సామెతలు 8:1-36
8 తెలివి గొంతెత్తి పిలుస్తోంది,
వివేచన బిగ్గరగా మాట్లాడుతోంది.+
2 అది దారి పక్కన ఎత్తైన స్థలాల్లో,+కూడళ్ల దగ్గర నిలబడి ఉంది.
3 నగర ద్వారాల పక్కన, తలుపుల దగ్గరఅది బిగ్గరగా ఇలా అంటోంది:+
4 “ప్రజలారా, మీకే చెప్తున్నాను;మీలో ప్రతీ ఒక్కరితో నేను మాట్లాడుతున్నాను.
5 అనుభవంలేని వాళ్లారా, వివేకం* సంపాదించండి;+మూర్ఖులారా, అవగాహనగల హృదయం సంపాదించుకోండి.
6 నేను చెప్పే విషయాలు వినండి, అవి చాలా ముఖ్యమైనవి,నా పెదాలు సరైన మాటలే మాట్లాడతాయి;
7 నా నోరు సత్యమే చెప్తుంది,నా పెదాలకు చెడు అసహ్యం.
8 నా నోటి మాటలన్నీ నీతిగలవి.
వాటిలో వంకర మాటలు గానీ, కుటిల మాటలు గానీ లేవు.
9 నా మాటలన్నీ వివేచన గలవాళ్లకు సూటిగా,జ్ఞానం పొందినవాళ్లకు సరైనవిగా అనిపిస్తాయి.
10 వెండికి బదులు నేనిచ్చే క్రమశిక్షణను,మేలిమి బంగారానికి బదులు జ్ఞానాన్ని ఎంచుకోండి,+
11 ఎందుకంటే, పగడాల* కంటే తెలివి విలువైనది;అమూల్యమైనవేవీ దానికి సాటిరావు.
12 తెలివి అనే నేను వివేకంతో* కలిసి నివసిస్తాను;జ్ఞానం, ఆలోచనా సామర్థ్యం+ నా దగ్గర ఉన్నాయి.
13 యెహోవాకు భయపడడం అంటే చెడును అసహ్యించుకోవడమే.+
తనను తాను హెచ్చించుకోవడం, గర్వం,+ చెడ్డ మార్గం, తప్పుడు మాటలు+ నాకు అసహ్యం.
14 మంచి సలహా, ఆచరణాత్మక తెలివి+ నా దగ్గర ఉన్నాయి;అవగాహన,+ బలం+ నా సొంతం.
15 నా సహాయంతో రాజులు పరిపాలిస్తారు,ఉన్నతాధికారులు నీతిగల+ చట్టాలు చేస్తారు.
16 నా సహాయంతో అధిపతులు ఏలతారు,ప్రముఖులు నీతిగా తీర్పు తీరుస్తారు.
17 నన్ను ప్రేమించేవాళ్లను నేను ప్రేమిస్తాను,నన్ను వెదికేవాళ్లకు దొరుకుతాను.+
18 ఐశ్వర్యం, ఘనత,శాశ్వత సంపదలు,* నీతి నా దగ్గర ఉన్నాయి.
19 నేను ఇచ్చేవి బంగారం కన్నా, స్వచ్ఛమైన బంగారం కన్నా మేలైనవి,నా బహుమతులు శ్రేష్ఠమైన వెండికన్నా మెరుగైనవి.+
20 నీతి మార్గంలో,న్యాయమార్గాల మధ్యలో నేను నడుస్తాను;
21 నన్ను ప్రేమించేవాళ్లకు నేను నిజమైన సంపదల్ని ఇస్తాను,వాళ్ల గోదాముల్ని నింపుతాను.
22 యెహోవా తన సృష్టికార్యాల్లో మొదటిదిగా నన్ను చేశాడు,+పూర్వం తన పనుల్లో మొట్టమొదటిదిగా నన్ను తయారుచేశాడు.+
23 ప్రాచీనకాలాల్లో,* మొదట్లో,భూమిని చేయకముందే+ నేను నియమించబడ్డాను.+
24 అగాధ జలాలు+ లేనప్పుడు,నీళ్లతో నిండిన ఊటలు లేనప్పుడు నేను పుట్టాను.*
25 పర్వతాల్ని వాటి స్థానంలో ఉంచకముందే,కొండలు ఉనికిలోకి రాకముందే నేను పుట్టాను,
26 అప్పటికి ఆయన ఇంకా భూమిని గానీ, దాని మైదానాల్ని గానీ,పిడికెడు నేల మట్టిని గానీ చేయలేదు.
27 ఆయన ఆకాశాన్ని సిద్ధం చేసినప్పుడు+ నేను ఉన్నాను;జలాల ఉపరితలం మీద ఆయన సరిహద్దు రేఖను* గీసినప్పుడు,+
28 పైన మేఘాల్ని స్థిరపర్చినప్పుడు,లోతైన సముద్రాల్ని నింపినప్పుడు,
29 సముద్రానికి సరిహద్దుల్ని పెట్టిదాని నీళ్లు ఆ హద్దుల్ని దాటకూడదని ఆయన ఆజ్ఞాపించినప్పుడు,+భూమి పునాదుల్ని స్థాపించినప్పుడు,
30 నేను ప్రధానశిల్పిగా* ఆయన పక్కనే ఉన్నాను.+
ఆయన ప్రతీరోజు నన్ను చూసి ఎంతో సంతోషించేవాడు;+నేను ఎప్పుడూ ఆయన ముందు సంతోషిస్తూ ఉండేవాణ్ణి.+
31 మనుషులు నివసించగలిగేలా ఆయన చేసిన భూమిని చూసి నేను సంతోషించాను,ముఖ్యంగా మనుషుల్ని* బట్టి నేను ఎంతో ఆనందించేవాణ్ణి.
32 కాబట్టి నా కుమారులారా, ఇప్పుడు నేను చెప్పేది వినండి;నా మార్గాల్లో నడిచేవాళ్లు సంతోషంగా ఉంటారు.
33 క్రమశిక్షణను స్వీకరించి+ తెలివిగలవాళ్లు అవ్వండి,దాన్ని ఎన్నడూ నిర్లక్ష్యం చేయకండి.
34 ప్రతీరోజు తెల్లవారుజామునే నా గడప దగ్గరికి వస్తూ,నా గుమ్మం దగ్గర కనిపెట్టుకొనివుంటూ,నా మాటలు వినేవాళ్లు సంతోషంగా ఉంటారు;
35 ఎందుకంటే, నన్ను కనుగొన్నవాళ్లు జీవాన్ని కనుగొంటారు,+యెహోవా ఆమోదం పొందుతారు.
36 నన్ను పట్టించుకోనివాళ్లు తమకు తామే హాని చేసుకుంటారు,నన్ను ద్వేషించేవాళ్లు మరణాన్ని ప్రేమిస్తున్నారు.”+
అధస్సూచీలు
^ లేదా “యుక్తి.”
^ లేదా “యుక్తితో.”
^ లేదా “వారసత్వ విలువలు.”
^ లేదా “అనాదికాలంలో.”
^ లేదా “పురిటినొప్పులతో కన్నట్టు నేను కలగజేయబడ్డాను.”
^ అక్ష., “వృత్తాన్ని.”
^ లేదా “నైపుణ్యంగల పనివానిగా.”
^ లేదా “మానవజాతిని.”
