Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Anyoika bo Nuisisianakini Oni Ebaibuli?

 ESULA LOKIUNIET

Anyoin Alosikinet Naka Edeke Kanuka Itunga?

Anyoin Alosikinet Naka Edeke Kanuka Itunga?

1. Anyoin alosikinet naka Edeke kanuka itunga?

EJAASI Edeke ka alosikinet naejok kanuka itunga. Abu ngesi kosub etunganan losodit ka akeberu, Adam ka Keba, kosodi aibwaikin kesi omanikor loebus noi. Alosikinet naka Edeke arai, kanu kesi aur idwe, aitaraun akwap kere paradais, ka ayait itiang.—Ageun 1:28; 2:8, 9, 15; koany Nuengesete 6.

2. (a) Eipone ani ipedoria oni ajenun ebe ebeit Edeke aitodolikin alosikineteke? (b) Anyoika nuisisianakini Ebaibuli kanuikamunitos aijar naka ikar kere?

2 Iwomit kereka ijo ebe aijar koparadais ebuni aitodolikin? Ebala Yawe ebe: “Alosikinit, ido eswamai.” (Isaia 46:9-11; 55:11) Eebo ebuni ngesi aswam nu elosikinit, ido emamei ibore itikokini ngesi. Ebala Yawe ebe esubit ngesi akwap keda alosikinet. Mam ngesi ‘esubit akwap atai.’ (Isaia 45:18) Ekoto Edeke itunga aijar kotoma akwap. Itunga luikote bo ai ekoto Edeke aiboi kotoma akwap, ido adaun apak naetia ai? Ebala Ebaibuli ebe: ‘Irumete ikadolitok [araibo luerimarito Edeke] akwap, ebusete kotoma ikar kere.’Isabulin 37:29; Apukokinio 21:3, 4.

3. Kwape edekanakinotor itunga kotwakete da, anyoika nuipedori ijo aingit?

3 Apaarasia nu, edekanakinos itunga ido kotwakete da. Kotoma aboisio nuipu ejiosi itunga ido koyaranakinos. Kabeit mam ngun eraasi alosikineta nuka Edeke. Anyoika apotu kotakanutu, ido kanukinyo? Ebaibuli bon epedori aitijenikin oni.

 LOKASURUP LOKA EDEKE

4, 5. (a) Ingai bo abu kinerakinos ka Keba komanikor loka Eden kitosomai emun? (b) Eipone bo ani eraunor itunganan yenejok ekokolan?

4 Elimokinit oni Ebaibuli ebe lokasurup loka Edeke ngesi “Ekejodijodon ka Satan.” Abu Satan kitosom emun kanu ainerakin keda Keba komanikor loka Eden. (Apukokinio 12:9; Ageun 3:1) Abu ngesi kituputoor bala emun.—Koany Nuengesete 7.

5 Abu kereka Edeke kosub Satan Ekejodijodon? Mam! Abu emalaika loajai toma akuj apaarasia nuetemonokinio Edeke akwap kanu Adam ka Keba aiboi kotoma ijulakin araun Ekejodijodon. (Yob 38:4, 7) Koipone bo ani apedorotor ngun? Eipone bo ani ijulakinor itunganan yenejokukan araun ekokolan? Mam euritai ngesi erai ekokolan. Konye ingobelei ngesi ibore yenemam erai yenike. Inyikoki ngesi aomoom nuikamunitos ibore ngin, epote do aomisio ngun ayaun eipud loka aronon. Kosodi edumu arereng, ekokoi do ngesi. Kwangin eraunor itunganan ekokolan.—Kosiom Yakob 1:13-15; koany Nuengesete 8.

6. Eipone bo ani araunor emalaika lokajokan lokasurup loka Edeke?

6 Ngun kesi apotu kotakanikisi emalaika ngon. Akaulo na Yawe aisub Adam ka Keba, abu kolimok kesi aur idwe ido “kilelebunos akwap.” (Ageun 1:27, 28) Abu Satan koomoom ebe ‘Ibusakinit itunga aima eong itia Yawe!’ Naenyikokina ngesi aomoom ngun, kopoloor do ekeipud lokaronon lo akote aima naebeit Yawe bon. Akoto emalaika ngon itunga aima ngesi. Kanuka ngun abu ngesi kingalak Keba. (Kosiom Ageun 3:1-5.) Kanuka aingalake, abu ngesi koraun Satan Ekejodijodon, lokasurup loka Edeke.

7. (a) Kanukinyo atwakiata Adam ka Keba? (b) Kanukinyo imojongia oni ido katwakete da?

 7 Apotu Adam ka Keba komwangata Edeke kosodete ainyam araito. (Ageun 2:17; 3:6) Apotu kodiakasi kama ejai Yawe, Ido ketubor apak apotu kotwakata kwape alimunitor Yawe. (Ageun 3:17-19) Apotu idwe luka Adam ka Keba kodiakasi, nges etwakiata kesi da. (Kosiom Iromayon 5: 12.) Kanu oni amisiikin kanukinyo eraatar idwe luka Adam ka Keba ikadiakanarak, ipedori oni aituput keda atuba nainomere amatapalin. Arai eriit atuba, elomunete amatapalin kere eraasi nueriitos. Akaulo na Adam aimwang Edeke, abu koraun ekadiakanaran. Kwape kiraar oni idwe luka Adam kirai oni da ikadiakanarak. Ido naarai irai oni kere ikadiakanarak nges imojongia katwakete da.—Iromayon 3:23; koany Nuengesete 9.

8, 9. (a) Anyoika bo akoto Satan Adam ka Keba aiyuun? (b) Kanukinyo mam Yawe abu komudiara Satan, Adam ka Keba?

8 Abu Satan kitegea aitepeg Yawe nainakinia ngesi Adam ka Keba aimwang Yawe. Akoto Satan Adam ka Keba acamun ebe erai Yawe loingalai, epugan lokaronon. Abala Satan ebe mam itunga ipudasi Edeke kanu alimokin kesi nuibusakinit aswam ido ebe ebusakinit Adam ka Keba aseun nuejok ka nueroko kanukec bon. Anyoika bo ti nuebusakinit Yawe aswam? Ti ngesi kemudia Satan, Adam ka Keba kosodi aitanang emwangit ngon. Konye ti kereka ngin kitodu ebe Satan ngesi ekengalan? Mam.

9 Kanuka ngun mam Yawe abu komudia kesi katipet. Konye abu kocamak itunga apak na aipugaikin bonik. Koipone kangon nges ejenuniata itunga ebe erai Satan ekengalan ido Yawe bon nges ejeni nuajokak kanu itunga. Ibuni oni aisisiaun nuipu nuikamunitos akiro ngun Kosula lo 11. Konye nuinyoika iwomit ijo  nuikamunitos aseunet naka Adam ka Keba? Arai kereka ibore yen ajok kesi aiyuun Satan kosodete aimwang Edeke? Abu Yawe kijaikinite Adam ka Keba nginibore kere yenepudasi kesi. Abu kijaik kesi aijar naedolit, aiboisit naibus ka aswam najokan. Konye amamei idiobore yenajok yeneswamakinit kes Satan. Korai kojai ijo omanikor loka Eden, anyoika bo ti nuiswama ijo?

10. Anyoin aseunet naepol naijatar oni?

 10 Oni da kijaatar keda aseunet kwape kangin, ido imoriarit ngin aijarawok nakoingaren. Ipedori oni aseun Yawe kwape epuganiwok kasodete aitodun Satan kwape ekengalan. Arai bo kiseuni Satan kwape epuganiwok. (Isabulin 73:28; kosiom Awaragasia 27:11.) Itunga idis bon kotoma akwap kesi erimaaritos Edeke. Kabeit mam erai Edeke ipugat akwap. Kwape mam eraar Edeke, ingai bodo?

INGAI BO IPUGAT AKWAP?

Arai ajakanuto ngun komam eraasi nuka Satan, ti kereka ngesi ijaikinit Yesu?

11, 12. (a) Anyoika nuisisiauni oni kotoma aisumunet nabu Satan kijaik Yesu? (b) Anyoika aiwadikaeta nuka Obaibuli nuitodunitos Satan kwape epugan loka akwap?

11 Ajeni Yesu epugan loka akwap. Kadiope paaran abu Satan “kitodianak ajakanuto kere ka aibusesukec” nejai Yesu. Abu Satan kisumun Yesu ebe: “Kainakini ngun kere arai kibiror aima eong.” (Matayo 4:8, 9; Luka 4:5, 6) Koomoom ber ijo, ‘arai komam ajakanuto ngun eraasi nuka Satan, ti kereka ngesi ijaikit Yesu’? Mam. Ajakanuto kere nukakwap eraasi nuka Satan.

12 Ipedori ijo aomom ebe; ‘eipone bo ani eraar Satan epugan lokakwap? Mam kereka Edeke Yawe Lokapedor kere erai loka asuban akuj kakwap? (Apukokinio 4:11) Eebo, abu Yesu konyarite Satan “Ekapolon loka akwapin kanu.” (Yokana 12:31; 14:30; 16:11) Abu ekiyakia Paul konyara Satan “edeke loka ikar kalu.” (2 Ikorinton 4:3, 4) Abu ekiyakia Yokana kiwadik ebe “iboiete da akwapin kere kotoma lokaronon.”—1 Yokana 5:19.

EIPONE BO ANI EMUDIARERE AKWAP NAKA SATAN?

13. Kanukinyo ipudar oni akwap nakitetet?

13 Iyata akwap na amunaar noi. Kiseseni ijiisio,  amidicio na apiyai, aisoswanut, ka amumu. Karaida ketamata itunga kagogong, mam kesi epedorete alemar atiokisio nu. Katipet, ebuni Edeke amudiar akwap na nakaronon kotoma ojie loka Arumagedon kosodi ayangaun akwap nakitetet.—Apukokinio 16:14-16; koany Nuengesete 10.

14. Ingai bo eseunit Edeke kwape Ekabaka loka apuganike? Inyoin adwarit Ebaibuli kanuikamunitos Yesu?

14 Abu Yawe koseu Yesu Kristo kwape Ekabaka loka apuganike naka akuj. Kolo sek, abu Ebaibuli kodwarite ebe ebuni Yesu aipuga kwape “Ekapolon loka Ainapakin” ido mam apugan ke enangi. (Isaia 9:6,  7) Abu Yesu isisianak ikesisiak ailip kanuikamunitos akepugan ebe “Akonijakanut kobu, Nuikoto kiswamai kakwapin kwape iswamaere kotoma akuj.” (Matayo 6: 10) Kotoma Osula lo 8, ibuni oni aisisiaun eipone loebunio Ajakanut naka Edeke amudiar ka aburokin apuganisinei nukakwap. (Kosiom Daniel 2:44.) Ebuni Ajakanut naka Edeke aitaraun akwap paradais.—Koany Nuengesete 11.

EYAPIE AKWAP NAKITETET!

15. Inyoin bo “akwap nakitetet”?

15 Isumunit Ebaibuli ebe “Kimuno akuj nakitetet ka akwap da nakitetet.” (2 Petero 3: 13; Isaia 65:17) Acepakio, neinerar Ebaibuli nuikamunitos “akwap,” inera nuikamunitos itunga luiboiete kotoma akwap. (Ageun 11:1) Apolouke ebe “akwap nakitetet” nges itunga luisirerengitai ido korimaaritos Edeke.

16. Anyoin ainakinet naejok noi naebuni Edeke aijaikin itunga luiboiete kotoma kakwap nakitetet? Ido anyoika bo nuibusakinit oni aswam kanu adumun ainakinet na?

16 Abu Yesu kisumunite ebe epote itunga luiboete  kotoma akwap nakitetet adumun aijar “naka ikar kere.” (Marako 10:30) Anyoika bo nuibusakinit oni aswam kanu adumun ainakinet ngin? Kilipit kosiom Yokana 3:16 keda 17:3 kanu adumun abongokinet. Kaanyutu ber nuisisianakini Ebaibuli nuikamunitos eipone loejaunor aijar koparadais kakwap.

17, 18. Eipone ani ijenuna oni ebe ejaun ainapakin ka ayuwara?

17 Emameun aronis, ejie, abilibilio naka ikisila, ka amumu. Mam bobo itunga lukarokok ejaunos toma akwap. (Isabulin 37:10, 11) Ebuni Edeke ‘aitasang ijiisio kitoni osange loka akwap.’ (Isabulin 46:9; Isaia 2:4) Epote itunga lueminas ka arimaarit Edeke aiboi kotoma akwap. Ejaun ainapakin ikar kere.—Isabulin 72:7.

18 Epote itunga luka Edeke Yawe ajaut ka ayuwara. Ebala Ebaibuli ebe apaarasia nu arimaaritotor idwe luka Isirael Edeke, apotu kojaunos ka ayuwara naarai ayuwarit Edeke kesi. (Ilebin 25:18, 19) Kotoma Paradais, mam oni ibuni akurianar idiobore arai idiotunganan. Ibuni oni duc ajaut kayuwara!—Kosiom Isaia 32:18; Mika  4:4.

19. Kanukinyo iyuunitor oni ebe epote inyamat aidiliun kakwap nakitetet?

19 Idiliunete inyamat. “Idiliunete akima kakwap kaidiasia nuka irongan.” (Isabulin 72:16) Ebuni Yawe ‘Edekewok, aisirereng oni’ ido ‘ebuni akwap aira akemio.’—Isabulin 67:6.

20. Eipone bo ani ijenunia oni ebe ebuni akwap kere araun paradais?

20 Ebuni akwap kere araun paradais. Ejaunos itunga kitogoi luibusiak, ka imanikoria. (Kosiom Isaia 65:21-24; Apukokinio 11:18) Ebuni akwap aibusuun  kwape emanikor loka Eden. Ebuni Yawe ainakin oni nginibore kere yenipudakin oni. Ebala Ebaibuli ebe “Ipukori akonikan, isimonikini da eimiel loka nginibore kere yenikajaran.”—Isabulin 145:16.

21. Eipone bo ani ijenunia oni ebe ejaun ainapakin kiding itunga ka itiang?

21 Ejaun ainapakin kiding itunga ka itiang. Mam itiang bobo imusungete idiotunganan. Epote idwe aiboi keda itiang luededeng.—Kosiom Isaia 11: 6-9; 65:25.

22. Anyoika ebuni Yesu aiswamaikin itunga luadekak?

22 Emameun bobo yenedeka. Najaar Yesu toma akwap, abu itangaleu itunga luipu. (Matayo 9: 35; Marako 1: 40-42; Yokana 5:5-9) Kwape Ekabaka loka Ajakanut naka Edeke, ebuni Yesu aitangaleun itunga kere. Emameun yenebala ebe “adek eong.”—Isaia 33:24; 35:5, 6.

23. Anyoika ebeit Edeke aswamaikin itunga luatwak?

23 Ejarunete bobo lukatwak. Isumunit Edeke ebe ebeit nges aitajarun itunga luipu lukatwak. “Ejaun ajarun naka luedolito ka lumam edolito.”—Kosiom Yokana 5: 28, 29; Aswamisio 24:15.

24. Eipone bo ani ipupio ijo kanu aijar kotoma paradais?

24 Ijaatar oni kere keda aseunet. Ipedori oni aseun aisisia nuikamunitos Edeke Yawe ka aijaanakin nges, araibo aseun aswam nuikoto oni ikulepek. Arai kiseu oni aijaanakin Yawe, ebuni aijarawok ajokunar koingaren. Abu Yesu kisumun etunganan lo ebubukinitai ka ngesi ebe: “Ijaun nepepe keong Paradais.” (Luka 23:43) Ibuni oni aisisaun nuipu nuikamunitos Yesu Kristo keda eipone lo ebunia ngesi aitodolikin aisumununeta nuajokak nuka Edeke.