దినవృత్తాంతాలు మొదటి గ్రంథం 22:1-19
22 తర్వాత దావీదు ఇలా అన్నాడు: “ఇది సత్యదేవుడైన యెహోవా మందిరం, ఇది ఇశ్రాయేలీయులు దహనబలులు అర్పించే బలిపీఠం.”+
2 అప్పుడు దావీదు ఇశ్రాయేలు దేశంలో ఉన్న పరదేశుల్ని+ ఒకచోట పోగుచేయమని ఆజ్ఞాపించాడు; అతను వాళ్లను సత్యదేవుని మందిర నిర్మాణం కోసం రాళ్లను తొలిచి, వాటిని చెక్కే పనిలో పెట్టాడు.+
3 ద్వారాల తలుపులకు కావాల్సిన మేకుల కోసం, బందుల కోసం పెద్ద మొత్తంలో ఇనుమును, అలాగే రాగిని కూడా దావీదు సిద్ధం చేశాడు; ఆ రాగి, తూకం వేయలేనంత విస్తారంగా ఉంది.+
4 వాటితోపాటు అతను లెక్కలేనన్ని దేవదారు మ్రానుల్ని+ సిద్ధం చేశాడు. ఎందుకంటే సీదోనీయులు,+ తూరువాళ్లు+ పెద్ద మొత్తంలో దేవదారు మ్రానుల్ని దావీదు దగ్గరికి తెచ్చారు.
5 దావీదు ఇలా అన్నాడు: “నా కుమారుడు సొలొమోను చిన్నవాడు, అనుభవం లేనివాడు;*+ యెహోవా కోసం కట్టబోయే మందిరం చాలా వైభవంగా ఉండాలి,+ దాని పేరుప్రఖ్యాతుల గురించి, దాని అందం గురించి+ దేశాలన్నిట్లో తెలియాలి.+ కాబట్టి నేను అతనికి అవసరమైనవి సిద్ధం చేస్తాను.” అలా దావీదు తాను చనిపోకముందు పెద్ద మొత్తంలో వస్తువుల్ని సిద్ధం చేశాడు.
6 అంతేకాదు దావీదు తన కుమారుడు సొలొమోనును పిలిపించి, ఇశ్రాయేలు దేవుడైన యెహోవా కోసం ఒక మందిరాన్ని కట్టమని ఆదేశించాడు.
7 దావీదు తన కుమారుడైన సొలొమోనుతో ఇలా అన్నాడు: “నా దేవుడైన యెహోవా పేరు కోసం ఒక మందిరాన్ని కట్టాలనేది నా హృదయ కోరిక.+
8 కానీ యెహోవా వాక్యం నా దగ్గరికి వచ్చి ఇలా చెప్పింది: ‘నువ్వు చాలా రక్తం చిందించావు, పెద్దపెద్ద యుద్ధాలు చేశావు. నువ్వు నా ఎదుట భూమ్మీద ఎంతో రక్తాన్ని చిందించావు కాబట్టి నా పేరు కోసం ఒక మందిరాన్ని నువ్వు కట్టవు.+
9 ఇదిగో! నీకు ఒక కుమారుడు పుడతాడు, అతను శాంతిపరుడిగా* ఉంటాడు; నేను అతని చుట్టూ ఉన్న శత్రువులందరి నుండి అతనికి విశ్రాంతి ఇస్తాను;+ అతని పేరు సొలొమోను* అని పిలవబడుతుంది, నేను అతని రోజుల్లో ఇశ్రాయేలుకు శాంతిని, నెమ్మదిని అనుగ్రహిస్తాను.+
10 అతనే నా పేరు కోసం ఒక మందిరం కడతాడు.+ అతను నాకు కుమారుడు అవుతాడు, నేను అతనికి తండ్రిని అవుతాను.+ నేను ఇశ్రాయేలు మీద అతని రాజ్య సింహాసనాన్ని ఎప్పటికీ స్థిరపరుస్తాను.’+
11 “నా కుమారుడా, యెహోవా నీకు తోడుగా ఉండాలి; ఆయన నీ గురించి చెప్పినట్టు, నీ దేవుడైన యెహోవా మందిరాన్ని కట్టడంలో నువ్వు సఫలం అవ్వాలి.+
12 యెహోవా నీకు ఇశ్రాయేలు మీద అధికారం ఇచ్చినప్పుడు, నువ్వు నీ దేవుడైన యెహోవా ధర్మశాస్త్రాన్ని పాటించేలా ఆయన నీకు బుద్ధిని, అవగాహనను ఇవ్వాలి;+
13 యెహోవా ఇశ్రాయేలుకు ఇవ్వమని మోషేకు ఆజ్ఞాపించిన నియమాల్ని, తీర్పుల్ని నువ్వు జాగ్రత్తగా పాటిస్తే,+ విజయం సాధిస్తావు.+ ధైర్యంగా, నిబ్బరంగా ఉండు. భయపడకు, బెదిరిపోకు.+
14 ఇదిగో నేను ఎంతో ప్రయాసపడి యెహోవా మందిరం కోసం 1,00,000 తలాంతుల* బంగారాన్ని, 10,00,000 తలాంతుల వెండిని, చాలా విస్తారంగా రాగిని, ఇనుమును సిద్ధం చేశాను,+ వాటిని తూకం వేయడం సాధ్యం కాదు; నేను మ్రానుల్ని, రాళ్లను కూడా సిద్ధం చేశాను;+ నువ్వు వాటితోపాటు మరికొన్ని సమకూర్చు.
15 పెద్ద సంఖ్యలో పనివాళ్లు, అంటే రాళ్లు కొట్టేవాళ్లు, తాపీ పనివాళ్లు,+ వడ్రంగులు, అన్నిరకాల నైపుణ్యాలు ఉన్న పనివాళ్లు+ నీ దగ్గర ఉన్నారు.
16 లెక్కించలేనంత బంగారం, వెండి, రాగి, ఇనుము ఉన్నాయి. నువ్వు లేచి పని మొదలుపెట్టు, యెహోవా నీకు తోడుగా ఉండాలి.”+
17 తర్వాత దావీదు, తన కుమారుడైన సొలొమోనుకు సహాయం చేయమని ఇశ్రాయేలు అధిపతులందరికీ ఆజ్ఞాపించాడు, అతనిలా చెప్పాడు:
18 “మీ దేవుడైన యెహోవా మీకు తోడుగా ఉన్నాడు కదా? ఆయన అన్నివైపులా మీకు విశ్రాంతి ఇచ్చాడు కదా? దేశ నివాసుల్ని ఆయన నా చేతికి అప్పగించాడు; దేశం యెహోవా, ఆయన ప్రజల ఆధిపత్యం కిందికి వచ్చింది.
19 ఇప్పుడు మీరు నిండు హృదయంతో, నిండు ప్రాణంతో* మీ దేవుడైన యెహోవాను వెదకాలని నిశ్చయించుకోండి;+ యెహోవా ఒప్పంద మందసాన్ని, సత్యదేవుని పవిత్రమైన పాత్రల్ని యెహోవా పేరు కోసం కట్టబడే మందిరంలోకి+ తెచ్చేలా+ సత్యదేవుడైన యెహోవా పవిత్రమైన స్థలాన్ని కట్టడం మొదలుపెట్టండి.”+
అధస్సూచీలు
^ లేదా “కోమలమైనవాడు.”
^ అక్ష., “విశ్రాంతిపరుడిగా.”
^ “శాంతి” అనే అర్థమున్న హీబ్రూ పదం నుండి వచ్చింది.
^ అప్పట్లో ఒక తలాంతు 34.2 కిలోలతో సమానం. అనుబంధం B14 చూడండి.
