యెషయా 52:1-15
52 సీయోనూ! లే!+ లేచి, బలాన్ని+ వస్త్రంలా తొడుక్కో!
పవిత్ర నగరమైన యెరూషలేమా, నీ అందమైన వస్త్రాలు వేసుకో!+
ఎందుకంటే, ఇక మీదట సున్నతిలేని వాళ్లెవ్వరూ, అపవిత్రులెవ్వరూ నీలో ప్రవేశించరు.+
2 యెరూషలేమా, నీ మీదున్న దుమ్ము దులిపేసుకొని, లేచి పైన కూర్చో.
బందీగా ఉన్న సీయోను కూతురా, నీ మెడకు ఉన్న కట్లు విప్పేసుకో.+
3 ఎందుకంటే యెహోవా ఇలా అంటున్నాడు:
“నువ్వు డబ్బులకు కాకుండా ఊరికే అమ్మబడ్డావు,+డబ్బులు చెల్లించకుండానే నువ్వు తిరిగి కొనబడతావు.”+
4 సర్వోన్నత ప్రభువైన యెహోవా ఇలా అంటున్నాడు:
“మొదట్లో నా ప్రజలు పరదేశులుగా నివసించడానికి ఐగుప్తుకు వెళ్లారు;+తర్వాత అష్షూరు ఏ కారణం లేకుండానే వాళ్లను అణచివేసింది.”
5 “అలాంటప్పుడు నేనిక్కడ ఏంచేయాలి?” అని యెహోవా అంటున్నాడు.
“ఎందుకంటే, నా ప్రజల్ని ఊరికే తీసుకెళ్లిపోయారు.
వాళ్లమీద ఏలేవాళ్లు విజయగర్వంతో కేకలు వేస్తూ ఉన్నారు”+ అని యెహోవా అంటున్నాడు.“వాళ్లు రోజంతా అదేపనిగా నా పేరును అవమానిస్తున్నారు.+
6 అందుకే నా ప్రజలు నా పేరు తెలుసుకుంటారు;+మాట్లాడుతున్నది నేనే అని ఆ రోజు వాళ్లు తెలుసుకుంటారు.
ఇదిగో, అది నేనే!”
7 మంచివార్తను తెస్తూ,శాంతిని ప్రకటిస్తూ,+మేలైన విషయాల గురించిన మంచివార్తను తెస్తూ,రక్షణను చాటిస్తూ,“నీ దేవుడు రాజయ్యాడు!”+ అని సీయోనుతో చెప్పేవాళ్ల పాదాలు
పర్వతాల మీద ఎంత అందంగా ఉన్నాయి!+
8 విను! నీ కావలివాళ్లు గొంతెత్తి అరుస్తున్నారు.
వాళ్లంతా ఏకస్వరంతో సంతోషంగా కేకలు వేస్తున్నారు,ఎందుకంటే యెహోవా సీయోనును తిరిగి సమకూర్చినప్పుడు వాళ్లు దాన్ని స్పష్టంగా* చూస్తారు.
9 యెరూషలేము శిథిలాల్లారా,+ సంతోషించండి, ఆనందంగా ముక్తకంఠంతో కేకలు వేయండి,ఎందుకంటే యెహోవా తన ప్రజల్ని ఓదార్చాడు;+ ఆయన యెరూషలేమును తిరిగి కొన్నాడు.+
10 దేశాలన్నిటి కళ్లముందు యెహోవా తన పవిత్రమైన బాహువును వెల్లడిచేశాడు;+భూమి కొనల్లో ఉన్నవాళ్లంతా మన దేవుని రక్షణకార్యాల్ని* చూస్తారు.+
11 వెళ్లండి, వెళ్లండి, అక్కడి నుండి వెళ్లిపోండి,+ అపవిత్రమైన దేన్నీ ముట్టుకోకండి!+
యెహోవా మందిర పాత్రల్ని మోస్తున్న వాళ్లారా,+దాని మధ్య నుండి వెళ్లిపోండి,+ మిమ్మల్ని మీరు పవిత్రంగా ఉంచుకోండి.
12 మీరు కంగారుకంగారుగా బయల్దేరరు,పారిపోవాల్సిన అవసరం కూడా మీకు రాదు,ఎందుకంటే యెహోవాయే మీ ముందు నడుస్తాడు,ఇశ్రాయేలు దేవుడే మీ వెనక కాపలాగా ఉంటాడు.
13 ఇదిగో! నా సేవకుడు+ లోతైన అవగాహనతో పనిచేస్తాడు.
ఆయన చాలా పైకి ఎత్తబడతాడు,ఆయన ఉన్నతపర్చబడతాడు, గొప్పగా హెచ్చించబడతాడు.+
14 ఆయన ఆకారం ఏ మనిషి ఆకారం కన్నా వికృతంగా,ఆయన రూపం ఏ మనిషి రూపం కన్నా వికారంగా మారడం చూసిఎలాగైతే చాలామంది ఆశ్చర్యంతో ఆయన్ని చూస్తూ ఉండిపోయారో,
15 అలాగే ఆయన చాలా దేశాల్ని నిర్ఘాంతపోయేలా చేస్తాడు.
రాజులు ఆయన ముందు నోరు మూసుకుంటారు;*+ఎందుకంటే, వాళ్లు తమకు చెప్పబడని వాటిని చూస్తారు,తాము వినని వాటి గురించి ఆలోచిస్తారు.+
