సమూయేలు మొదటి గ్రంథం 24:1-22
24 సౌలు ఫిలిష్తీయుల్ని తరిమి వెనక్కి వచ్చిన వెంటనే, “ఇదిగో! దావీదు ఏన్గెదీ ఎడారిలో ఉన్నాడు”+ అని అతనికి చెప్పారు.
2 దాంతో సౌలు ఇశ్రాయేలు అంతటి నుండి 3,000 మందిని ఎంచుకొని దావీదును, అతని మనుషుల్ని పట్టుకోవడానికి కొండమేకలు ఉండే నిటారైన కొండలకు వెళ్లాడు.
3 సౌలు దారిలో ఉన్న రాతి గొర్రెల దొడ్ల దగ్గరికి వచ్చాడు. అక్కడ ఒక గుహ ఉంది. అతను కాలకృత్యాలు తీర్చుకోవడానికి* అందులోకి వెళ్లాడు. ఆ సమయంలో దావీదు, అతని మనుషులు గుహ వెనక+ కూర్చొని సేదదీరుతున్నారు.
4 దావీదు మనుషులు అతనితో, “ఇదిగో! యెహోవా నీ శత్రువును నీ చేతికి అప్పగించాడు,+ నీ దృష్టికి ఏది మంచిదనిపిస్తే అది చేయడానికి ఆయన నిన్ను అనుమతిస్తున్నాడు” అన్నారు. దాంతో దావీదు లేచి సౌలు వేసుకున్న చేతుల్లేని నిలువుటంగీ అంచును మెల్లగా కోశాడు.
5 అయితే, సౌలు అంగీ అంచును కోసినందుకు అతని మనస్సాక్షి అతన్ని గద్దించసాగింది.*+
6 అప్పుడు అతను తన మనుషులతో ఇలా అన్నాడు: “యెహోవా దృష్టి నుండి చూస్తే, యెహోవా అభిషేకించిన నా ప్రభువు మీద చెయ్యి ఎత్తి అతనికి ఇలా చేయడం నా ఊహకందని విషయం. ఎందుకంటే, అతను యెహోవా అభిషేకించిన వ్యక్తి.”+
7 ఈ మాటలు చెప్పి దావీదు తన మనుషుల్ని సౌలు మీద దాడి చేయకుండా ఆపాడు.* సౌలు గుహలో నుండి బయటికి వచ్చి తన దారిన వెళ్లిపోయాడు.
8 తర్వాత దావీదు లేచి గుహలో నుండి బయటికి వచ్చి, సౌలు వెనక నుండి, “నా ప్రభూ, రాజా!” అని బిగ్గరగా పిలిచాడు.+ సౌలు వెనక్కి తిరిగి చూసినప్పుడు, దావీదు మోకాళ్లూని, సాష్టాంగపడ్డాడు.
9 దావీదు సౌలుతో ఇలా అన్నాడు: “ ‘ఇదిగో! దావీదు నీకు హాని చేయాలని చూస్తున్నాడు’ అని చెప్పే మనుషుల మాటల్ని నువ్వు ఎందుకు వింటున్నావు?+
10 గుహలో యెహోవా నిన్ను నాకు ఎలా అప్పగించాడో ఈ రోజు నువ్వు కళ్లారా చూశావు. నిన్ను చంపమని నాకు ఒకరు చెప్పినప్పుడు,+ నేను నీ మీద జాలిపడి, ‘నా ప్రభువు యెహోవా అభిషేకించిన వ్యక్తి+ కాబట్టి నేను అతని మీద చెయ్యి ఎత్తను’ అన్నాను.
11 ఇదిగో, నా తండ్రీ, నా చేతిలో ఉన్న నీ అంగీ అంచును చూడు; నేను నీ అంగీ అంచును కోసినప్పుడు, నేను నిన్ను చంపగలిగేవాణ్ణే కానీ నేనలా చేయలేదు. నీకు హాని చేయాలనే ఉద్దేశం గానీ, నీ మీద తిరుగుబాటు చేయాలనే ఉద్దేశం గానీ నాకు లేదని, నేను నీ విషయంలో పాపం చేయలేదని+ నువ్వు ఇప్పుడు చూసి అర్థం చేసుకోవచ్చు. కానీ నువ్వేమో నా ప్రాణం తీయాలని నన్ను వెంటాడుతున్నావు.+
12 యెహోవా నీకూ నాకూ మధ్య న్యాయం తీర్చాలి.+ యెహోవా నా కోసం నీమీద పగతీర్చుకోవాలి.+ కానీ నా చెయ్యి మాత్రం నీ మీదికి లేవదు.+
13 ఒక ప్రాచీన సామెత చెప్తున్నట్టు, ‘దుష్టుని నుండే దుష్టత్వం వస్తుంది.’ కానీ నా చెయ్యి మాత్రం నీ మీదికి లేవదు.
14 ఇశ్రాయేలు రాజు ఎవర్ని పట్టుకోవడానికి బయల్దేరాడు? ఎవర్ని తరుముతున్నాడు? చచ్చిన కుక్కను కాదా? మిన్నల్లిని కాదా?+
15 యెహోవా న్యాయమూర్తిగా ఉండాలి, ఆయన నీకూ నాకూ మధ్య న్యాయం తీర్చాలి. ఆయన విషయాన్ని పరిశీలించి నా తరఫున వాదిస్తాడు,+ నాకు న్యాయం తీర్చి నీ చేతి నుండి నన్ను రక్షిస్తాడు.”
16 దావీదు మాట్లాడడం పూర్తవ్వగానే సౌలు, “నా కుమారుడా దావీదూ, ఇది నీ స్వరమేనా?”+ అని అడిగి, పెద్దగా ఏడ్వడం మొదలుపెట్టాడు.
17 అతను దావీదుతో ఇలా అన్నాడు: “నువ్వు నాకన్నా ఎక్కువ నీతిమంతుడివి, ఎందుకంటే నువ్వు నాతో మంచిగా ప్రవర్తించావు, కానీ నేను నీకు కీడు చేశాను.+
18 అవును, యెహోవా నన్ను నీ చేతికి అప్పగించినా నువ్వు నన్ను చంపకుండా నాతో మంచిగా ప్రవర్తించావని ఈ రోజు చూపించావు.+
19 శత్రువు దొరికినప్పుడు ఎవరైనా హాని చేయకుండా అతని దారిన అతన్ని పంపిస్తారా? నువ్వు ఈ రోజు నాకు చేసినదాన్నిబట్టి యెహోవా నీకు మంచిని ప్రతిఫలంగా ఇస్తాడు.+
20 ఇదిగో! నువ్వు ఖచ్చితంగా రాజుగా పరిపాలిస్తావనీ,+ నీ చేతిలో ఇశ్రాయేలు రాజ్యం ఎప్పటికీ ఉంటుందనీ నాకు తెలుసు.
21 ఇప్పుడు నువ్వు, నా తర్వాత నా సంతానాన్ని తుడిచివేయవనీ, నా తండ్రి ఇంటి నుండి నా పేరును కొట్టివేయవనీ+ యెహోవా పేరున నాకు ప్రమాణం చేయి.”+
22 కాబట్టి దావీదు సౌలుకు ప్రమాణం చేశాడు. తర్వాత సౌలు ఇంటికి వెళ్లాడు.+ అయితే దావీదు, అతని మనుషులు వాళ్లు దాక్కున్న స్థలానికి వెళ్లారు.+
