ఈ బ్రోషుర్‌ సహాయంతో బైబిల్లోని ప్రాథమిక బోధలు నేర్చుకున్నాక, యెహోవా మీద మీకున్న ప్రేమ ఎక్కువై ఉంటుంది. ఆ ప్రేమ ఇంకా పెరగాలంటే కృషి చేయాలి. (1 పేతురు 2:2) మీరు శాశ్వత జీవితం పొందాలంటే, బైబిలు విషయాలు తెలుసుకుంటూ దేవునికి దగ్గరౌతూ ఉండాలి.—యోహాను 17:3; యూదా 21 చదవండి.

దేవుని గురించి తెలుసుకునేకొద్దీ మీ విశ్వాసం పెరుగుతుంది. విశ్వాసం ఉంటే మీరు దేవున్ని సంతోషపెట్టగలుగుతారు. (హెబ్రీయులు 11:1, 6) అంతేకాదు, గతంలో చేసిన పాపాల విషయంలో పశ్చాత్తాపపడి, మీ జీవితంలో మంచి మార్పులు చేసుకోగలుగుతారు.—అపొస్తలుల కార్యాలు 3:19 చదవండి.

సాధారణంగా, మనకు ఏదైనా మంచివార్త తెలిస్తే అందరికీ ఆనందంగా చెప్తాం. కాబట్టి మీరు కూడా నేర్చుకున్నవాటిని వేరేవాళ్లకు చెప్పవచ్చు. మీరు బైబిలు విషయాలు తెలుసుకునేకొద్దీ యెహోవామీద మీకున్న విశ్వాసాన్ని, మంచివార్తను బైబిలు ఉపయోగించి ఇతరులకు వివరించగలుగుతారు.—రోమీయులు 10:13-15 చదవండి.

ముందుగా మీ స్నేహితులకు, బంధువులకు మంచివార్త చెప్పడం మొదలుపెట్టవచ్చు, చాలామంది అలాగే చేస్తారు. అయితే, కొంచెం జాగ్రత్తగా ఉండండి. వాళ్ల మతాన్ని తప్పుపట్టకుండా దేవుని వాగ్దానాల గురించి చెప్పండి. మీ మాటలకన్నా మీ దయగల ప్రవర్తనే ఎక్కువగా ఆకట్టుకుంటుందని మర్చిపోకండి.—2 తిమోతి 2:24, 25 చదవండి.

బైబిలు విషయాలు నేర్చుకోవడం వల్ల మీరు దేవునికి ఇంకా దగ్గరవ్వవచ్చు. కొంతకాలానికి యెహోవాతో మీకు ఒక ప్రత్యేక అనుబంధం ఏర్పడుతుంది.  మీరు ఆయన కుటుంబంలో అడుగుపెట్టి ఆయనకు చెందినవాళ్లు అవుతారు.—2 కొరింథీయులు 6:18 చదవండి.

మీరు బైబిలు విషయాలు నేర్చుకునేకొద్దీ అందులోని సూత్రాలు ఎలా పాటించాలో అర్థం చేసుకుంటారు. (హెబ్రీయులు 5:13, 14) బైబిల్లో మనం ఏమి నేర్చుకోవచ్చు? అనే పుస్తకం ఉపయోగించి మీతో బైబిలు విషయాలు చర్చించమని యెహోవాసాక్షుల్ని అడగండి. మీరు ఎంత ఎక్కువగా నేర్చుకుంటే మీ జీవితం అంత బాగుంటుంది.—కీర్తన 1:1-3; 73:27, 28 చదవండి.

సంతోషంగల దేవుడైన యెహోవాయే మంచివార్త చెప్తున్నాడు. దేవుని ప్రజలకు దగ్గరౌతూ ఉంటే దేవునికి దగ్గరవ్వవచ్చు. (హెబ్రీయులు 10:24, 25) యెహోవాను సంతోషపెట్టడానికి ప్రయత్నిస్తూ ఉండడం ద్వారా మీరు వాస్తవమైన జీవితం మీద, అంటే శాశ్వత జీవితం మీద గట్టి పట్టు సాధించగలుగుతారు. దేవునికి దగ్గరవ్వడం కన్నా మంచి విషయం ఇంకొకటి లేదు.—1 తిమోతి 1:11; 6:19 చదవండి.