యెహోషువ 18:1-28

  • మిగతా దేశాన్ని షిలోహులో పంచి ఇవ్వడం (1-10)

  • బెన్యామీను గోత్రానికి వచ్చిన భూమి (11-28)

18  అప్పుడు ఇశ్రాయేలీయుల సమాజమంతా షిలోహు+ దగ్గర సమావేశమైంది, అక్కడ వాళ్లు ప్రత్యక్ష గుడారాన్ని+ నిలబెట్టారు. ఎందుకంటే అప్పటికే వాళ్లు దేశాన్ని స్వాధీనం చేసుకున్నారు.+  అయితే ఇశ్రాయేలీయుల ఏడు గోత్రాలకు ఇంకా భూమి కేటాయించబడలేదు.  కాబట్టి యెహోషువ ఇశ్రాయేలీయులతో ఇలా అన్నాడు: “మీరు ఇంకా ఎంతకాలం వాయిదా వేస్తారు? మీ పూర్వీకుల దేవుడైన యెహోవా మీకు ఇచ్చిన దేశాన్ని మీరు ఎప్పుడు వెళ్లి స్వాధీనం చేసుకుంటారు?+  ప్రతీ గోత్రం నుండి ముగ్గుర్ని నాకు ఇవ్వండి, నేను వాళ్లను పంపిస్తాను; వాళ్లు వెళ్లి దేశమంతా నడిచి తమకు వారసత్వంగా రావాల్సిన ప్రాంతాల ప్రకారం దాని వివరాలు రాయాలి. తర్వాత వాళ్లు నా దగ్గరికి తిరిగిరావాలి.  వాళ్లు దాన్ని ఏడు భాగాలుగా విభజించుకోవాలి.+ యూదావాళ్లు దక్షిణం వైపు తమ ​భూభాగంలోనే ఉంటారు, యోసేపు కుటుంబంవాళ్లు ఉత్తరం వైపు తమ భూభాగంలోనే ఉంటారు.  మీరు దేశాన్ని ఏడు భాగాలుగా విభజించి, ఆ వివరాలు రాసి ఇక్కడ నా ​దగ్గరికి తీసుకురండి, నేను మన దేవుడైన యెహోవా ముందు మీ కోసం చీట్లు వేస్తాను.+  అయితే లేవీయులకు మీ మధ్య వంతు ఉండదు.+ ఎందుకంటే యెహోవాకు యాజకులుగా సేవచేయడమే వాళ్ల ఆస్తి;+ గాదు, రూబేను, మనష్షే అర్ధగోత్రానికి+ యెహోవా సేవకుడైన మోషే యొర్దాను తూర్పు వైపున వారసత్వంగా ఇచ్చిన భూమిని వాళ్లు ఇప్పటికే తీసుకున్నారు.”  అప్పుడు ఆ మనుషులు వెళ్లడానికి సిద్ధమయ్యారు. దేశం వివరాలు రాయడానికి వెళ్తున్నవాళ్లకు యెహోషువ ఇలా ఆజ్ఞాపించాడు: “మీరు వెళ్లి దేశమంతటా నడుస్తూ దాని వివరాలు రాసుకొని నా దగ్గరికి రండి, నేను ఇక్కడ షిలోహులో+ యెహోవా ముందు మీ కోసం చీట్లు వేస్తాను.”  దాంతో ఆ మనుషులు వెళ్లి దేశమంతటా ప్రయాణం చేస్తూ, నగరాల ప్రకారం దాన్ని ఏడు భాగాలుగా చేసి ఆ వివరాల్ని పుస్తకంలో రాశారు. ఆ తర్వాత వాళ్లు షిలోహులోని పాలెంలో ఉన్న యెహోషువ దగ్గరికి వచ్చారు. 10  అప్పుడు యెహోషువ షిలోహులో యెహోవా ముందు వాళ్ల కోసం చీట్లు వేశాడు. అక్కడ యెహోషువ వాళ్లవాళ్ల వాటాల ప్రకారం ఇశ్రాయేలీయులకు దేశాన్ని పంచి ఇచ్చాడు.+ 11  మొదటి చీటి వాళ్లవాళ్ల కుటుంబాల ప్రకారం బెన్యామీను గోత్రానికి వచ్చింది. యూదా ప్రజలకు,+ యోసేపు ప్రజలకు+ మధ్య ఉన్న భూభాగం చీటి ద్వారా వాళ్లకు వచ్చింది. 12  వాళ్ల ఉత్తర సరిహద్దు యొర్దాను దగ్గర ప్రారంభమై, యెరికో+ ఉత్తర ఏటవాలు ప్రాంతం మీదుగా పడమటి వైపున్న పర్వతం వైపు వ్యాపించి, బేతావెను+ ఎడారి వరకు విస్తరించింది. 13  అది అక్కడి నుండి లూజు నగరం వరకు, అంటే బేతేలు+ వరకు వెళ్లింది. అది లూజు దక్షిణ ఏటవాలు ప్రాంతం మీదుగా సాగి, అక్కడి నుండి కిందికి, దిగువ బేత్‌-హోరోనుకు+ దక్షిణం వైపు పర్వతం మీదున్న అతారోతు-అద్దారు వరకు వ్యాపించింది. 14  ఆ సరిహద్దు, బేత్‌-హోరోనుకు ఎదురుగా ఉన్న పర్వతం దగ్గర దక్షిణం వైపుకు తిరిగింది; అది కిర్యత్బయలు లేదా కిర్యత్యారీము అనే యూదా నగరం దగ్గర ఆగిపోయింది. అది పడమటి సరిహద్దు. 15  దక్షిణం వైపు సరిహద్దు కిర్యత్యారీము చిట్టచివరి నుండి మొదలై పడమటి వైపు విస్తరించింది; అది నెఫ్తోయ నీళ్ల ఊట వరకు వెళ్లింది. 16  అది అక్కడి నుండి కిందికి బెన్‌హిన్నోము* లోయ+ ఎదురుగా ఉన్న పర్వతం అడుగుభాగం వరకు వెళ్లింది; ఆ పర్వతం రెఫాయీము+ లోయలో ఉత్తరం వైపు ఉంది. సరిహద్దు అక్కడి నుండి కిందికి హిన్నోము లోయ వరకు, దక్షిణాన ఉన్న యెబూసీయుల ఏటవాలు ప్రాంతం వరకు విస్తరించి, కిందికి ఏన్రోగేలుకు+ వెళ్లింది. 17  అది ఉత్తరం వైపు తిరిగి ఏన్షెమెషు వైపు ​విస్తరించి, అక్కడి నుండి ​అదుమ్మీముకు ఎక్కే మార్గానికి ఎదురుగా ఉన్న గెలీలోతు వరకు వెళ్లి, తర్వాత కిందికి రూబేను కుమారుడైన బోహను రాయి+ వరకు వెళ్లింది. 18  అది అరాబాకు ఎదురుగా ఉన్న ఉత్తర ఏటవాలు ప్రాంతం వైపుగా కొనసాగి, అక్కడి నుండి కిందికి అరాబాకు వెళ్లింది. 19  ఆ సరిహద్దు బేత్‌-హోగ్లా ఉత్తర ఏటవాలు ప్రాంతానికి వెళ్లి, ​యొర్దానుకు దక్షిణాన ఉన్న ఉప్పు సముద్రం* ఉత్తర తీరం దగ్గర ఆగిపోయింది. ఇది దక్షిణ ​సరిహద్దు. 20  వాళ్ల తూర్పు సరిహద్దు యొర్దాను. వాళ్లవాళ్ల కుటుంబాల చొప్పున, ​అన్నివైపుల ఉన్న ​సరిహద్దుల ప్రకారం బెన్యామీను వంశస్థులకు వారసత్వంగా వచ్చిన భూమి ఇది. 21  వాళ్లవాళ్ల కుటుంబాల ప్రకారం బెన్యామీను గోత్రంవాళ్ల నగరాలు ఇవి: యెరికో, బేత్‌-హోగ్లా, యెమెక్కెసీసు, 22  బేతరాబా, సెమరాయిము, బేతేలు,+ 23  ఆవీం, పారా, ఒఫ్రా, 24  కెపరమ్మోని, ఒప్ని, గెబా;+ మొత్తం 12 నగరాలు, వాటి పల్లెలు. 25  గిబియోను,+ రామా, బెయేరోతు, 26  మిస్పే, కెఫీరా, మోసా, 27  రేకెము, ఇర్పెయేలు, తరలా, 28  సేలా,+ ఎలెపు, యెబూసు, అంటే యెరూషలేము,+ గిబియా,+ కిర్యతు; మొత్తం 14 నగరాలు, వాటి పల్లెలు. వాళ్లవాళ్ల కుటుంబాల ప్రకారం బెన్యామీను వంశస్థులకు వారసత్వంగా వచ్చిన భూమి ఇది.

అధస్సూచీలు

అక్ష., “హిన్నోము కుమారుడి.”
అంటే, మృత సముద్రం.