ద్వితీయోపదేశకాండం 29:1-29

  • మోయాబు దగ్గర ఇశ్రాయేలుతో ఒప్పందం (1-13)

  • అవిధేయత గురించి హెచ్చరిక (14-29)

    • దాచబడిన విషయాలు, వెల్లడి చేయబడిన విషయాలు (29)

29  హోరేబు దగ్గర తాను ఇశ్రాయేలీయులతో చేసిన ఒప్పందం+ కాకుండా, మోయాబు దేశంలో ఇశ్రాయేలీయులతో ఈ ఒప్పందం కూడా చేయమని యెహోవా మోషేకు ఆజ్ఞాపించాడు. అందులోని మాటలు ఇవి.  మోషే ఇశ్రాయేలీయులందర్నీ ఒకచోటికి పిలిపించి వాళ్లతో ఇలా అన్నాడు: “ఐగుప్తు దేశంలో మీ కళ్లముందు యెహోవా ఫరోకు, అతని సేవకులందరికీ, అతని దేశమంతటికీ చేసిన వాటన్నిటినీ మీరు చూశారు.+  అంటే, ఆ గొప్ప తీర్పుల్ని,* ఆ గొప్ప సూచనల్ని, అద్భుతాల్ని మీరు కళ్లారా చూశారు.+  అయితే యెహోవా నేటివరకు మీకు అర్థంచేసుకోవడా​నికి హృదయాన్ని, చూడడానికి కళ్లను, వినడానికి చెవులను ఇవ్వలేదు.+  ‘నేను 40 సంవత్సరాల పాటు మిమ్మల్ని ఎడారిలో నడిపిస్తున్నప్పుడు + మీ ఒంటిమీదున్న బట్టలు పాతబడి చిరిగిపోలేదు, మీ కాళ్లకున్న చెప్పులు అరిగిపోలేదు.+  అప్పుడు మీరు రొట్టె తినలేదు, ద్రాక్షారసం గానీ ఏ మత్తుపానీయం గానీ తాగలేదు. నేను మీ దేవుడైన యెహోవానని మీరు తెలుసుకోవడానికే అలా జరిగింది.’  చివరికి మీరు ఈ చోటికి చేరుకున్నప్పుడు హెష్బోను రాజైన సీహోను,+ బాషాను రాజైన ఓగు+ మనతో యుద్ధం చేయడానికి వచ్చారు, కానీ మనం వాళ్లను ఓడించాం.+  తర్వాత మనం వాళ్ల దేశాన్ని స్వాధీనం చేసుకొని, దాన్ని రూబేనీయులకు, గాదీయులకు, మనష్షే అర్ధగోత్రం వాళ్లకు స్వాస్థ్యంగా ఇచ్చాం.+  కాబట్టి మీరు చేసే ప్రతీ పని సఫలం అయ్యేలా మీరు ఈ ఒప్పందంలోని మాటల్ని పాటించండి, వీటికి లోబడండి.+ 10  “ఈ రోజు మీరంతా మీ దేవుడైన యెహోవా ముందు నిలబడి ఉన్నారు; మీ గోత్ర ప్రధానులు, మీ పెద్దలు, మీ అధికారులు, ఇశ్రాయేలులోని ప్రతీ పురుషుడు, 11  మీ పిల్లలు, మీ భార్యలు,+ మీ పాలెంలో ఉన్న పరదేశులు,+ మీ కోసం కట్టెలు కొట్టేవాళ్ల దగ్గర నుండి నీళ్లు చేదేవాళ్ల వరకు అందరూ ఇక్కడ నిలబడి ఉన్నారు. 12  మీరు మీ దేవుడైన యెహోవా ఒప్పందంలోకి ప్రవేశించడానికి ఇక్కడ ఉన్నారు, నేడు మీ దేవుడైన యెహోవా ఒట్టేసి మీతో ఆ ఒప్పందం చేస్తున్నాడు.+ 13  ఆయన మీకు వాగ్దానం చేసినట్టే, మీ పూర్వీకులైన అబ్రాహాము,+ ఇస్సాకు,+ యాకోబులకు+ ప్రమాణం చేసినట్టే మిమ్మల్ని తన ప్రజలుగా స్థాపించడానికి,+ తాను మీకు ​దేవునిగా ఉండడానికి+ ఆయన అలా చేస్తున్నాడు. 14  “నేను ఈ ఒప్పందం చేస్తున్నది, ఈ ఒట్టు వేస్తున్నది మీ ఒక్కరితోనే కాదు, 15  నేడు మన దేవుడైన యెహోవా ముందు ఇక్కడ మనతోపాటు నిలబడివున్న వాళ్లతో, అలాగే నేడు ఇక్కడ మనతోపాటు లేనివాళ్లతో కూడా చేస్తు​న్నాను. 16  (ఎందుకంటే, మనం ఐగుప్తు దేశంలో ఎలా జీవించామో, ప్రయాణంలో మనం ఆయా దేశాల్ని ఎలా దాటుకుంటూ వచ్చామో+ మీకు బాగా తెలుసు. 17  అప్పుడు మీరు వాళ్ల​మధ్య ఉన్న హేయమైన వస్తువుల్ని; చెక్కతో, రాళ్లతో, వెండిబంగారాలతో చేయబడిన అస​హ్యమైన విగ్రహాల్ని*+ చూసేవాళ్లు.) 18  ఆ జనాల దేవుళ్లను పూజించడానికి మన దేవుడైన యెహోవా నుండి తన హృదయం పక్కకుమళ్లుతున్న పురుషుడు గానీ, స్త్రీ గానీ, కుటుంబం గానీ, గోత్రం గానీ నేడు మీ మధ్య ఉండకుండా జాగ్రత్త​పడండి;+ విష​పూరితమైన ఫలాల్ని, మాచిపత్రిని* ఉత్పత్తి చేసే వేరు మీ మధ్య ఉండకుండా జాగ్రత్తపడండి.+ 19  “ఒట్టేసి చెప్పిన ఈ మాటల్ని విని కూడా ఎవరైనా, ‘నేను నా మనసుకు నచ్చినట్టే నడుచుకుంటాను, అయినా నాకు నెమ్మది ఉంటుంది’ అని తన హృదయంలో గొప్పలుపోతే, అతను తన బాటలో ఉన్న ప్రతీదాన్ని* సర్వనాశనం చేసుకుంటాడు. 20  యెహోవా అతన్ని క్షమించడానికి ఇష్టపడడు.+ బదులుగా, యెహోవా గొప్ప కోపాగ్ని అతని మీద రగులుకుంటుంది, ఈ గ్రంథంలో రాయబడిన శాపాలన్నీ ఖచ్చితంగా అతని మీదికి వస్తాయి,+ యెహోవా అతని పేరును ఆకాశం కింద లేకుండా తుడిచిపెడతాడు. 21  యెహోవా అతన్ని ఇశ్రాయేలు గోత్రాలన్నిట్లో నుండి వేరు చేసి, ఈ ధర్మశాస్త్ర గ్రంథంలో రాయబడిన ఒప్పందపు శాపాలన్నిటి ప్రకారం అతన్ని శిక్షిస్తాడు. 22  “మీ భావి తరాలవాళ్లు, దూరదేశంలో ఉన్న పరదేశులు ఈ దేశంలోని తెగుళ్లను, దీని మీదికి యెహోవా రప్పించిన ఉపద్రవాల్ని చూసినప్పుడు, 23  అంటే యెహోవా తన కోపంతో, ఆగ్రహంతో సొదొమ గొమొర్రాలను, అద్మా ​సెబోయీములను+ నాశనం చేసినట్టే+ ఉప్పుతో, అగ్నిగంధకాలతో ఈ దేశాన్ని నాశనం చేయడం, దేశమంతట్లో ఎక్కడా విత్తడం గానీ, మొలకెత్తడం గానీ, మొక్కలు మొలవడం గానీ జరగకపోవడం చూసినప్పుడు 24  వాళ్లు, అలాగే అన్నిదేశాల వాళ్లు, ‘యెహోవా ఈ దేశానికి ఎందు​కిలా చేశాడు?+ ఆయన ఇలా తన కోపాగ్నిని కుమ్మరించడానికి కారణమేమిటి?’ అని అడుగుతారు. 25  అప్పుడు ప్రజలు ఇలా అంటారు: ‘ఎందుకంటే వాళ్లు తమ పూర్వీకుల దేవుడైన యెహోవా తమను ఐగుప్తు దేశం నుండి బయటికి తీసుకొచ్చినప్పుడు తమతో చేసిన ఒప్పందాన్ని విడిచిపెట్టేశారు.+ 26  వాళ్లు వెళ్లి, తమకు తెలియని దేవుళ్లను, ఆయన పూజిం​చకూడదని చెప్పిన దేవుళ్లను పూజించారు, వాటికి మొక్కారు.+ 27  దాంతో యెహోవా ఈ గ్రంథంలో రాయబ​డిన శాపాలన్నిటినీ ఈ దేశం మీదికి తీసుకురావడం ద్వారా ​వాళ్లమీద తన కోపాగ్నిని కుమ్మరించాడు.+ 28  అలా యెహోవా కోపంతో, ఆగ్రహంతో, మహా ఉగ్రతతో వాళ్లను తమ నేలలో నుండి పెకిలించి,+ వేరే ​దేశానికి వెళ్లగొట్టాడు, నేటివరకు వాళ్లు అక్కడే ఉన్నారు.’+ 29  “దాచబడిన విషయాలు మన దేవుడైన యెహోవాకు చెందుతాయి,+ కానీ వెల్లడి చేయబడిన విషయాలు శాశ్వతంగా మనకు, మన కుమారులకు చెందుతాయి. మనం ఈ ధర్మశాస్త్రంలోని మాటలన్నిటినీ పాటించాలన్న ​ఉద్దేశంతోనే ఆయన వాటిని మనకు వెల్లడిచేశాడు.+

అధస్సూచీలు

లేదా “పరీక్షల్ని.”
ఇక్కడ ఉపయోగించిన హీబ్రూ పదం పేడకు సంబంధించినది. తిరస్కార భావాన్ని వ్యక్తం చేసేందుకు దాన్ని వాడతారు.
పదకోశం చూడండి.
అక్ష., “ఎండిన దానితోపాటు చక్కగా నీరుపెట్టిన దాన్ని కూడా.”