యెహోషువ 22:1-34

  • తూర్పున ఉన్న గోత్రాలు ఇంటికి తిరిగొచ్చాయి (1-8)

  • యొర్దాను దగ్గర బలిపీఠం కట్టడం (9-12)

  • బలిపీఠం ఎందుకు కట్టారో వివరించడం (13-29)

  • తగాదా పరిష్కరించబడడం (30-34)

22  తర్వాత యెహోషువ రూబేనీయుల్ని, గాదీయుల్ని, మనష్షే అర్ధగోత్రం వాళ్లను పిలిపించి,  వాళ్లతో ఇలా అన్నాడు: “యెహోవా సేవకుడైన మోషే మీకు ఆజ్ఞాపించినవన్నీ మీరు చేశారు,+ నేను మీకు ఆజ్ఞాపించిన వాటన్నిటికీ మీరు లోబడ్డారు.+  ఈ రోజు వరకు మీరు ఏనాడూ మీ సహోదరుల్ని విడిచి​పెట్టలేదు;+ మీ దేవుడైన యెహోవా ఆజ్ఞను మీరు పాటించారు.+  మీ దేవుడైన యెహోవా మీ సహోదరులకు వాగ్దానం చేసినట్టే, ఇప్పుడు వాళ్లకు ఆయన విశ్రాంతి ఇచ్చాడు. కాబట్టి ఇప్పుడు మీరు యెహోవా సేవకుడైన మోషే యొర్దాను అవతలి వైపున* మీకు ఆస్తిగా ఇచ్చిన+ ప్రాంతంలోని మీ ఇళ్లకు తిరిగెళ్లిపోవచ్చు.  అయితే మీరు మీ దేవుడైన యెహోవాను ప్రేమిస్తూ,+ ఆయన మార్గాలన్నిట్లో నడుస్తూ,+ ఆయన ఆజ్ఞల్ని పాటిస్తూ,+ ఆయన్ని హత్తుకొని ఉంటూ,+ మీ నిండు హృదయంతో, మీ నిండు ప్రాణంతో*+ ఆయన్ని సేవిస్తూ+ యెహోవా సేవకుడైన మోషే మీకు ఇచ్చిన ఆజ్ఞను, ధర్మశాస్త్రాన్ని పాటించే విషయంలో చాలా జాగ్రత్తగా ఉండండి.”+  తర్వాత యెహోషువ వాళ్లను ఆశీర్వదించి పంపించేశాడు, వాళ్లు తమ ఇళ్లకు వెళ్లిపోయారు.  మనష్షే అర్ధగోత్రానికి మోషే బాషానులో స్వాస్థ్యాన్ని ఇచ్చాడు; మిగతా అర్ధగోత్రానికి యెహోషువ వాళ్ల సహోదరులతోపాటు యొర్దానుకు పడమటి వైపున భూమిని ఇచ్చాడు.+ అంతేకాదు, వాళ్లను తమ ఇళ్లకు పంపిస్తున్నప్పుడు యెహోషువ వాళ్లను ఆశీర్వదించి,  వాళ్లతో ఇలా అన్నాడు: “అనేక సంపదలతో, విస్తారమైన పశువులతో, వెండి-బంగారంతో, రాగి-ఇనుముతో, లెక్కలేనన్ని బట్టలతో మీ ఇళ్లకు తిరిగెళ్లండి.+ మీ శత్రువుల దగ్గర దోచుకున్న సొమ్మును తీసుకెళ్లి మీ ​సహోదరులతో పంచుకోండి.”+  తర్వాత ​రూబేనీయులు, గాదీ​యులు, మనష్షే అర్ధగోత్రం వాళ్లు మిగతా ఇశ్రాయేలీయుల దగ్గర నుండి బయల్దేరారు; వాళ్లు కనాను ​దేశంలోని షిలోహు నుండి గిలాదు ప్రాంతా​నికి,+ అంటే యెహోవా మోషే ద్వారా ఆదేశిం​చిన ప్రకారం తాము ​స్థిరపడిన తమ స్వాస్థ్యానికి తిరిగొచ్చారు.+ 10  రూబేనీయులు, గాదీయులు, మనష్షే ​అర్ధగోత్రం వాళ్లు కనాను దేశంలోని యొర్దాను దగ్గ​రికి వచ్చినప్పుడు, వాళ్లు అక్కడ ఒక గొప్ప బలి​పీఠాన్ని కట్టారు. 11  “చూడండి! కనాను దేశ ​సరిహద్దులో, ఇశ్రాయేలీయు​లకు చెందిన యొర్దాను పడమటి భాగంలో రూబేనీయులు, ​గాదీయులు, మనష్షే అర్ధగోత్రం వాళ్లు ఒక బలిపీఠం కట్టారు” అనే వార్తను మిగతా ఇశ్రాయేలీ​యులు విన్నారు.+ 12  ఇశ్రా​యేలీయులు దాని గురించి విన్నప్పుడు, వాళ్ల మీద యుద్ధం చేయడానికి ఇశ్రాయేలీయుల సమాజమంతా షిలోహు దగ్గర సమావేశమైంది.+ 13  అప్పుడు ఇశ్రాయేలీయులు గిలాదు ప్రాంతంలో ఉన్న రూబేనీయుల, గాదీయుల, మనష్షే అర్ధగోత్రం వాళ్ల దగ్గరికి యాజకుడైన ఎలియాజరు కుమారుడు ఫీనెహాసును+ ​పంపించారు, 14  అతనితోపాటు ఇశ్రాయేలు గోత్రాలన్నిట్లో ఒక్కో పూర్వీకుల కుటుంబం నుండి ఒక ప్రధానుడి చొప్పున పదిమంది ప్రధానుల్ని ​పంపించారు. వాళ్లందరూ ఇశ్రాయేలు వేలమందిలో తమతమ పూర్వీకుల కుటుంబాలకు పెద్దలు.+ 15  వాళ్లు గిలాదు ప్రాంతంలో ఉన్న రూబేనీయుల, గాదీయుల, మనష్షే ​అర్ధగోత్రం వాళ్ల దగ్గరికి వచ్చి వాళ్లతో ఇలా అన్నారు: 16  “యెహోవా సమాజమంతా చెప్పేదేమిటంటే: ‘మీరు ఇశ్రాయేలు ​దేవునికి ఎందుకు నమ్మకద్రోహం చేశారు?+ మీరు ఒక బలి​పీఠాన్ని కట్టుకొని, యెహోవాకు వ్యతిరేకంగా తిరుగుబాటు చేయడం ద్వారా ఈ రోజు మీరు యెహో​వాను అనుసరించడం మానేశారు.+ 17  పెయోరు దగ్గర మనం చేసిన తప్పు చాలదా? యెహోవా సమాజం మీదికి వచ్చిన తెగులును మీరు మర్చిపోయారా?+ ఆ పాపపు ఫలితాల్ని మనం ఇప్పటికీ అనుభవిస్తున్నాం. 18  మీరు ఇప్పుడు యెహోవాను అనుసరించడం మానేయాలనుకుంటున్నారా? ఈ రోజు మీరు యెహోవాకు వ్యతిరేకంగా తిరుగుబాటు చేస్తే, రేపు ఇశ్రాయేలు సమాజమంతటి మీద ఆయనకు ఆగ్రహం వస్తుంది.+ 19  ఒకవేళ మీరు నివసిస్తున్న ప్రాంతం అపవిత్రమైనదైతే, యెహోవా గుడారం ఉన్న+ యెహోవా ప్రాంతానికి+ వచ్చి మా మధ్య స్థిరపడండి. అంతేకానీ యెహోవాకు వ్యతిరేకంగా తిరుగుబాటు చేయకండి. మన దేవుడైన యెహోవా బలిపీఠానికి పోటీగా మీరు ఒక బలిపీఠాన్ని కట్టుకొని మమ్మల్ని తిరుగుబాటుదారులుగా చేయకండి.+ 20  నాశనం చేయబడాల్సినవాటి విషయంలో జెరహు కుమారుడైన ఆకాను+ నమ్మకద్రోహా​నికి పాల్పడినప్పుడు, ఇశ్రాయేలు సమాజమంతటి మీదికి దేవుని ఆగ్రహం రాలేదా?+ అతను చేసిన తప్పుకు చనిపోయింది అతను ఒక్కడే కాదు.’ ”+ 21  అప్పుడు రూబేనీయులు, గాదీయులు, మనష్షే అర్ధగోత్రం వాళ్లు ఇశ్రాయేలు వేలమం​దిలో పెద్దలైనవాళ్లతో+ ఇలా అన్నారు: 22  “దేవాది దేవుడైన యెహోవా! దేవాది ​దేవుడైన యెహోవా!+ మేము ఎందుకు అలా చేశామో ఆయనకు తెలుసు, ఇశ్రాయేలీయు​లకు కూడా తెలుస్తుంది. మేము తిరుగుబాటుచేసి యెహో​వాకు నమ్మకద్రోహం చేసివుంటే, ఈ రోజు మమ్మల్ని బ్రతకనివ్వ​కండి. 23  యెహోవాను అనుసరించడం మానేసి ఆ బలిపీఠం మీద దహనబలులు, ధాన్యార్పణలు, సమాధాన బలులు ​అర్పించడానికి మేము దాన్ని కట్టివుంటే, యెహోవా మమ్మల్ని శిక్షి​స్తాడు.+ 24  కానీ మేము వేరే ​కారణంతో, అంటే భవిష్యత్తులో మీ పిల్లలు మా పిల్లలతో ఇలా అంటారేమో అనే భయంతోనే ఈ పని చేశాం: “ఇశ్రాయేలు దేవుడైన యెహో​వాతో మీకు ​సంబంధమేమిటి? 25  రూబేనీయులారా, గాదీయులారా, మీకూ మాకూ మధ్య యెహోవా యొర్దానును సరిహ​ద్దుగా ఉంచాడు. మీకు యెహోవాలో వంతు లేదు.” అలా మీ పిల్లలు మా పిల్లల్ని యెహోవాను ఆరాధించకుండా* అడ్డుకుంటారేమో. 26  “అందుకే మేము ఇలా ​చెప్పుకున్నాం, ‘మనం ఒక బలిపీఠాన్ని ​కట్టుకుందాం. అయితే అది దహనబలుల కోసమో బలుల కోసమో కాదుగానీ, 27  మా దహన​బలులతో, బలులతో, సమాధాన ​బలులతో+ యెహోవాను సేవిస్తామని మీకూ మాకూ మధ్య, అలాగే మన తర్వాత వచ్చే మన వంశ​స్థులకూ* మధ్య ఒక సాక్షిగా ఉండడానికి.+ అప్పుడు, భవిష్యత్తులో మీ పిల్లలు మా పిల్లలతో, “మీకు ​యెహోవాలో వంతు లేదు” అని అనకుండా ఉంటారు.’ 28  అందుకే మేము ఇలా అనుకున్నాం, ‘భవిష్యత్తులో వాళ్లు మాతో, మా వంశస్థులతో అలా అంటే, మేము ఈ విధంగా చెప్తాం: “యెహోవా బలిపీఠం లాంటి ఈ ​బలిపీఠాన్ని చూడండి. దీన్ని మా పూర్వీకులు కట్టారు. వాళ్లు దాన్ని దహనబలుల కోసమో, బలుల కోసమో కాదుగానీ మీకూ మాకూ మధ్య సాక్షిగా ఉండడానికి కట్టారు.” ’ 29  మన ​దేవుడైన యెహోవా గుడారం ఎదుట ఉన్న ఆయన ​బలిపీఠానికి బదులుగా దహనబలులు, ధాన్యార్పణలు, బలుల కోసం వేరే బలి​పీఠాన్ని కట్టి+ యెహోవాకు వ్యతిరేకంగా తిరుగుబాటు చేయడం, నేడు యెహోవాను అనుసరించడాన్ని మానేయడం+ మా ఊహకందని విషయం!” 30  రూబేను, గాదు, మనష్షే వంశస్థులు చెప్పిన మాటల్ని యాజకుడైన ఫీనెహాసు, సమాజ ​ప్రధానులు, అతనితో ఉన్న ఇశ్రాయేలు వేలమందిలో పెద్దలైనవాళ్లు విన్నప్పుడు వాళ్లు సంతృప్తిపడ్డారు.+ 31  అప్పుడు యాజకుడైన ఎలియాజరు కుమారుడు ఫీనెహాసు రూబేను, గాదు, మనష్షే వంశస్థులతో ఇలా అన్నాడు: “యెహోవా మన మధ్య ఉన్నాడని ఈ రోజు మాకు తెలిసింది, ఎందుకంటే మీరు యెహోవాకు వ్యతిరేకంగా తిరుగుబాటు చేయలేదు. ఇప్పుడు మీరు యెహోవా చేతిలో నుండి ఇశ్రాయేలీ​యుల్ని రక్షించారు.” 32  ఆ తర్వాత, యాజకుడైన ఎలియాజరు కుమారుడు ఫీనెహాసు, ప్రధానులు గిలాదు ప్రాంతంలో ఉన్న రూబేనీయుల, గాదీయుల దగ్గర నుండి కనాను దేశానికి తిరిగొచ్చి, వాళ్లు చెప్పిన మాటల్ని మిగతా ఇశ్రాయేలీయులకు తెలియజేశారు. 33  అది విని ఇశ్రాయేలీయులు సంతృ​ప్తిపడ్డారు. తర్వాత వాళ్లు దేవుణ్ణి స్తుతించారు. రూబేనీయులు, ​గాదీయులు ఉంటున్న ప్రాంతాన్ని నాశనం చేసేందుకు వాళ్ల మీదికి యుద్ధానికి వెళ్లడం గురించి వాళ్లు ఇంకేమీ ​మాట్లాడలేదు. 34  కాబట్టి రూబేనీయులు, గాదీయులు ఆ బలిపీఠానికి పేరు పెట్టి,* “యెహోవాయే సత్య​దేవుడు అని చెప్పడానికి ఇది మన మధ్య సాక్షి” అని అన్నారు.

అధస్సూచీలు

అంటే, తూర్పు వైపున.
పదకోశం చూడండి.
అక్ష., “భయపడకుండా.”
అక్ష., “తరాలకూ.”
సందర్భాన్ని బట్టి చూస్తే, ఆ బలిపీఠానికి “సాక్షి” అని పేరు పెట్టివుంటారు.