హగ్గయి 2:1-23
2 ఏడో నెల 21వ రోజున యెహోవా వాక్యం హగ్గయి+ ప్రవక్త ద్వారా ఇలా చెప్పింది:
2 “యూదా అధిపతీ షయల్తీయేలు కుమారుడూ అయిన జెరుబ్బాబెలును,+ ప్రధానయాజకుడూ యెహోజాదాకు+ కుమారుడూ అయిన యెహోషువను,+ మిగతా ప్రజలందర్నీ దయచేసి ఇలా అడుగు:
3 ‘ఈ మందిర* పూర్వ వైభవాన్ని చూసినవాళ్లు ఎవరైనా మీలో ఉన్నారా?+ ఇప్పుడది మీకెలా కనిపిస్తుంది? దానికీ దీనికీ అసలు పోలికే లేదని మీకు అనిపించడం లేదా?’+
4 “యెహోవా ఇలా అంటున్నాడు: ‘జెరుబ్బాబెలూ, నువ్వు ధైర్యంగా ఉండు! ప్రధానయాజకుడివి, యెహోజాదాకు కుమారుడివి అయిన యెహోషువా, నువ్వు ధైర్యంగా ఉండు!’
“ ‘దేశంలోని ప్రజలారా, మీరంతా ధైర్యంగా ఉండి, పని చేయండి!’+ అని యెహోవా అంటున్నాడు.
“ ‘ఎందుకంటే, నేను మీకు తోడుగా ఉన్నాను’+ అని సైన్యాలకు అధిపతైన యెహోవా అంటున్నాడు.
5 ‘మీరు ఐగుప్తు* నుండి బయటికి వచ్చినప్పుడు నేను మీకు ఏమని వాగ్దానం చేశానో గుర్తుచేసుకోండి.+ ఇప్పటికీ నా పవిత్రశక్తితో నేను మిమ్మల్ని నడిపిస్తూనే ఉన్నాను.* భయపడకండి.’ ”+
6 “ఎందుకంటే, సైన్యాలకు అధిపతైన యెహోవా ఇలా చెప్తున్నాడు: ‘త్వరలోనే నేను ఇంకొకసారి ఆకాశాన్ని, భూమిని, సముద్రాన్ని, ఆరిన నేలను కంపింపజేస్తాను.’+
7 “ ‘నేను అన్నిదేశాల్ని కంపింపజేస్తాను, అప్పుడు అన్నిదేశాల విలువైన వస్తువులు* ఈ మందిరంలోకి వస్తాయి;+ నేను ఈ మందిరాన్ని మహిమతో నింపుతాను’+ అని సైన్యాలకు అధిపతైన యెహోవా చెప్తున్నాడు.
8 “ ‘వెండి నాది, బంగారం నాది’ అని సైన్యాలకు అధిపతైన యెహోవా అంటున్నాడు.
9 “ ‘ఈ మందిర భవిష్యత్‌ వైభవం, దాని పూర్వ వైభవాన్ని మించిపోతుంది’ అని సైన్యాలకు అధిపతైన యెహోవా చెప్తున్నాడు.
“ ‘ఈ చోట నేను శాంతిని అనుగ్రహిస్తాను’+ అని సైన్యాలకు అధిపతైన యెహోవా అంటున్నాడు.”
10 దర్యావేషు పరిపాలన రెండో సంవత్సరం తొమ్మిదో నెల 24వ రోజున యెహోవా వాక్యం హగ్గయి+ ప్రవక్తకు ఇలా చెప్పింది:
11 “సైన్యాలకు అధిపతైన యెహోవా ఇలా చెప్తున్నాడు: ‘దయచేసి, ధర్మశాస్త్రం గురించి యాజకుల్ని ఇలా అడుగు:+
12 “ఒక వ్యక్తి తన వస్త్రపు మడతలో పవిత్రమైన మాంసాన్ని పెట్టుకుని వెళ్తున్నప్పుడు, ఆ వస్త్రం రొట్టెను గానీ, కూరను గానీ, ద్రాక్షారసాన్ని గానీ, నూనెను గానీ, వేరే ఆహారాన్ని గానీ తాకితే అవి పవిత్రమౌతాయా?” ’ ”
అందుకు యాజకులు, “అవ్వవు!” అన్నారు.
13 తర్వాత హగ్గయి వాళ్లను, “శవాన్ని* ముట్టుకోవడం వల్ల అపవిత్రుడైన వ్యక్తి వాటిలో దేన్నైనా ముట్టుకుంటే, అది అపవిత్రమౌతుందా?” అని అడిగాడు.+
అందుకు యాజకులు, “అపవిత్రమౌతుంది!” అన్నారు.
14 అప్పుడు హగ్గయి ఇలా అన్నాడు: “ ‘ఈ ప్రజలు కూడా అలానే ఉన్నారు, నా ముందు ఈ జనం కూడా అలానే ఉంది, వాళ్ల చేతుల పనంతా అలానే ఉంది; వాళ్లు అక్కడ అర్పించేవన్నీ అలానే ఉన్నాయి’ అని యెహోవా అంటున్నాడు.
15 “ ‘అయితే, ఈ రోజు నుండి దయచేసి మీరు దీని గురించి జాగ్రత్తగా ఆలోచించండి: యెహోవా ఆలయాన్ని మళ్లీ కట్టడం మొదలుపెట్టకముందు+
16 పరిస్థితి ఎలా ఉండేది? ఒక వ్యక్తి 20 కొలతల ధాన్యం ఉంటుందనుకొని ధాన్యం కుప్ప దగ్గరికి వచ్చినప్పుడు, అక్కడ 10 కొలతల ధాన్యమే ఉండేది; అలాగే ఒక వ్యక్తి 50 కొలతల ద్రాక్షారసం ఉంటుందనుకొని ద్రాక్షతొట్టి దగ్గరికి వచ్చినప్పుడు అక్కడ 20 కొలతల ద్రాక్షారసమే ఉండేది;+
17 నేను మీ చేతుల పనంతటినీ ఘోరమైన తెగులుతో, బూజుతో,* వడగండ్లతో నాశనం చేశాను.+ అయినా మీలో ఒక్కరు కూడా నావైపు తిరగలేదు’ అని యెహోవా అంటున్నాడు.
18 “ ‘ఈ రోజు నుండి అంటే తొమ్మిదో నెల 24వ రోజున యెహోవా మందిర పునాది వేసినప్పటి నుండి+ మీరు దయచేసి దీని గురించి జాగ్రత్తగా ఆలోచించండి, ఈ విషయం మీద మనసుపెట్టండి:
19 గోదాములో ధాన్యం ఉందా?+ ద్రాక్ష చెట్లు, అంజూర చెట్లు, దానిమ్మ చెట్లు, ఒలీవ చెట్లు ఇంకా ఫలించలేదు కదా? ఈ రోజు నుండి నేను మిమ్మల్ని దీవిస్తాను.’ ”+
20 ఆ నెల 24వ రోజున యెహోవా వాక్యం హగ్గయి దగ్గరికి రెండోసారి వచ్చి+ ఇలా చెప్పింది:
21 “యూదా అధిపతైన జెరుబ్బాబెలుకు ఇలా చెప్పు: ‘నేను ఆకాశాన్ని, భూమిని కంపింపజేయబోతున్నాను.+
22 నేను రాజుల సింహాసనాల్ని పడద్రోస్తాను, దేశాల్ని పరిపాలించే రాజ్యాల బలాన్ని నాశనం చేస్తాను;+ నేను రథాల్ని, వాటి రౌతుల్ని పడద్రోస్తాను; గుర్రాలు పడిపోతాయి, వాటి రౌతులు పడిపోతారు; వాళ్లు కత్తితో ఒకరినొకరు చంపుకుంటారు.’ ”+
23 “సైన్యాలకు అధిపతైన యెహోవా ఇలా అంటున్నాడు: ‘షయల్తీయేలు కుమారుడివి, నా సేవకుడివి అయిన జెరుబ్బాబెలూ,+ ఆ రోజున నేను నీకు ఒక పని అప్పగిస్తాను.’+ యెహోవా ఇంకా ఇలా అంటున్నాడు: ‘నేను నిన్ను నా ముద్ర-ఉంగరంలా చేస్తాను, ఎందుకంటే నువ్వు నేను ఎంచుకున్న వ్యక్తివి.’ ఇది సైన్యాలకు అధిపతైన యెహోవా చెప్పిన మాట.”
అధస్సూచీలు
^ అక్ష., “ఇంటి.”
^ లేదా “ఈజిప్టు.”
^ లేదా “అప్పుడు నా పవిత్రశక్తి మీ మధ్య నిలిచివుండేది” అయ్యుంటుంది.
^ లేదా “ఇష్ట వస్తువులు.”
^ లేదా “మొక్కల తెగులుతో.”
