Nanao ty Zoton’arofo i Jehovah Iareo

Ampela Mahimbagne Raike Nikalagne Loza

AMPELA hendre ty Abigaila sady ampela soa faie nifanohetse ama’e ty vali’e satria tena tsy nisy nilagne aze, “masiake sady raty toetse.” I Nabala ty agnara’e. (1 Samoela 25:3) Nisy raha niseho nitohitohy, le izay ty nahavy ty agnara o mpivaly reo ho voasoratse agnate Baiboly ao. Andao hohenteantika ty raha niseho.

Tombotsoa Manokagne Tsy Nirambesegne Tam-pankasitrahagne

Taonjato faha-11 T.K. ty tamy izay. Voahosotse ty ho mpanjaka o Israelio ty Davida faie tsy nanjaka fa ndra nilay. Ino ty anto’e? I Saoly ty mbe ni-mpanjaka tamy izay, le nitea’o ho nivonoegne ty Davida. Voka’e, lava nilay avao ty Davida mba hiarovagne ty fiai’e. Nietake tamy ty fatrambey i Parana, atimo i Joda naho aloha i fatrambey i Sinaỳ agne ty Davida naho ty lahilahy 600 teo ho eo niarake ama’e tamy ty fara’e.​—1 Samoela 23:13; 25:1.

Nifakatendreke tamy ze lahilahy mpiarake agnondry i Nabala zay iareo tie tagne. Tarana i Kaleba ty Nabala sady tena ni-mpagnarivo. Nanagne agnondry 3 000 naho ose 1 000 reke, le nagnety ty volo o agnondri’e reo ta Karmela agne. T’atimo i Hebrona agne ty nisy o tanagne iohoe, va’e 40 kilometatse teo ho eo niala i Parana varagne. a Nampea i Davida naho i lahilahy niarake ama’e rey i mpiarake agnondry i Nabala rey mba tsy hoazo ty mpangalatse tam-patrambey agne i agnondry rey.​—1 Samoela 25:14-16.

Nanomboke ty fanapahagne ty volon’agnondry ta Karmela agne tagnate ze fotoagne zay. Fotoagne tena nahafale io manahake o fotoagne fitongisa o mpamboleo avao ka. Fotoagne fanehoagne fatarihagne ka io naho fa magnomey valesoa hoahy ze niasa mafe ho aze o tompon’agnondrio. Tsy tihoe nahavanivany raha areke ty Davida tamy ireke nagnirake lahilahy folo mba hangatake hanegne tamy i Nabala ta Karmela agney fa noho ireke nanao raha mba hiarovagne i agnondry i Nabala rey ty nahavy aze nanao izay.​—1 Samoela 25:4-9.

Tena tsy natarike ty Nabala. Hoe reke “I Davidao ro Ia?” Nirehafe’e ankolake ka tafara izay tie, mpanompo nilay ty ry Davida naho i lahilahy miarake ama’e rey sady hoe reke: “Akore moa ty hangalako ty mofoko naho ty ranoko vaho ty hena tinapatapako hoahy ty mpagnety ty agnondriko, le hagnomey izay ze ndaty tsy fantako fiaviagne zay?” Hoe ty Davida naho fa naharey ze reha’e zay: “Sambe mandrambesa ty mesabei’e iaby!” Lahilahy 400 teo ho eo tamy izay ty niomagne hialy.​—1 Samoela 25:10-13.

Nahimbagne ty Abigaila

Nirey i Abigaila i rehake raty natao i Nabalay. Va’e tsy vaho samba’e tamy io ty nanao ze hisia ty filongoagne noho ty raha natao i Nabala. Faie ndra akore ndra akore, le avy le nanao raha malaky reke. Tsy nirehake tamy i Nabala reke fa le avy le namory vatiagne, agnisa izay ty agnondry dime naho hanegne maro. Niakatse reke naho fa niavy eo, le nandeha mba hihaogne amy i Davida am-patrambey agne.​—1 Samoela 25:18-20.

Naho fa nahatrea i Davida ty Abigaila, le avy le niankohoke agnatreha’e eo. Hoe ty nifihalalea’e tamy i Davida: “O ragnandria, ko midare i Nabala tsy misy ilagne aze ignehoe rehe ajafady.” Hoe indraike reke. “Mba omeo o ajalahy magnorike azo reo ragnandria ty fagnomezagne nindese ty mpanompovave’o toy ho azo toa.” Hoe ka reke: “Mba tsy hanegnegne rehe tie am-po’o agne.” Nampitao i Davida areke ty Abigaila mba tsy ho memeke hanao raha, le avy eo hanegnegne.​—1 Samoela 25:23-31.

Nitsanogne i Abigaila ty Davida. Hoe reke tamy i Abigaila: ‘Hotahiegne abey rehe noho ty fahendrea’o. Hotahiegne ka rehe  fa nisakagne ahy tsy hanan-tahigne hampité lio tandroany.’ Hoe indraike reke tamy i Abigaila: “Tsy ho nisy velogne ndra raike ty lahilahy iaby amy ty keleia i Nabala amparake ty haha maraindray i androy, naho tsy niavy malaky rehe mba hifanampe amako.” b​—1 Samoela 25:32-34.

Lesogne Ho Antikagne

Trea boake amo o tantara amy Baiboly ao iohoe fa tsy raty naho manao raha voaloha’e ty ampela raike tea an’Agnahare naho ilaegne ty manao izay. Nanao raha nifanohetse tamy ty fagniria i Nabala vali’e ty Abigaila faie tsy nagnameloke aze tamy izay ty Baiboly fa nidera aze. Rehafe ty Baiboly tie ampela mahimbagne sady hendre reke. Nahavita namonje fiay o ndaty maro ty Abigaila noho ireke nanao raha tagnate o raha sarotse iohoe.

Ndra tie toko’e hagneke ty vali’e aza o ampelao arake ty taken’Agnahare, le va’e tsy hanao izay reke naho ty fitsipin’Agnahare ro voakasike. Faie mazava hoaze fa toko’e hikezake mafe reke mba ho ‘tony vaho tsy hagnore’ lognandro. Tsy toko’e hanapake ty hanao raha irerike avao reke satria te hipay tsiriry avao, ndra te hiavognavogne ndra tsy te hankatò. (1 Petera 3:4) Faie tsy toko’e hanao ze raha fa hai’e tie tsy fahendreagne sady mandika ty fitsipin’Agnahare ty ampela raike tea an’Agnahare. Trea amo o tantara i Abigaila iohoe fa tsy maregne i tihoey tie ndevo o ampelao amy ty Baiboly.

Mampianatse antika miomba ty fifehezan-tegna ka o tantara iohoe. Tena nampiseho o toetse iohoe ty Davida kindraike. Nanagne fahafahagne ty hamono i Saoly Mpanjaka, i mpamale fate azey ohatse reke faie tsy nanao izay ndra tie ho nampilamigne aze aza ty fifateza i Saoly. (1 Samoela 24:2-7) Faie naho fa nitampoke i Davida tie tsy hidare aze ty Nabala, le nifanta reke tie hamale fate. Fampitaoagne hoahy ty Kristiana mikezake ty tsy ‘hamale raty ty raty ndra amy ia ndra amy ia’ zay. Amy ze kila raha, le toko’e hagnorike ty fagnanara i Paoly toy iareo: “Naho mete sady mbe miankigne ama’areo avao, le mikezaha hilongo soa amy ty ndaty iaby. Ko mamale fate ry ragnetse, fa Andrianagnahare ro engao hanoro ty havignera’e.”​—Romana 12:17-19.

[Fagnamarehagne ambane peje]

[Sare amy ty peje 15]

I Abigaila minday fagnomezagne hoahy i Davida