అపొస్తలుల కార్యాలు 8:1-40

ప్లే

సౌలు హింసించడం (1-3)
సమరయలో ఫిలిప్పు పరిచర్యకు మంచి ఫలితాలు (4-13)
పేతురును, యోహానును సమరయకు పంపించడం (14-17)
పవిత్రశక్తిని కొనాలని సీమోను ప్రయత్నించడం (18-25)
ఇతియోపీయుడైన ఒక అధికారి (26-40)

8 స్తెఫను హత్యను సౌలు ఆమోదించాడు.+ ఆ రోజు నుండి యెరూషలేములో ఉన్న సంఘం మీదికి తీవ్రమైన హింస రావడం మొదలైంది. అపొస్తలులు తప్ప మిగతా శిష్యులందరూ యూదయ, సమరయ అంతటా చెదిరిపోయారు.+ ² అయితే దైవభక్తిగల పురుషులు స్తెఫనును మోసుకెళ్లి సమాధి చేశారు. వాళ్లు అతని గురించి చాలా ఏడ్చారు. ³ సౌలు మాత్రం సంఘం మీద క్రూరంగా దాడిచేయడం మొదలుపెట్టాడు. అతను ఒక ఇంటి తర్వాత ఇంకో ఇంట్లో చొరబడి పురుషుల్ని, స్త్రీలను బయటికి ఈడ్చుకొచ్చి చెరసాలలో వేయించాడు.+ ⁴ అయితే చెదిరిపోయినవాళ్లు తాము వెళ్లిన ప్రాంతాల్లో వాక్యం గురించిన మంచివార్తను ప్రకటిస్తూ ఉన్నారు.+ ⁵ ఫిలిప్పు సమరయ+ నగరానికి* వెళ్లి అక్కడి ప్రజలకు క్రీస్తు గురించి ప్రకటించడం మొదలుపెట్టాడు. ⁶ ప్రజలు గుంపులుగుంపులుగా వచ్చి ఫిలిప్పు మాటల్ని మనసుపెట్టి విన్నారు, అతను చేస్తూ ఉన్న సూచనల్ని గమనించారు. ⁷ వాళ్లలో అపవిత్ర దూతలు* పట్టినవాళ్లు చాలామంది ఉన్నారు. ఆ అపవిత్ర దూతలు పెద్దగా కేకలు వేస్తూ వాళ్లలో నుండి బయటికి వచ్చేవాళ్లు.+ అంతేకాదు చాలామంది పక్షవాతం ఉన్నవాళ్లు, కుంటివాళ్లు కూడా బాగయ్యారు. ⁸ దాంతో ఆ నగరమంతా సంతోషంతో నిండిపోయింది. ⁹ ఆ నగరంలో సీమోను అనే ఒక వ్యక్తి ఉన్నాడు. అతను తాను గొప్పవాడినని చెప్పుకుంటూ తన ఇంద్రజాలంతో సమరయ వాసుల్ని ఆశ్చర్యంలో ముంచెత్తేవాడు. ¹⁰ సామాన్యుల నుండి గొప్పవాళ్ల వరకు అందరూ అతను చెప్పేది శ్రద్ధగా వింటూ, “ఇతను దేవుని శక్తి, గొప్ప శక్తి” అనేవాళ్లు. ¹¹ అతను చాలాకాలంపాటు వాళ్లను తన ఇంద్రజాలంతో ఆశ్చర్యపర్చాడు కాబట్టి అతను చెప్పేది వాళ్లు శ్రద్ధగా వినేవాళ్లు. ¹² అయితే ఫిలిప్పు వాళ్లకు దేవుని రాజ్యం గురించిన,+ యేసుక్రీస్తు పేరు గురించిన మంచివార్త ప్రకటించిన తర్వాత వాళ్లు అతన్ని నమ్మి పురుషులు, స్త్రీలు అందరూ బాప్తిస్మం తీసుకోవడం మొదలుపెట్టారు.+ ¹³ సీమోను కూడా విశ్వాసి అయ్యాడు. బాప్తిస్మం తీసుకున్నాక సీమోను ఫిలిప్పుతోనే+ ఉన్నాడు; జరుగుతున్న సూచనల్ని, గొప్ప శక్తివంతమైన పనుల్ని చూసి అతను ఎంతో ఆశ్చర్యపోయాడు. ¹⁴ సమరయ ప్రజలు దేవుని వాక్యాన్ని అంగీకరించారని యెరూషలేములో ఉన్న అపొస్తలులు విన్నప్పుడు+ పేతురును, యోహానును వాళ్ల దగ్గరికి పంపించారు. ¹⁵ వీళ్లు సమరయకు వెళ్లి, అక్కడి విశ్వాసులు పవిత్రశక్తి పొందేలా వాళ్లకోసం ప్రార్థించారు.+ ¹⁶ ఎందుకంటే, వాళ్లు యేసు ప్రభువు పేరున బాప్తిస్మం తీసుకున్నారు కానీ అప్పటివరకు వాళ్లలో ఎవ్వరూ పవిత్రశక్తి పొందలేదు.+ ¹⁷ పేతురు, యోహాను వాళ్ల మీద చేతులు ఉంచినప్పుడు+ వాళ్లు పవిత్రశక్తి పొందడం మొదలైంది. ¹⁸ అపొస్తలులు ఎవరి మీదైనా చేతులు ఉంచితే వాళ్లు పవిత్రశక్తి పొందుతున్నారని సీమోను చూశాడు, కాబట్టి అతను అపొస్తలులకు డబ్బు ఇస్తూ, ¹⁹ “నేను ఎవరి మీద చేతులు ఉంచితే వాళ్లు పవిత్రశక్తి పొందేలా, ఈ అధికారం నాకు కూడా ఇవ్వండి” అన్నాడు. ²⁰ అయితే పేతురు అతనితో ఇలా అన్నాడు: “నీ వెండి నీతోపాటు నాశనమైపోవాలి. ఎందుకంటే, దేవుడు ఉచితంగా ఇచ్చే బహుమతిని నువ్వు డబ్బుతో కొనుక్కోగలనని+ అనుకున్నావు. ²¹ ఈ విషయంతో నీకు ఎలాంటి సంబంధం లేదు. ఎందుకంటే దేవుని ముందు నీ హృదయం సరిగ్గా లేదు. ²² కాబట్టి నీ చెడుతనం విషయంలో పశ్చాత్తాపపడు. యెహోవాను* పట్టుదలగా వేడుకో. బహుశా ఆయన నీ హృదయంలోని చెడ్డ ఆలోచనను క్షమిస్తాడేమో. ²³ ఎందుకంటే నువ్వు నాకు చేదైన విషంలా,* అవినీతికి దాసుడిలా కనిపిస్తున్నావు.” ²⁴ అప్పుడు సీమోను వాళ్లతో, “మీరు చెప్పిన వాటిలో ఏదీ నా మీదికి రాకుండా దయచేసి నా కోసం యెహోవాను* వేడుకోండి”* అన్నాడు. ²⁵ వాళ్లు పూర్తిస్థాయిలో సాక్ష్యమిచ్చి, యెహోవా* వాక్యం గురించి మాట్లాడిన తర్వాత యెరూషలేముకు తిరుగు ప్రయాణం మొదలుపెట్టారు. వాళ్లు వెళ్తూవెళ్తూ, సమరయుల చాలా గ్రామాల్లో మంచివార్త ప్రకటిస్తూ ఉన్నారు.+ ²⁶ అయితే, యెహోవా* దూత+ ఫిలిప్పుతో మాట్లాడి ఇలా అన్నాడు: “నువ్వు లేచి దక్షిణం వైపు యెరూషలేము నుండి గాజాకు వెళ్లే దారి వెంబడి వెళ్లు.” (ఈ దారి ఎడారిలో ఉంది.) ²⁷ దాంతో అతను లేచి వెళ్లాడు. అప్పుడు ఇదిగో! ఇతియోపీయుడైన ఒక ఆస్థాన అధికారి* అతనికి కనిపించాడు. అతను ఇతియోపీయుల రాణియైన కందాకే కింద పనిచేసేవాడు. అతను రాణి ఖజానా అంతటినీ చూసుకునేవాడు. దేవుణ్ణి ఆరాధించడం కోసం అతను యెరూషలేముకు వచ్చి+ ²⁸ తిరిగెళ్తున్నాడు. అతను తన రథంలో కూర్చొని యెషయా ప్రవక్త గ్రంథాన్ని బిగ్గరగా చదువుతున్నాడు. ²⁹ కాబట్టి దేవుడు తన పవిత్రశక్తి ద్వారా ఫిలిప్పుతో, “ఆ రథం దగ్గరికి వెళ్లు” అని చెప్పాడు. ³⁰ అప్పుడు ఫిలిప్పు రథం పక్కనే పరుగెత్తుతూ, ఆ వ్యక్తి యెషయా ప్రవక్త గ్రంథాన్ని బిగ్గరగా చదువుతుండడం విని, “నువ్వు చదువుతున్నది నీకు అర్థమౌతోందా?” అని అడిగాడు. ³¹ అందుకు అతను, “ఎవరో ఒకరు విడమర్చి చెప్పకపోతే నాకెలా అర్థమౌతుంది?” అన్నాడు. తర్వాత అతను ఫిలిప్పును రథం ఎక్కి తనతోపాటు కూర్చోమని వేడుకున్నాడు. ³² అతను లేఖనాల్లోని ఈ భాగాన్ని చదువుతున్నాడు: “గొర్రెలా వధించబడడానికి ఆయన్ని తీసుకొచ్చారు. బొచ్చు కత్తిరించేవాళ్ల ముందు గొర్రెపిల్ల మౌనంగా ఉన్నట్టు ఆయన తన నోరు తెరవలేదు.+ ³³ ఆయన అవమానించబడినప్పుడు ఆయనకు న్యాయం జరగలేదు.+ భూమ్మీద లేకుండా ఆయన ప్రాణాన్ని తీసేశారు,+ ఆయన తరం గురించిన వివరాలు ఎవరు చెప్తారు?” ³⁴ ఆ అధికారి ఫిలిప్పును, “ప్రవక్త ఎవరి గురించి ఈ మాటలు అన్నాడు? తన గురించా, వేరే వ్యక్తి గురించా? దయచేసి నాకు చెప్పు” అని అడిగాడు. ³⁵ అప్పుడు ఫిలిప్పు ఆ లేఖనంతో మొదలుపెట్టి యేసు గురించిన మంచివార్త అతనికి ప్రకటించాడు. ³⁶ వాళ్లు ఆ దారిలో వెళ్తుండగా వాళ్లకు నీళ్లు కనిపించాయి. దాంతో ఆ అధికారి, “ఇదిగో! ఇక్కడ నీళ్లు ఉన్నాయి; నేను బాప్తిస్మం తీసుకోవడానికి ఆటంకం ఏంటి?” అని అడిగాడు. ³⁷ *—— ³⁸ వెంటనే అతను రథాన్ని ఆపమని ఆదేశించాడు. అప్పుడు ఫిలిప్పు, ఆ అధికారి నీళ్లలోకి దిగారు; ఫిలిప్పు అతనికి బాప్తిస్మం ఇచ్చాడు. ³⁹ వాళ్లు నీళ్లలో నుండి బయటికి వచ్చినప్పుడు, యెహోవా* పవిత్రశక్తి వెంటనే ఫిలిప్పును అక్కడి నుండి వేరే చోటికి తీసుకెళ్లింది. ఆ అధికారి అతన్ని ఇక చూడలేదు. అయితే ఆ అధికారి సంతోషంగా తన దారిన వెళ్లిపోయాడు. ⁴⁰ ఫిలిప్పు అష్డోదుకు వెళ్లి, కైసరయకు+ వచ్చేవరకు ఆ నగరాలన్నిట్లో మంచివార్త ప్రకటిస్తూ ఉన్నాడు.