Hagnente ty agnate’ao

Hizilike amy ty lohahevetse

Vavolombelo i Jehovah

Hijobogne firehake Tandroy

 Lesogne 9

Tea’o ho Sambatse Vao ty Keleia’o?

Tea’o ho Sambatse Vao ty Keleia’o?

1. Inogne ty anto’e toko’e hanoa ty mpivaly mariaze?

Ho sambatse ty keleia’o naho magnorike ty talily soa boake amy i Jehovah nareo, fa Andrianagnahare falefale reke. (1 Timoty 1:11) Ie ty namboatse o fanambaliagneo. Naho manao mariaze ty mpivaly, le ho sambatse naho tsy hifamarahy sady hahambegne ty ana’e. Manao mariaze ty Kirisitianagne naho fa hanam-baly hagnorihagne ty lily o fanjakagneo. (Lioka 2:1, 4, 5).

Tsy fihisagne ty nanoan’Andrianagnahare o fanambaliagneo fa haharetse nainai’e. Naharo’e ty lahilahy naho ty ampela hiharo lognandro. Mandily ty Kirisitianagne manambaly mba ho vagnogne ty Jehovah. (Hebreo 13:4) Heje’e ty misara-baly. (Malakia 2:16) Faie o hakarapilo avao ro isaraham-baly naho mbe azo anambaliagne indraike naho mbe te hanam-baly.—Vakio ty Matio 19:3-6, 9.

2. Inogne ty toko’e hatao ty mpivaly mba hifandrae soa?

Namboare i Jehovah hifagnampe ty mpivaly faie sambe managne ty asa’e iaby. (Genesisy 2:18) Ty lahilahy ro nitendren’Andrianagnahare hifehe naho hamelogne ty hasaveregna’e sady hagnanatse iareo ty Saontsin’Andrianagnahare. Toko’e ho koko naho hanao ze raha hahasoa ty vali’e ty lahilahy. Toko’e hifampikoko naho hifampiasy ty mpivaly. Toko’e hifandefetse ty mpivaly fa sambe tsy voririke, amy izay iareo ho sambatse.—Vakio ty Efesianina 4:31, 32; 5:22-25, 33; 1 Petera 3:7.

3. Toko’e hisarake vao ty mpivaly naho fa mialy?

Ndra tie misy raha manahiragne le tsy toko’e hifakalaigne ty mpivaly. (1 Korintianina 13:4, 5) Naho fa misy raha  manahiragne le tsy mandrisike ty mpivaly hisarake ty Saontsin’Andrianagnahare. Tsy izay ty fagnafoly ze raha manahiragne.—Vakio ty 1 Korintianina 7:10-13.

4. Tean’Andrianagnahare hanao inogne ty ajaja?

Tea i Jehovah ho sambatse ka ty ajaja. Toroa’e raha fanjaka nareo soa tie ho falefale. Tea i Jehovah hagnorike ty fagnanara ty rae amy ty rene ty ajaja fa iareo ro mahilala sady maro raha fantatse. (Kolosianina 3:20) Tea’e ho fanta’areo fa mahafale ty manompo aze sady magnorike ty fagnanara i Ana’ey.—Vakio ty Mpitoriteny 11:9–12:1; Matio 19:13-15; 21:15, 16.

5. Inogne ty toko’e hatao ty rae amy ty rene hahasambatse ty ana’e?

Toko’e hiasa nareo hahazoa ty ana’areo hanegne, tragno, naho lamba hisikina’e. (1 Timoty 5:8) Faie ty fagnanaragne aze ho tea an’Andrianagnahare ro mahasambatse aze vata’e. (Efesianina 6:4) Ty hatea’o an’Andrianagnahare ro ho tahafe ty ana’o. Aoregno amy ty Soantsin’Andrianagnahare ty fagnanaragne atao’o, soa tie hisy voka’e ama’e.—Vakio ty Deoteronomia 6:4-7; Ohabolana 22:6.

Risiho hanao raha soa ty ajaja sady rengeo naho fa magnorike fagnanaragne. Toko’e haoke amy ty raha soa ty ajaja. Izay ty hahavy iareo tsy harengerenge sady tsy ho azom-boigne. (Ohabolana 22:15) Ko asiahagne loatse reke naho fa misy raha tsy mete atao’e.—Vakio ty Kolosianina 3:21.

Lako ty boke naboa ty Vavaolombelo i Jehovah hagnampeagne ty rae naho ty keleia’e. Boake agnate Baiboly ao ze fagnanaragne agnate ao.—Vakio ty Salamo 19:7, 11.