Hagnente ty agnate’ao

Hizilike amy ty lohahevetse

Vavolombelo i Jehovah

Hijobogne firehake Tandroy

 Lesogne 12

Tea’o vao ty Hiharine an’Andrianagnahare?

Tea’o vao ty Hiharine an’Andrianagnahare?

1. Mijanjigne ze kila vavake vao ty Andrianagnahare?

Mitaogne ze kila ndaty hivavake ama’e ty Andrianagnahare. (Salamo 65:2) Faie tsy ze mivavake le ho janjigne’e iaby. Tsy tea’e zao ty lahilahy mampijale valy sady tsy janjigne’e ty vavake anoe’e. (1 Petera 3:7) Tsy nijanjigne’e ty vavake nanoe Israelitao naho fa nizatse nanao raty iareo. Faie ndra tie eo zay naho mihalaly ama’e ty ndaty raike nanao hakeo bey le janjigne’e ty vavake anoe’e. Engegne naho voninahitse ho antikagne ty mivavake aman’Andrianagnahare le ko atao ambanen-draha.—Vakio ty Isaia 1:15; 55:7.

2. Ia ty toko’e hivavahagne, le atao akore?

I Jehovah raike avao ty toko’e hivavahagne fa ie ty Andrianagnahare maregne sady nambotse ze raha iaby. (Matio 4:10; 6:9) Toko’e hatao amy ty agnara i Jesosy ty vavake ataontikagne fa ie ty nisolovoigne antikagne. (Jaona 14:6) Tsy mete ty manao tsianjere naho mamaky agnate boke naho fa mivavake. Fa naho ze agnate fotikagne ao ro vorahentikagne amy i Jehovah le fale reke.—Vakio ty Matio 6:7; Filipianina 4:6, 7.

Ndra tie bisibisihegne avao ty vavake anoentikagne le vazoho i Jehovah. (1 Samoela 1:12, 13) Tsy misy lera’e ty fivavahagne ama’e: Ndra tie vaho hiroro, ndra tie vaho mifoha, ndra tie hihinagne, ndra tie misy raha manahiragne.—Vakio ty Salamo 55:22; Matio 15:36.

3. Nagninogne o Kirisitianagneo ie mandeha mivorio?

Tsy mino an’Andrianagnahare ty hamaroa o ndatio sady mikizake naho fa agnambaragne fa ho paradisa ty  tane toy. (2 Timoty 3:1, 4; 2 Petera 3:3, 13) Toko’e hivory tikagne soa tie hifampionogne naho hagnarine i Jehovah.—Vakio ty Hebreo 10:24, 25.

Ho soa ty filongoa’o aman’Andrianagnahare naho miharo amo o ndaty tea azeo rehe. Naho mivory amo o fivavaha o Vavaolombelo i Jehovah o agne rehe, le hahazo fampionognagne fa misy ndaty managne finoagne ty agne.—Vakio ty Romanina 1:11, 12.

4. Inogne ty hagnampe azo hiharine an’Andrianagnahare?

Dineho soa ty raha nianara’o amo o Saontsi’eo ao. Le eretsereto ka ty raha nanoe’e naho ty fagnanara’e sady ty raha nampitamae’e azo. Naho manao izay rehe sady mimane fivavahagne le ho fanta’o fa bey hatea naho mahilala vata’e ty Andrianagnahare.—Vakio ty Josoa 1:8; Salamo 1:1-3.

Ho longo maifitse aze rehe naho mino sady matoky aze. Anoo ze hampatanjake ty finoa’o. Dineho ty mahavy azo hatoky ty raha inoa’o.—Vakio ty Matio 4:4; Hebreo 11:1, 6.

5. Inogne ty soa ho azo’o naho miharine an’Andrianagnahare rehe?

Hiambegne naho hagnampe azo ty Jehovah. Tohagna’e ka rehe tsy ho ketrake ty finoa’o hahazoa’o i havelogne nainai’ey. (Salamo 91:1, 2, 7-10) Ho jangagne naho ho sambatse ka rehe naho magnorike ty fampitaogne omei’e. Ze hahasoa ty fiaignantikagne avao ro anoroa i Jehovah.—Vakio ty Salamo 73:27, 28; Jakoba 4:4, 8.