దినవృత్తాంతాలు రెండో గ్రంథం 30:1-27

  • హిజ్కియా పస్కాను ఆచరించడం (1-27)

30  ఇశ్రాయేలు దేవుడైన యెహోవాకు పస్కా పండుగ ఆచరించేందుకు యెరూషలేములోని యెహోవా మందిరానికి రమ్మని+ హిజ్కియా ఇశ్రాయేలు, యూదా ​ప్రజలందరికీ+ కబురు పంపించాడు. అతను ఎఫ్రాయిము, మనష్షే వాళ్లకు+ ఉత్తరాలు కూడా రాసి పంపించాడు.  అయితే రాజు, అతని అధిపతులు, యెరూషలేములోని సమాజమంతా పస్కాను రెండో నెలలో ఆచరించాలని నిర్ణయించారు.+  యాజకులు తగినంతమంది తమను తాము పవిత్రపర్చుకోలేదు,+ అలాగే యెరూషలేములో ప్రజలు సమకూడలేదు కాబట్టి వాళ్లు ఆ ​పండుగను సరైన సమయంలో ఆచరించలేకపోయారు.+  ఈ ఏర్పాటు రాజుకూ, సమాజమంతటికీ సరైనదని అనిపించింది.  కాబట్టి, బెయేర్షెబా నుండి దాను+ వరకు ఇశ్రాయేలు ప్రాంతమం​తటా ప్రకటన చేయించి, యెరూష​లేములో ఇశ్రాయేలు దేవుడైన యెహోవాకు పస్కా ఆచరించడానికి ప్రజల్ని ఆహ్వానించాలని వాళ్లు నిర్ణయించారు. ధర్మశాస్త్రం నిర్దేశించి​నట్టు, వాళ్లు ఒక సమూహంగా దాన్ని ఆచరిం​చలేదు.+  అప్పుడు రాజాజ్ఞ ప్రకారం రాజు, అతని అధిపతులు రాసిన ఉత్తరాలు తీసుకొని వార్తాహరులు* ఇశ్రాయేలు, యూదా అంతటికీ వెళ్లి ఇలా చాటించారు: “ఇశ్రాయేలు ప్రజలారా, అబ్రాహాముకు, ఇస్సాకుకు, ఇశ్రాయేలుకు దేవుడైన యెహోవా దగ్గరికి తిరిగిరండి. అప్పుడు అష్షూరు రాజుల చేతిలో నుండి తప్పించుకున్న మిగిలినవాళ్ల దగ్గరికి ఆయన తిరిగొస్తాడు.+  మీరు మీ పూర్వీకుల్లా, మీ సహోదరుల్లా ఉండకండి; వాళ్లు తమ పూర్వీకుల దేవుడైన యెహోవా పట్ల నమ్మకద్రోహానికి పాల్పడ్డారు. అందుకే ఆయన వాళ్ల మీదికి నాశనాన్ని తీసుకొచ్చాడు. మీరు దాన్ని కళ్లారా చూస్తున్నారు.+  మీరు మీ పూర్వీకుల్లా మొండిగా ఉండకండి.+ యెహోవాకు లోబడండి, ఆయన శాశ్వతంగా పవిత్రపర్చిన ఆయన పవిత్రమైన స్థలానికి వచ్చి,+ మీ దేవుడైన యెహోవాను సేవించండి. అప్పుడు ఆయన కోపాగ్ని మీ మీద నుండి మళ్లుతుంది.+  మీరు యెహోవా దగ్గరికి తిరిగొస్తే మీ సహోదరుల్ని, మీ కుమారుల్ని బందీలుగా తీసుకెళ్లినవాళ్లు ​వాళ్లమీద కరుణ చూపించి,+ వాళ్లను ఈ దేశానికి తిరిగి రానిస్తారు.+ ఎందుకంటే, మీ దేవుడైన యెహోవా కనికరం,* కరుణ గల దేవుడు.+ మీరు ఆయన దగ్గరికి తిరిగొస్తే ఆయన తన ముఖాన్ని పక్కకు తిప్పుకోడు.”+ 10  వార్తాహరులు* ఎఫ్రాయిము, మనష్షే, చివరికి జెబూలూను ప్రాంతమంతటా ఉన్న ఒక్కో నగరానికి వెళ్లారు.+ కానీ ప్రజలు వాళ్లను హేళన చేశారు, ఎగతాళి చేశారు.+ 11  అయితే ఆషేరు, మనష్షే, జెబూలూను గోత్రాల్లో కొంతమంది తమను తాము తగ్గించు​కొని యెరూషలేముకు వచ్చారు.+ 12  సత్యదేవుని అనుగ్రహం యూదావాళ్ల మీద ఉండడంతో వాళ్లు యెహోవా మాట ప్రకారం రాజు, అధిపతులు ఆజ్ఞాపించినదాన్ని ఐక్యంగా* చేశారు. 13  రెండో నెలలో+ పులవని రొట్టెల పండుగ+ ఆచరించడానికి యెరూషలేములో ​చాలామంది ప్రజలు సమకూడారు; అది చాలా పెద్ద సమూహం. 14  వాళ్లు లేచి యెరూషలేములో ఉన్న బలిపీఠాల్ని, ధూపవేదికలన్నిటినీ+ తొలగించి+ వాటిని కిద్రోను లోయలో ​పడేశారు. 15  వాళ్లు రెండో నెల 14వ రోజున పస్కా బలి జంతువును వధించారు. యాజకులు, లేవీయులు సిగ్గుపడి, తమను తాము పవిత్రపర్చుకొని యెహోవా మందిరంలోకి దహనబలుల్ని తీసుకొచ్చారు. 16  సత్యదేవుని సేవకుడైన మోషే ధర్మశాస్త్రం నిర్దేశించిన ప్రకారం వాళ్లు ​తమతమ స్థానాల్లో నిలబడ్డారు; ​యాజకులు ​లేవీయుల చేతిలో నుండి రక్తాన్ని తీసుకొని ​బలిపీఠం మీద చిలకరించారు.+ 17  తమను తాము పవిత్రపర్చుకోనివాళ్లు సమాజంలో చాలామంది ఉన్నారు; వాళ్లందర్నీ యెహోవా కోసం పవిత్రపర్చడానికి పస్కా బలి జంతువుల్ని వధించే బాధ్యత లేవీయులకు అప్పగించబడింది.+ 18  చాలామంది ప్రజలు ముఖ్యంగా ఎఫ్రాయిము, మనష్షే,+ ఇశ్శాఖారు, జెబూలూను ప్రజలు తమను తాము పవిత్రపర్చుకోలేదు. అయినా వాళ్లు ధర్మశాస్త్రంలో రాయబడినదానికి విరుద్ధంగా పస్కాను తిన్నారు. అయితే హిజ్కియా వాళ్ల కోసం ఇలా ప్రార్థించాడు: “మంచివాడైన యెహోవా+ క్షమించాలి, 19  పవిత్రతకు సంబంధించిన ప్రమాణం ప్రకారం తమను తాము పవిత్రపర్చుకోకపోయినా,+ తమ పూర్వీకుల దేవుడూ సత్యదేవుడూ అయిన యెహోవాను వెదకడానికి హృదయాన్ని సిద్ధం చేసుకున్న ప్రతీ ఒక్కర్ని+ ఆయన క్షమించాలి.” 20  యెహోవా హిజ్కియా ప్రార్థన విని, ప్రజల్ని క్షమించాడు.* 21  అలా యెరూషలేములోని ఇశ్రాయేలీయులు ఎంతో సంతోషంగా+ ఏడురోజులు పులవని రొట్టెల పండుగను ఆచరించారు.+ లేవీయులు, యాజకులు ప్రతీరోజు యెహోవాను స్తుతించారు, తమ వాద్యాల్ని బిగ్గరగా వాయిస్తూ+ యెహోవాను స్తుతించారు. 22  అంతేకాదు, హిజ్కియా యెహోవాను వివేచనతో* సేవించిన లేవీయులందరితో మాట్లాడి, వాళ్లను ప్రోత్సహించాడు. వాళ్లు ఆ పండుగలో ఏడురోజుల పాటు తింటూ,+ సమాధాన బలులు+ అర్పిస్తూ, తమ పూర్వీకుల దేవుడైన యెహోవాకు కృతజ్ఞతలు చెల్లిస్తూ ఉన్నారు. 23  తర్వాత సమాజమంతా మరో ఏడు​రోజులు దాన్ని ఆచరించాలని నిర్ణయించింది. కాబట్టి వాళ్లు సంతోషంగా మరో ​ఏడురోజులు దాన్ని ఆచరించారు.+ 24  యూదా రాజైన హిజ్కియా సమాజం కోసం 1,000 ఎద్దుల్ని, 7,000 గొర్రెల్ని విరాళంగా ఇచ్చాడు. అధిపతులు సమాజం కోసం 1,000 ఎద్దుల్ని, 10,000 గొర్రెల్ని విరాళంగా ఇచ్చారు;+ పెద్ద సంఖ్యలో యాజకులు తమను తాము పవిత్రపర్చుకుంటూ ఉన్నారు.+ 25  యూదా సమాజమంతా, యాజకులు, లేవీయులు, ఇశ్రాయేలు నుండి వచ్చిన సమాజమంతా,+ ఇశ్రాయేలు దేశం నుండి వచ్చిన విదేశీయులు, యూదాలో నివసిస్తున్న విదేశీయులు+ సంతోషిస్తూ ఉన్నారు. 26  అప్పుడు యెరూషలేములో ఎంతో సంతోషం వెల్లివిరిసింది. ఎందుకంటే ఇశ్రాయేలు రాజైన దావీదు కుమారుడు సొలొమోను రోజుల నుండి యెరూషలేములో అలాంటిది జరగలేదు.+ 27  చివర్లో లేవీయులైన యాజకులు నిలబడి ప్రజల్ని దీవించారు;+ దేవుడు వాళ్ల ప్రార్థన విన్నాడు, వాళ్ల ప్రార్థన ఆయన పవిత్ర నివాస ​స్థలమైన పరలోకానికి చేరింది.

అధస్సూచీలు

అక్ష., “పరుగెత్తేవాళ్లు.”
లేదా “దయ.”
అక్ష., “పరుగెత్తేవాళ్లు.”
లేదా “ఒకే హృదయంతో.”
అక్ష., “బాగుచేశాడు.”
లేదా “బుద్ధితో.”