwangiata Adam ka Keba Edeke, apotu kesi kotwakiasi aijar naka ikar kere. Abu Yawe kolimok Adam ebe: “Naarai irai ijo, apua ibongori da apua.” (Kosiom Ageun 3:19.) Apolouke ebe abu Adam kobongo bobo araun apua, araun bala mam nges kesubunitai. (Ageun 2:7) Kedau Adam adiakar, abu kotwana komameun bobo cut.

14. Kanukinyo kitwakia?

14 Arai korimaarito Adam ka Keba Edeke, ti kesi eroko ejarete kitoni lolo. Konye namwangiata kesi Edeke, apotu kesi kodiakasi, kosodete atwakare. Esubit adiakar  kwape adeka nairumuna kanejaasi auriakawok lusodit. Kiwurunitai oni kere irai ikadiakanarak, ido ngun nges kitwakia oni da. (Iromayon 5:12) Konye mam ngin arai alosikinet naka Edeke kanuka itunga. Mam Edeke akoto itunga atwakare, ido enyarit Ebaibuli atwanare kwape “lokasurup.”—1 Ikorinton 15:26.

KILACAKIN IJO ABEIT

15. Eipone bo ani elacakinia oni abeit naikamunit atwanare?

15 Ajenun abeit naikamunit atwanare kilacakini ijo kotoma aisisianakineta nuipu nukaisab. Kilimokinit oni Ebaibuli ebe mam ikatwak epupete apipil karaida adiokadakinet. Mam oni ipedori einer ka kesi, ido mam kesi da epedorete einer kaoni. Mam kesi epedorete aiswamakin oni nueroko, aso mam oni ibusakinit akurian kes. Konye, isisianakinete idiinin luipu ebe elositos lukatwak aiboisit ace ido ebe ekoto oni atacakin isasedootin arai engarenok luka ediini ikapun kanu ailipanakin lukatwak. Konye naijenunia oni abeit naikamunit atwanare, mam oni icamuni aisab kwape kangin.

16. Anyoin bo aisab naisisianakinete idiinin luipu kanuikamunitos lukatwak?

16 Itosomai Satan idiinin lukaisab kanu aingalingalia oni ka ainakinit oni aomit ebe eroko lukatwak ejarete. Kwape aanyunet, isisianakinete ice ebe arai kitwaka, ejai oni itutubet yenelosi aijar nenice. Isisianakini kereka ekonidiini kwangin, arai bo isisianakini abeit naka Ebaibuli naikamunit lukatwak? Itosomai Satan aingal kanu aitapaar itunga kotoma aima Yawe.

17. Kanukinyo eraar aisisianakin naka aicwe itunga kakim amorosit kanejai Yawe?

17 Mam aisisianakineta nuka idiinin luipu ejokuka. Kwape aanyunet, isisianakinete idiinin ice ebe icweo  itunga luarokok kakim namam edungei. Erai ngin amorosit kanejai Yawe. Mam Yawe itisilaanar itunga! (Kosiom 1 Yokana 4:8.) Epone bo ani ipupio ijo arai kiyany ijo itunganan itisilaari ikekoku koipone lo aicwe akaninike? Ipedori ijo aomoom ebe erai etunganan ngon loededeng. Mam ijo ikotokin aipaperikin keda nges. Ido ekoto Satan oni aipup eipone ngon kanuikamunitos Yawe!

18. Kanukinyo mam ibusakinitor oni akurian lukatwak?

18 Isisianakinete idiinin ice ebe ketwakata itunga, eraunos kesi imoyon. Isisianakinete idiinin ngun ebe ibusakinit oni ayongit ka akurian imoyon ngun naarai epedorete kesi araun ipaperowok luegogong arai bo lukasurup luededeng. Iyuunito itunga luipu aisab ngin. Ekuriaka kesi lukatwak, kanuka ngun emaete kesi lukatwak aboisit na aima Yawe. Kiitu ebe mam ikatwak epupete karaida aijen idiobore, aso mam ibusakinit oni akurian kesi. Erai Yawe Lokasubaniwok. Erai ngesi Edeke lokabeit, ido ibusakinit oni aima nges bon.—Apukokinio 4:11.

19. Eipone bo ani ingarakinitor oni aijen abeit naikamunit atwanare?

19 Naijenunia oni abeit naikamunit lukatwak, ilacun oni kotoma aingal naka idiinin lukaisab. Ido ingarakini abeit oni amisiikin aisumununeta nuijaikinit Yawe kanuikamunitos aijarawok nakoingaren .

20. Anyoika bo nuibuni oni aisisiaun kosula loetupakini?

20 Kolo sek, abu ejaanakinan loka Edeke loanyaritai Yob kingit ebe: “Arai ketwana itunganan epedori kereka ajarun bobo?” (Yob 14:14, NW) Epedori kereka itunganan yenetwanit ajarun bobo? Abongokinet naijaikinit oni Edeke kotoma Obaibuli erai naejokuna. Ibuni oni ajenun abongokinet ngin kosula kalo etupakini.

^ atu. 5 Iyuunitos icetunga ebe inyikokini etau arai emoyo aijar ketwana itunganan. Kanu aisisiaun nuipu, koany Nuengesete 17 ka 18.