మత్తయి సువార్త 19:1-30
19 యేసు ఈ విషయాలు మాట్లాడడం ముగించాక, గలిలయ నుండి బయల్దేరి యొర్దాను నది దాటి యూదయ సరిహద్దులకు* వచ్చాడు.+
2 చాలామంది ప్రజలు ఆయన వెనక వెళ్లారు, అక్కడ ఆయన రోగుల్ని బాగుచేశాడు.
3 అప్పుడు పరిసయ్యులు యేసును పరీక్షించడానికి ఆయన దగ్గరికి వచ్చి, “ఒక వ్యక్తి ఏదైనా ఒక కారణాన్ని బట్టి తన భార్యకు విడాకులు ఇవ్వడం సరైనదేనా?” అని అడిగారు.+
4 దానికి యేసు ఇలా చెప్పాడు: “మీరు ఇది చదవలేదా? దేవుడు మొదట్లో వాళ్లను సృష్టించినప్పుడు పురుషునిగా, స్త్రీగా సృష్టించి+
5 ఇలా అన్నాడు: ‘అందుకే, పురుషుడు తన అమ్మానాన్నల్ని విడిచిపెట్టి తన భార్యను అంటిపెట్టుకొని ఉంటాడు, వాళ్లిద్దరూ ఒక్క శరీరంగా ఉంటారు.’+
6 కాబట్టి వాళ్లు ఇక ఇద్దరుగా కాదుగానీ ఒకే శరీరంగా ఉంటారు. అందుకే దేవుడు ఒకటి చేసినవాళ్లను* ఏ మనిషీ విడదీయకూడదు.”+
7 అప్పుడు వాళ్లు, “మరైతే విడాకుల పత్రం ఇచ్చి భార్యను పంపించేయమని మోషే ఎందుకు చెప్పాడు?” అని ఆయన్ని అడిగారు.+
8 దానికి యేసు వాళ్లతో ఇలా అన్నాడు: “మీ హృదయాలు మొద్దుబారిపోవడం* వల్లే, మీ భార్యలకు విడాకులు ఇవ్వడానికి మోషే అనుమతించాడు.+ అయితే మొదటి నుండీ అలా లేదు.+
9 నేను మీతో చెప్తున్నాను, లైంగిక పాపం* అనే కారణాన్ని బట్టి కాకుండా తన భార్యకు విడాకులు ఇచ్చి ఇంకో స్త్రీని పెళ్లి చేసుకునే ప్రతీ వ్యక్తి వ్యభిచారం చేస్తున్నాడు.”+
10 శిష్యులు ఆయనతో, “భార్యాభర్తల మధ్య ఉండే సంబంధం ఇలాంటిదైతే, పెళ్లి చేసుకోకపోవడమే మంచిది” అన్నారు.
11 అప్పుడు యేసు వాళ్లతో ఇలా అన్నాడు: “నేను చెప్పే ఈ మాటల్ని అందరూ పాటించలేరు, బహుమానం ఉన్నవాళ్లే పాటిస్తారు.+
12 పుట్టడమే నపుంసకులుగా* పుట్టినవాళ్లు ఉన్నారు, మనుషుల చేత నపుంసకులుగా చేయబడినవాళ్లు ఉన్నారు, పరలోక రాజ్యం కోసం తమను తాము నపుంసకులుగా చేసుకున్నవాళ్లు కూడా ఉన్నారు. ఈ మాటల్ని పాటించగలిగినవాళ్లను పాటించనివ్వండి.”*+
13 తర్వాత, యేసు చిన్నపిల్లల మీద చేతులు ఉంచి ప్రార్థించాలని కొంతమంది వాళ్లను ఆయన దగ్గరికి తీసుకొచ్చారు. కానీ శిష్యులు వాళ్లను కోప్పడ్డారు.
14 అయితే యేసు, “చిన్నపిల్లల్ని నా దగ్గరికి రానివ్వండి, వాళ్లను ఆపకండి. ఎందుకంటే పరలోక రాజ్యం ఇలాంటివాళ్లదే” అని అన్నాడు.+
15 తర్వాత ఆయన వాళ్లమీద చేతులు ఉంచి, అక్కడి నుండి వెళ్లిపోయాడు.
16 అప్పుడు ఇదిగో! ఒక యువకుడు యేసు దగ్గరికి వచ్చి, “బోధకుడా, శాశ్వత జీవితం పొందాలంటే నేను ఏ మంచిపనులు చేయాలి?” అని అడిగాడు.+
17 అందుకు యేసు, “ఏది మంచిదని నన్నెందుకు అడుగుతున్నావు? దేవుడు తప్ప మంచివాళ్లు ఎవ్వరూ లేరు.+ నువ్వు శాశ్వత జీవితం పొందాలనుకుంటే దేవుని ఆజ్ఞలు పాటిస్తూ ఉండు” అని అన్నాడు.+
18 అప్పుడు అతను, “ఏ ఆజ్ఞలు?” అని అడిగాడు. యేసు ఇలా చెప్పాడు: “హత్య చేయకూడదు,+ వ్యభిచారం చేయకూడదు,+ దొంగతనం చేయకూడదు,+ తప్పుడు సాక్ష్యం చెప్పకూడదు,+
19 మీ అమ్మానాన్నల్ని గౌరవించు,+ నిన్ను నువ్వు ప్రేమించుకున్నట్టు నీ సాటిమనిషిని* ప్రేమించాలి.”+
20 దానికి ఆ యువకుడు, “ఇవన్నీ నేను పాటిస్తూనే ఉన్నాను, ఇంకా ఏమి చేయాలి?” అని అడిగాడు.
21 అప్పుడు యేసు అతనితో, “నువ్వు పరిపూర్ణుడివి* అవ్వాలనుకుంటే, వెళ్లి నీకు ఉన్నవన్నీ అమ్మేసి, ఆ డబ్బును పేదవాళ్లకు ఇవ్వు. అప్పుడు పరలోకంలో నీకు ఐశ్వర్యం కలుగుతుంది;+ నువ్వు వచ్చి నన్ను అనుసరించు” అని అన్నాడు.+
22 ఆ మాటలు విన్నప్పుడు ఆ యువకుడు దుఃఖపడుతూ వెళ్లిపోయాడు, ఎందుకంటే అతనికి చాలా ఆస్తిపాస్తులు ఉన్నాయి.
23 అప్పుడు యేసు తన శిష్యులతో ఇలా అన్నాడు: “నేను నిజంగా మీతో చెప్తున్నాను, ధనవంతుడు పరలోక రాజ్యంలోకి ప్రవేశించడం చాలా కష్టం.+
24 నేను మళ్లీ చెప్తున్నాను, ధనవంతుడు దేవుని రాజ్యంలోకి ప్రవేశించడం కన్నా సూది రంధ్రం గుండా ఒంటె దూరడం తేలిక.”+
25 ఆ మాట విన్నప్పుడు శిష్యులు చాలా ఆశ్చర్యపోయి, “అలాగైతే, రక్షణ పొందడం ఎవరికైనా సాధ్యమేనా?” అని అడిగారు.+
26 అప్పుడు యేసు వాళ్ల కళ్లలోకి చూస్తూ, “మనుషులకు ఇది అసాధ్యమే, కానీ దేవునికి అన్నీ సాధ్యమే” అన్నాడు.+
27 అప్పుడు పేతురు, “ఇదిగో! మేము అన్నీ విడిచిపెట్టి నిన్ను అనుసరించాం. మరి మాకు ఏం దొరుకుతుంది?” అని అడిగాడు.+
28 అందుకు యేసు వాళ్లతో ఇలా అన్నాడు: “నేను నిజంగా మీతో చెప్తున్నాను, అన్నీ కొత్తగా చేయబడినప్పుడు,* మానవ కుమారుడు తన మహిమగల సింహాసనం మీద కూర్చున్నప్పుడు, నన్ను అనుసరించిన మీరు 12 సింహాసనాల మీద కూర్చుని ఇశ్రాయేలు 12 గోత్రాలకు తీర్పు తీరుస్తారు.+
29 నా* కోసం ఇళ్లను గానీ, అన్నదమ్ముల్ని గానీ, అక్కచెల్లెళ్లను గానీ, అమ్మను గానీ, నాన్నను గానీ, పిల్లల్ని గానీ, భూముల్ని గానీ వదులుకున్న ప్రతీ ఒక్కరు వంద రెట్లు ఎక్కువ పొందుతారు; అంతేకాదు శాశ్వత జీవితాన్ని పొందుతారు.*+
30 “అయితే ముందున్న చాలామంది వెనక్కి వెళ్తారు, వెనక ఉన్న చాలామంది ముందుకు వస్తారు.+
అధస్సూచీలు
^ లేదా “పొలిమేర్లకు.”
^ అక్ష., “దేవుడు ఒక కాడి కిందికి తెచ్చినవాళ్లను.”
^ లేదా “కఠినంగా ఉండడం.”
^ లేదా “పెళ్లి చేసుకోకుండా ఉండగలిగే వాళ్లను అలాగే ఉండనివ్వండి.”
^ లేదా “పొరుగువాణ్ణి.”
^ లేదా “సంపూర్ణుడివి.”
^ అక్ష., “పునఃసృష్టిలో.”
^ అక్ష., “నా పేరు.”
^ అక్ష., “స్వాస్థ్యంగా పొందుతారు.”
