యెషయా 24:1-23
24 ఇదిగో! యెహోవా దేశాన్ని* ఖాళీ చేయించి దాన్ని నిర్జనం చేస్తున్నాడు.+
ఆయన దాన్ని తలకిందులు చేసి,+ దాని నివాసుల్ని చెదరగొడతాడు.+
2 అందరి పరిస్థితి ఒకేలా ఉంటుంది:
ప్రజలకు, యాజకుడికి,దాసుడికి, యజమానికి,దాసురాలికి, యజమానురాలికి,అమ్మేవాడికి, కొనేవాడికి,అప్పు ఇచ్చేవాడికి, అప్పు తీసుకునేవాడికి,వడ్డీ తీసుకునేవాడికి, వడ్డీ కట్టేవాడికి అందరికీ ఒకేలా జరుగుతుంది.+
3 దేశం పూర్తిగా ఖాళీ చేయబడుతుంది;అది పూర్తిగా దోచుకోబడుతుంది,+ఎందుకంటే యెహోవా ఈ మాట చెప్పాడు.
4 దేశం శోకిస్తోంది;*+ అది పాడైపోతోంది.
పండే భూమి బీడుబారిపోతోంది; అది వాడిపోతోంది.
దేశంలోని ప్రముఖులు కృశించిపోతున్నారు.
5 నివాసులు దేశాన్ని కలుషితం చేశారు,+వాళ్లు ఆజ్ఞలు మీరారు,+నియమాలు మార్చారు,+శాశ్వతమైన* ఒప్పందానికి*+ కట్టుబడి ఉండలేదు.
6 అందుకే శాపం దేశాన్ని మింగేస్తోంది,+దాని నివాసులు దోషులుగా ఎంచబడుతున్నారు.
దానివల్లే దేశ నివాసుల సంఖ్య తగ్గిపోయింది,చాలా కొద్దిమందే మిగిలారు.+
7 కొత్త ద్రాక్షారసం దుఃఖిస్తోంది,* ద్రాక్షవల్లి వాడిపోతోంది,+హృదయం సంతోషంగా ఉన్నవాళ్లంతా నిట్టూరుస్తున్నారు.+
8 కంజీరల* సంతోషనాదం ఆగిపోయింది;ఉల్లసించేవాళ్ల శబ్దం ఇక వినబడడం లేదు;వీణల* సంతోషనాదం ఆగిపోయింది.+
9 వాళ్లు పాటలు లేకుండా ద్రాక్షారసం తాగుతున్నారు,మద్యం తాగేవాళ్లకు అది చేదుగా అనిపిస్తోంది.
10 నిర్జనమైన పట్టణం కూలగొట్టబడింది;+ఎవరూ ప్రవేశించకుండా ప్రతీ ఇంటి తలుపు మూసేయబడింది.
11 వాళ్లు ద్రాక్షారసం కోసం వీధుల్లో కేకలు వేస్తున్నారు.
సంతోషమంతా కనుమరుగైపోయింది;దేశంలోని ఆనందమంతా ఆవిరైపోయింది.+
12 నగరం శిథిలమైపోయింది;నగర ద్వారం రాళ్లకుప్పగా మారింది.+
13 జనాల మధ్య దేశం పరిస్థితి
ఒలీవ చెట్టునుండి పండ్లను రాలగొట్టినప్పటిలా,+ద్రాక్షల కోత ముగిసి పరిగె ఏరుకునేటప్పటిలా ఉంటుంది.+
14 వాళ్లు తమ గొంతెత్తిసంతోషంతో కేకలు వేస్తారు.
పడమటి* నుండి వాళ్లు యెహోవా గొప్పతనాన్ని చాటిస్తారు.+
15 అందుకే వాళ్లు తూర్పు* ప్రాంతంలో+ యెహోవాను మహిమపరుస్తారు;సముద్ర ద్వీపాల్లో, ఇశ్రాయేలు దేవుడైన యెహోవా పేరును మహిమపరుస్తారు.+
16 భూమి అంచుల నుండి ఇలా పాటలు వినబడుతున్నాయి:
“నీతిమంతుడైన దేవునికి+ మహిమ* కలగాలి!”
కానీ నేనిలా అన్నాను: “నేను క్షీణించిపోతున్నాను, క్షీణించిపోతున్నాను!
అయ్యో, నాకు శ్రమ! మోసగాళ్లు మోసపూరితంగా ప్రవర్తించారు;వాళ్లు మోసంతో మోసపూరితంగా ప్రవర్తించారు.”+
17 దేశ నివాసీ! నీ కోసం విపరీతమైన భయం, గోతులు, ఉచ్చులు వేచివున్నాయి.+
18 భయం పుట్టించే శబ్దం విని పారిపోతున్న వ్యక్తి గోతిలో పడతాడు,గోతిలో నుండి పైకి వచ్చే వ్యక్తి ఉచ్చులో చిక్కుకుంటాడు.+
ఆకాశ తూములు* తెరవబడతాయి,నేల పునాదులు కంపిస్తాయి.
19 భూమి బద్దలైపోయింది;అది కుదిపేయబడింది;అది విపరీతంగా కంపిస్తోంది.+
20 బాగా తాగిన వ్యక్తిలా భూమి తూలుతోంది,గాలికి గుడిసె ఊగినట్టు అది అటూఇటూ ఊగుతోంది.
దాని పాపం దాని మీద చాలా బరువుగా ఉంది,+అది మళ్లీ లేవడం వీలుకాని విధంగా పడిపోతుంది.
21 ఆ రోజు యెహోవా, పైనున్న స్థలాల్లోని సైన్యం మీదికి,కిందున్న భూరాజుల మీదికి తన దృష్టిని మళ్లిస్తాడు.
22 ఖైదీలను గుంటలోకి సమకూర్చినట్టు,వాళ్లను సమకూర్చి,చెరసాలలో వేసి, దాన్ని మూసేస్తారు;చాలా రోజుల తర్వాత ఆయన వాళ్లమీదికి తన దృష్టిని మళ్లిస్తాడు.
23 నిండు చంద్రుడు చీకటి అవుతాడు,ప్రకాశించే సూర్యుడు వెలవెలబోతాడు,+ఎందుకంటే సైన్యాలకు అధిపతైన యెహోవా సీయోను పర్వతం+ మీద, యెరూషలేములో రాజయ్యాడు;+ఆయన తన ప్రజల పెద్దల* ముందు మహిమతో పరిపాలిస్తాడు.+
అధస్సూచీలు
^ లేదా “భూమిని.”
^ లేదా “ఎండిపోతోంది” అయ్యుంటుంది.
^ లేదా “పురాతన.”
^ లేదా “నిబంధనకు.”
^ లేదా “ఎండిపోతోంది” అయ్యుంటుంది.
^ అంటే, గిలకల తప్పెట.
^ ఇది ప్రాచీనకాల తంతివాద్యం; ఇప్పటి వీణలాంటిది కాదు.
^ అక్ష., “సముద్రం.”
^ అక్ష., “వెలుగు.”
^ లేదా “అలంకారం.”
^ లేదా “ప్రవాహ ద్వారాలు.”
^ అక్ష., “తన పెద్దల.”
