Ty atao tihoe Filan-keve-pitantanagne, le lahilahy Kristiana matotse tsiampeampe, magnomey tari-dalagne hoahy ty Vavolombelo i Jehovah magneran-tane. Mizara roe ty asa iareo:

•   Iareo ty miandraikitse ty fagnomanagne ty raha haboake amo o boke aman-gazeteo, ty raha hianaragne am-pivoriagne agne naho ty amy sekoly ara-baiboly atao o Vavolombelo i Jehovah-o.​—Lioka 12:42.

•   Iareo ty magnara-maso ty asa atao ty Vavolombelo i Jehovah magneran-tane, zane hoe mitarike ty asa fitoriagne atao’ay sady miandraikitse ty fampiasagne ty vola fagnomezagne.

 Magnorike ty raha natao i “apostoly naho i androanavy ta Jerosalema agne” tamy taonjato voaloha’e rey, o Filan-keve-pitantanagneo. Iareo ty nandrambe ze fanapahan-kevetse lahibey nila nirambesegne tamy izay mba hahasoa o fiangonagneo. (Asa o Apostolio 15:2) Faie tsy iareo ty mpitarike ty fiangonagne Kristiana. Hoe izay avao ka fa tsy iareo agnisa ty Filan-keve-pitantanagne ty mpitarike ty fandamina’ay. Mipay ty tari-dala ty Baiboly iareo naho fa hanapa-kevetse satria eké iareo fa i Jesosy Kristy ro nitendré i Jehovah Andrianagnahare ho Loha ty fiangonagne.​—1 Korintianina 11:3; Efesianina 5:23.

Ia iaby ty agnisa ty Filan-keve-pitantanagne?

 Intoagne iaby ty agnisa ty Filan-keve-pitantanagne: I Kenneth Cook, i Gage Fleegle, i Samuel Herd, i Geoffrey Jackson, i Jody Jedele, i Stephen Lett, i Gerrit Lösch, i Jacob Rumph, i Mark Sanderson, i David Splane, naho i Jeffrey Winder. Manompo amy ty foibei’ay a Warwick, a Etazonia agne iareo.

Akore ty fomba fiasa o Filan-keve-pitantanagneo?

 Nanangagne komity enegne o Filan-keve-pitantanagneo mba hiandraikitse ty asa sambe hafa atao’ay Vavolombelo i Jehovah. Manompo amy ty raike amo o komity reo ao ndra amy ty maromaro ama’e ty tsikiraidraike amo o Filan-keve-pitantanagneo.

•   Komity ty Mpandrindra: Iareo ty miandraikitse ze raha miomba ty lalàna. Mandrambe andraikitse ka iareo naho fa misy loza ndra naho fa enjehegne noho ty finoa’e o Vavolombelo i Jehovah-o ndra naho fa misy olagne hafa mila alamigne malaky.

•   Komity ty Mpiasa: Iareo ty miandraikitse ty fandaminagne ty keleia i Betela.

•   Komity ty Asa Fanoagne Pirinty: Iareo ty miandraikitse ty fanoagne pirinty boke naho gazete vaho ty fandefasagne aze. Magnara-maso ty fagnoregnagne toeram-pivoriagne, birò fandikan-drehake vaho tragno i sampagne ka iareo.

•   Komity ty Fanompoagne: Iareo ty miandraikitse ty asa fitoriagne atao’ay, tsy inogne izay fa ty fitoriagne ty “talily soa i Fanjakagney.”​—Matio 24:14.

•   Komity ty Fampianaragne: Iareo ty miandraikitse ty fagnomanagne ty hanegne ara-pagnahy omeagne amy ty alala ty fivoriagne, sekoly isan-karaza’e, video vaho fandaharagne hafa alaem-peo.

•   Komity ty Fanoratagne: Iareo ty miandraikitse ty fagnomanagne ty fampianaragne Ara-baiboly haboake amo o boke naho o gazete vita pirintio vaho amy tragnom-poraro’ay ao. Iareo ka ty miandraikitse ty asa fandikan-drehake.

 Ankoatse ty asa atao ty Filan-keve-pitantanagne amo o komity reo ao, le mivory ka iareo isan-keregnandro mba handineke ty raha ilae ty fandamina’ay. Mandineke ze raha rehafe ty Soratse Masigne iareo amo o fivoriagne reo sady magneke ho tarihe ty fagnahy masin’Andrianagnahare, le miharo saigne amy ze fanapahan-kevetse horambesegne.​—Asan’ny Apostoly 15:25.

Ia ka i aze atao tihoe mpagnampe ty Filan-keve-pitantanagne rey?

 Kristiana azo atokisagne iareo, le magnampe i komity ty Filan-keve-pitantanagne rey. (1 Korintianina 4:2) Fa mahay soa ty asa atao amy i komity misy azey ao iareo sady managne traikefa amy izay. Magnatreke ty fivoriagne isan-keregnandro atao ty komity misy aze ka iareo. Ndra tie tsy iareo aza ty manapa-kevetse, le magnomey soso-kevetse naho fagnazavagne mete hilaegne iareo. Magnatanterake ze fanapahan-keve i komitỳ ka iareo sady magnara-maso mateteke ty voka i fanapahan-kevetsey. Va’e hasae ty Filan-keve-pitantanagne hitilike ty Vavolombelo i Jehovah nama’ay amy ty toeragne maro magneran-tane iareo, ndra va’e hotendregne hanao anjara amy ty fivoriagne fatao isan-taogne ndra amy ty Fizaràgne Diploma i Gileada.