జెకర్యా 6:1-15

  • 8వ దర్శనం: నాలుగు రథాలు (1-8)

  • మొలక అనే పేరున్న వ్యక్తి రాజు, యాజకుడు అవుతాడు (9-15)

6  తర్వాత నేను మళ్లీ తల ఎత్తి చూశాను, అప్పుడు రెండు పర్వతాల మధ్య నుండి నాలుగు రథాలు రావడం కనిపించింది, ఆ పర్వతాలు రాగివి.  మొదటి రథానికి ఎర్రని గుర్రాలు, రెండో రథానికి నల్లని గుర్రాలు+ ఉన్నాయి.  మూడో రథానికి తెల్లని గుర్రాలు ఉన్నాయి; నాలుగో రథానికి మచ్చలు ఉన్న గుర్రాలు, పొడలు ఉన్న గుర్రాలు+ ఉన్నాయి.  అప్పుడు నేను, “నా ప్రభువా, ఇవి ఏమిటి?” అని నాతో మాట్లాడుతున్న దేవదూతను అడిగాను.  ఆ దేవదూత ఇలా చెప్పాడు: “ఇవి నాలుగు పరలోక సైన్యాలు.+ ఇవి సర్వలోక ప్రభువు ​సన్నిధిలో కనబడి, ఆ తర్వాత అక్కడి నుండి ​బయటికి వెళ్తున్నాయి.+  నల్లని గుర్రాలున్న రథం ఉత్తర దేశానికి వెళ్తోంది;+ తెల్లనివి సముద్రాన్ని దాటి వెళ్తున్నాయి; మచ్చలు ఉన్నవి దక్షిణ దేశానికి వెళ్తున్నాయి.  పొడలు ఉన్నవి భూమంతటా సంచరించాలని ఉత్సాహంగా ఉన్నాయి.” తర్వాత అతను, “వెళ్లండి, భూమంతటా సంచరించండి” అన్నాడు. అప్పుడవి భూమంతటా సంచ​రించడం మొదలుపెట్టాయి.  అప్పుడతను నన్ను పిలిచి, “చూడు, ఉత్తర దేశానికి వెళ్తున్నవి, ఉత్తర దేశం పట్ల యెహోవాకున్న కోపాన్ని తగ్గించాయి” అని చెప్పాడు.  యెహోవా వాక్యం మళ్లీ నా దగ్గరికి వచ్చి ఇలా చెప్పింది: 10  “చెరలో ఉన్న ప్రజల దగ్గర నుండి హెల్దయి, టోబీయా, యెదాయా తెచ్చినవి తీసుకో; నువ్వు ఆ రోజు, బబులోను నుండి వచ్చిన ఈ ప్రజలతో కలిసి జెఫన్యా ​కుమారుడైన యోషీయా ఇంటికి వెళ్లాలి. 11  నువ్వు వెండిని, బంగారాన్ని తీసుకొని ఒక కిరీటం* చేసి దాన్ని యెహోజాదాకు కుమారుడూ, ప్రధానయాజకుడూ అయిన యెహోషువ+ తలమీద పెట్టి, 12  అతనికి ఇలా చెప్పు:“ ‘సైన్యాలకు అధిపతైన యెహోవా చెప్పేదేమిటంటే, “ఇదిగో, మొలక అనే పేరున్న వ్యక్తి ఇతనే.+ ఇతను తన సొంత స్థలం నుండి మొలకెత్తుతాడు, ఇతను యెహోవా ఆలయాన్ని కడతాడు.+ 13  యెహోవా ఆలయాన్ని కట్టేది ఇతనే, రాజ్యాధికారాన్ని పొందేది ఇతనే. ఇతను తన సింహాసనంపై కూర్చుని పరిపాలిస్తాడు, అంతేకాదు సింహాసనం మీద ఉంటూనే యాజకుడిగా కూడా సేవచేస్తాడు,+ ఆ రెండు బాధ్య​తల* మధ్య మంచి సమన్వయం ఉంటుంది. 14  ఆ కిరీటం* యెహోవా ఆలయంలో హేలెముకు, టోబీయాకు, యెదాయాకు,+ జెఫన్యా కుమారుడైన హేనుకు జ్ఞాపకార్థంగా* ఉంటుంది. 15  సుదూరాల్లో ఉన్నవాళ్లు వచ్చి, యెహోవా ఆలయాన్ని కట్టడంలో పాల్గొంటారు.” అప్పుడు, సైన్యాలకు అధిపతైన యెహోవాయే నన్ను ​పంపాడని మీరు తెలుసుకుంటారు. మీరు మీ ​దేవుడైన యెహోవా స్వరాన్ని వింటేనే అది జరు​గుతుంది.’ ”

అధస్సూచీలు

లేదా “గొప్ప కిరీటం.”
లేదా “పాత్రల.”
లేదా “గొప్ప కిరీటం.”
లేదా “జ్ఞాపికగా.”