మత్తయి సువార్త 9:1-38

  • యేసు పక్షవాతం ఉన్న వ్యక్తిని బాగు​చేయడం (1-8)

  • యేసు మత్తయిని పిలవడం (9-13)

  • ఉపవాసం గురించి ప్రశ్న (14-17)

  • యాయీరు కూతురు; యేసు పైవస్త్రాల్ని ఒక స్త్రీ ముట్టుకోవడం (18-26)

  • యేసు గుడ్డివాళ్లను, మూగవాళ్లను బాగుచేయడం (27-34)

  • పంట చాలా ఉంది కానీ పనివాళ్లు కొంతమందే ఉన్నారు (35-38)

9  యేసు పడవ ఎక్కి, సముద్రం అవతలి వైపున్న తన సొంత ఊరికి వచ్చాడు.+  అప్పుడు ఇదిగో! పక్షవాతం ఉన్న ఒకతన్ని కొంతమంది మంచం* మీద ఆయన దగ్గరికి తీసుకొస్తున్నారు. యేసు వాళ్ల విశ్వాసం చూసి, పక్షవాతం ఉన్న వ్యక్తితో, “బాబూ, ధైర్యంగా ఉండు! నీ పాపాలు క్షమించబడ్డాయి” అన్నాడు.+  అప్పుడు కొందరు శాస్త్రులు, “ఈయన దేవుణ్ణి దూషిస్తున్నాడు” అని తమలో తాము అనుకున్నారు.  యేసు వాళ్ల ఆలోచనల్ని పసిగట్టి ఇలా అన్నాడు: “మీరెందుకు ఇలా చెడుగా ఆలోచిస్తున్నారు?+  ‘నీ పాపాలు క్షమించబడ్డాయి’ అని చెప్పడం తేలికా? ‘లేచి, నడువు’ అని చెప్పడం తేలికా?+  అయితే, భూమ్మీద పాపాలు క్షమించే అధికారం మానవ కుమా​రునికి ఉందని మీరు తెలుసుకోవాలని ...” తర్వాత, ఆయన పక్షవాతం ఉన్న వ్యక్తితో, “లేచి, నీ మంచం తీసుకొని మీ ఇంటికి వెళ్లు” అన్నాడు.+  అతను లేచి తన ఇంటికి వెళ్లాడు.  జరిగింది చూసి ప్రజలు చాలా భయపడ్డారు; అంతేకాదు మనుషులకు ఇంత గొప్ప అధికారం ఇచ్చిన దేవుణ్ణి మహిమపర్చారు.  ఆ తర్వాత యేసు అక్కడి నుండి వెళ్తూ, పన్ను వసూలుచేసే కార్యాలయంలో కూర్చున్న మత్తయిని చూసి, “వచ్చి, నన్ను అనుసరించు” అన్నాడు. అప్పుడు అతను లేచి ఆయన్ని అనుసరించాడు.+ 10  తర్వాత యేసు అతని ఇంట్లో భోంచేస్తున్నప్పుడు చాలామంది పన్ను వసూలు​చేసే వాళ్లు, పాపులు అక్కడికి వచ్చి యేసుతో, ఆయన శిష్యులతో కలిసి భోంచేస్తున్నారు.+ 11  పరిసయ్యులు అది చూసి యేసు శిష్యులతో, “మీ బోధకుడు పన్ను వసూలుచేసే వాళ్లతో, పాపులతో కలిసి ఎందుకు భోంచేస్తున్నాడు?” అని అన్నారు.+ 12  యేసు వాళ్ల మాటలు విని ఇలా అన్నాడు: “ఆరోగ్యంగా ఉన్నవాళ్లకు వైద్యుడు అవసరంలేదు, రోగులకే అవసరం. 13  మీరు వెళ్లి, ‘నేను కరుణనే కోరుకుంటున్నాను కానీ బలిని కాదు’ అనే మాటకు అర్థం ఏంటో తెలుసుకోండి.+ నేను నీతిమంతుల్ని పిలవడానికి రాలేదు కానీ పాపుల్ని పిలవడానికే వచ్చాను.” 14  అప్పుడు యోహాను శిష్యులు యేసు దగ్గరికి వచ్చి, “మేము, పరిసయ్యులు ఉపవాసం ఉంటాం, మరి నీ శిష్యులు ఎందుకు ఉపవాసం ఉండరు?” అని అడిగారు.+ 15  అందుకు యేసు వాళ్లతో ఇలా అన్నాడు: “​పెళ్లికుమారుడు+ తమతో ఉన్నంతకాలం, అతని స్నేహితులు దుఃఖపడాల్సిన అవసరం ఉంటుందా? అయితే పెళ్లికుమారుణ్ణి వాళ్ల దగ్గర నుండి తీసుకెళ్లిపోయే రోజులు వస్తాయి,+ అప్పుడు వాళ్లు ​ఉపవాసం ఉంటారు. 16  పాత వస్త్రానికి ఎవ్వరూ కొత్త గుడ్డముక్కతో అతుకు వేయరు. అలా వేస్తే, కొత్త గుడ్డముక్క ముడుచుకుపోయి చిరుగు ఇంకా పెద్దదౌతుంది. 17  అలాగే, ప్రజలు కొత్త ​ద్రాక్షారసాన్ని పాత ద్రాక్షతిత్తుల్లో పోయరు. ఒకవేళ పోస్తే, ద్రాక్షతిత్తులు పిగిలిపోయి ద్రాక్షారసం కారిపోతుంది; ద్రాక్షతిత్తులు కూడా పాడౌతాయి. అందుకే కొత్త ద్రాక్షారసాన్ని కొత్త ద్రాక్షతిత్తుల్లోనే పోస్తారు, అప్పుడు ఆ రెండూ పాడవకుండా ఉంటాయి.” 18  ఆయన వాళ్లకు ఈ విషయాలు చెప్తుండగా, ఇదిగో! ఒక అధికారి వచ్చి ఆయనకు వంగి నమస్కారం చేసి, “ఈపాటికి మా అమ్మాయి చనిపోయి ఉంటుంది, అయినాసరే నువ్వు వచ్చి ఆమె మీద చెయ్యి ఉంచు, ఆమె బ్రతుకుతుంది” అన్నాడు.+ 19  దాంతో యేసు లేచి అతని వెంట వెళ్లాడు, ఆయన శిష్యులు కూడా ఆయనతోపాటు వెళ్లారు. 20  అప్పుడు ఇదిగో! 12 ఏళ్లుగా రక్తస్రావంతో బాధపడుతున్న ఒకామె,+ వెనక నుండి వచ్చి ఆయన పైవస్త్రం అంచును ముట్టుకుంది.+ 21  ఆమె, “నేను ఆయన పైవస్త్రాన్ని ముట్టుకుంటే చాలు బాగౌతాను” అని అనుకుంటూ ఉంది. 22  యేసు వెనక్కి తిరిగి ఆమెను చూసి, “అమ్మా,* ధైర్యంగా ఉండు! నీ విశ్వాసం నిన్ను బాగుచేసింది” అన్నాడు.+ వెంటనే ఆమె బాగైంది.+ 23  యేసు ఆ అధికారి ఇంటికి వచ్చినప్పుడు, పిల్లనగ్రోవి* ఊదేవాళ్లను, పెద్దగా ఏడుస్తున్న ప్రజల్ని చూసి,+ 24  “ఇక్కడి నుండి వెళ్లండి. పాప చనిపోలేదు, నిద్రపోతోంది అంతే” అన్నాడు.+ ఆ మాట విన్నప్పుడు వాళ్లు వెటకారంగా నవ్వడం మొదలుపెట్టారు. 25  వాళ్లు వెళ్లిపోగానే యేసు లోపలికి వెళ్లి ఆ పాప చేతిని పట్టుకున్నాడు,+ దాంతో ఆమె లేచి కూర్చుంది.+ 26  ఈ విషయం గురించి ఆ ప్రాంతమంతా తెలిసిపోయింది. 27  యేసు అక్కడి నుండి వెళ్తుండగా ఇద్దరు గుడ్డివాళ్లు+ ఆయన వెనక వెళ్తూ, “దావీదు కుమారుడా, మమ్మల్ని కరుణించు” అని అరుస్తున్నారు. 28  ఆయన ఒక ఇంట్లోకి వెళ్లినప్పుడు, ఆ గుడ్డివాళ్లు ఆయన దగ్గరికి వచ్చారు. అప్పుడు యేసు, “నేను మీకు చూపు తెప్పించగలనని మీకు విశ్వాసం ఉందా?”+ అని వాళ్లను అడిగాడు. వాళ్లు, “ఉంది ప్రభువా” అన్నారు. 29  తర్వాత ఆయన వాళ్ల కళ్లను ముట్టుకొని,+ “మీ విశ్వాసం ప్రకారమే మీకు జరగాలి” అన్నాడు. 30  అప్పుడు వాళ్లకు చూపు వచ్చింది. అయితే యేసు వాళ్లను, “ఈ విషయం గురించి ఎవరికీ తెలియనివ్వకండి” అని గట్టిగా హెచ్చరించాడు.+ 31  కానీ వాళ్లు బయటికి వెళ్లాక, దాని గురించి ఆ ప్రాంతమంతా తెలియజేశారు. 32  వాళ్లు వెళ్లిపోతున్నప్పుడు, ఇదిగో! చెడ్డదూత* పట్టిన ఒక మూగవాణ్ణి ప్రజలు యేసు దగ్గరికి తీసుకొచ్చారు.+ 33  యేసు ఆ చెడ్డ​దూతను వెళ్లగొట్టిన తర్వాత ఆ ​మూగవాడు మాట్లాడాడు. అప్పుడు ప్రజలు ఎంతో ఆశ్చర్యపోయి, “మనం ఇశ్రాయేలులో ఇలాంటిది ఎప్పుడూ చూడలేదే” అని అనుకున్నారు. 34  అయితే పరిసయ్యులు, “ఇతను చెడ్డ​దూతల నాయకుడి సహాయంతోనే చెడ్డదూతల్ని ​వెళ్లగొడుతున్నాడు” అని అంటూ ఉన్నారు.+ 35  తర్వాత యేసు అన్ని నగరాల్లో, గ్రామాల్లో ప్రయాణించడం మొదలుపెట్టాడు. ఆయన అలా వెళ్తూ వాళ్ల సమాజమందిరాల్లో బోధిస్తూ, రాజ్యం గురించిన మంచివార్త ప్రకటిస్తూ, అన్నిరకాల జబ్బుల్ని, అనారోగ్యాల్ని బాగుచేస్తూ ఉన్నాడు.+ 36  ఆయన ప్రజల్ని చూసినప్పుడు వాళ్లమీద జాలిపడ్డాడు,+ ఎందుకంటే వాళ్లు కాపరిలేని గొర్రెల్లా అణచివేయబడి, నిర్లక్ష్యం చేయబడ్డారని* ఆయన గమనించాడు.+ 37  అప్పుడు ఆయన తన శిష్యులతో ఇలా అన్నాడు: “అవును, కోయాల్సిన పంట చాలా ఉంది, కానీ పనివాళ్లు కొంతమందే ఉన్నారు.+ 38  కాబట్టి తన పంట కోయడానికి పనివాళ్లను పంపించమని కోత ​యజమానిని ​వేడుకోండి.”+

అధస్సూచీలు

రోగుల్ని మోసుకెళ్లే చిన్న పరుపు.
అక్ష., “కూతురా.”
అంటే, ఫ్లూటు.
పదకోశం చూడండి.
అక్ష., “చర్మం ఒలిచేయబడి, వదిలేయబడ్డారని.”