యాకోబు రాసిన ఉత్తరం 2:1-26
2 నా సహోదరులారా, మీరు పక్షపాతం చూపిస్తే,+ మహిమగల మన ప్రభువైన యేసుక్రీస్తు మీద మీకు విశ్వాసం ఉన్నట్టేనా?
2 ఎందుకంటే, బంగారు ఉంగరాలు పెట్టుకొని ఖరీదైన బట్టలు వేసుకున్న ఒకతను, అలాగే మురికి బట్టలు వేసుకున్న పేదవాడు మీ కూటాలకు వస్తే,
3 మీరు ఖరీదైన బట్టలు వేసుకున్న వ్యక్తి మీద ప్రత్యేక అభిమానం చూపిస్తూ, “ఇది మంచి చోటు, ఇక్కడ కూర్చోండి” అని చెప్పి, పేదవాడితోనేమో, “నువ్వు నిలబడే ఉండు” లేదా “నా కాళ్ల దగ్గర కింద కూర్చో” అని అంటారా?+
4 అలాచేస్తే, మీ మధ్య ఎక్కువ-తక్కువ అనే భేదాలు ఉన్నట్టే కదా?+ మీరు తప్పుడు తీర్పులు తీర్చే న్యాయమూర్తులుగా ఉన్నట్టే కదా?+
5 ప్రియ సహోదరులారా, వినండి. లోకం దృష్టిలో పేదవాళ్లు విశ్వాసంలో ధనవంతులూ+ రాజ్యానికి వారసులూ అయ్యేలా దేవుడు వాళ్లను ఎంచుకోలేదా? ఆయన ఆ రాజ్యాన్ని తనను ప్రేమించేవాళ్లకు ఇస్తానని వాగ్దానం చేశాడు.+
6 కానీ మీరు పేదవాళ్లను అవమానించారు. నిజానికి మిమ్మల్ని అణచివేసి, న్యాయస్థానాలకు ఈడ్చేది ధనవంతులు కాదా?+
7 మీకు ఇవ్వబడిన శ్రేష్ఠమైన పేరును అవమానించేది వాళ్లు కాదా?
8 అయితే, “నిన్ను నువ్వు ప్రేమించుకున్నట్టు నీ సాటిమనిషిని* ప్రేమించాలి” అని లేఖనాల్లో ఉన్న సర్వోన్నతమైన ఆజ్ఞను*+ మీరిప్పుడు పాటిస్తుంటే, మీరు చాలా చక్కగా ప్రవర్తిస్తున్నట్టే.
9 కానీ మీరు పక్షపాతం చూపిస్తూనే ఉంటే,+ మీరు పాపం చేస్తున్నారు, ధర్మశాస్త్రం మిమ్మల్ని దోషులుగా తీర్పు తీరుస్తుంది.*+
10 ఎవరైనా ధర్మశాస్త్రంలోని నియమాలన్నీ పాటిస్తూ, ఒక్క ఆజ్ఞ విషయంలో తప్పటడుగు వేస్తే, అతను మొత్తం ధర్మశాస్త్రాన్ని మీరినట్టే.+
11 ఎందుకంటే, “వ్యభిచారం చేయకూడదు” అని చెప్పిన దేవుడే+ “హత్య చేయకూడదు” అని కూడా చెప్పాడు.+ కాబట్టి మీరు వ్యభిచారం చేయకపోయినా, హత్య చేస్తే, మీరు ధర్మశాస్త్రాన్ని మీరినట్టే.
12 మీరు, స్వేచ్ఛను ఇచ్చే* నియమం+ ప్రకారం తీర్పు పొందబోయే ప్రజల్లా మాట్లాడుతూ, ప్రవర్తిస్తూ ఉండండి.
13 కరుణ చూపించని వ్యక్తి కరుణలేని తీర్పే పొందుతాడు.+ కరుణ తీర్పుపై విజయం సాధిస్తుంది.
14 నా సహోదరులారా, ఎవరైనా విశ్వాసం ఉందని చెప్పుకుంటూ దాన్ని చేతల్లో చూపించకపోతే ఏమి లాభం?+ అలాంటి విశ్వాసం అతన్ని రక్షించగలదా? లేదు కదా.+
15 సహోదరసహోదరీల్లో ఎవరైనా వేసుకోవడానికి బట్టలు లేకుండా, ఆ రోజు తినడానికి సరిపడా ఆహారం లేకుండా బాధపడుతుంటే,
16 మీలో ఒకరు, వాళ్ల శరీరానికి అవసరమైనవి ఇవ్వకుండా, “మనశ్శాంతితో వెళ్లండి; చలి కాచుకోండి, కడుపునిండా తినండి” అని అంటే ఏమి లాభం?+
17 అలాగే విశ్వాసాన్ని చేతల్లో చూపించకపోతే అది చనిపోయినట్టే.+
18 ఒకతను ఇలా అంటాడు: “నీకు విశ్వాసం ఉంది, నా దగ్గర చేతలు ఉన్నాయి. నువ్వు చేతలు లేకుండా నీ విశ్వాసాన్ని నాకు చూపించు, నేను నా చేతలతో నా విశ్వాసాన్ని నీకు చూపిస్తాను.”
19 దేవుడు ఒక్కడే అని నువ్వు నమ్ముతున్నావా? మంచిదే. చెడ్డదూతలు* కూడా నమ్ముతున్నారు, భయంతో వణుకుతున్నారు.+
20 కానీ మూర్ఖుడా, చేతల్లో చూపించని విశ్వాసం వ్యర్థమని తెలుసుకోవాలనే ఆలోచన నీకు ఉందా?
21 మన తండ్రి అబ్రాహాము తన కుమారుడు ఇస్సాకును బలిపీఠం మీద అర్పించినప్పుడు,+ తన చేతల వల్లే నీతిమంతుడని తీర్పు పొందాడు కదా?
22 అతని విశ్వాసం చేతల్లో కనిపించింది కాబట్టి అది సజీవంగా ఉందని స్పష్టమైంది, చేతల వల్ల ఆ విశ్వాసం పరిపూర్ణం చేయబడింది.+
23 అలా, “అబ్రాహాము యెహోవా* మీద విశ్వాసం ఉంచాడు, దానివల్ల దేవుడు అతన్ని నీతిమంతునిగా ఎంచాడు”* అనే లేఖనం నెరవేరింది.+ అంతేకాదు, అతనికి యెహోవా* స్నేహితుడు అనే పేరు వచ్చింది.+
24 మీరు చూస్తున్నారు కదా, కేవలం విశ్వాసం ఉండడం వల్ల కాదుగానీ, దాన్ని చేతల్లో చూపించినప్పుడే ఒక వ్యక్తి నీతిమంతుడని తీర్పు పొందుతాడు.
25 అలాగే రాహాబు అనే వేశ్య కూడా, గూఢచారుల్ని* తన ఇంట్లో చేర్చుకుని, వాళ్లను ఇంకో దారిలో పంపించేసినప్పుడు తన చేతల వల్ల నీతిమంతురాలని తీర్పు పొందింది.+
26 అవును, ప్రాణం* లేని శరీరంలాగే+ చేతలు లేని విశ్వాసం కూడా నిర్జీవమైనది.+
అధస్సూచీలు
^ లేదా “పొరుగువాణ్ణి.”
^ లేదా “రాజ శాసనాన్ని.”
^ లేదా “గద్దిస్తుంది.”
^ లేదా “స్వతంత్రుల.”
^ అనుబంధం A5 చూడండి.
^ లేదా “లెక్కించాడు.”
^ అనుబంధం A5 చూడండి.
^ అక్ష., “సందేశకుల్ని.”
^ లేదా “ఊపిరి.” పదకోశంలో “రూ-ఆహ్; న్యూమా” చూడండి.