Tea magnalio ty vata’e amy ty lela’e o pisò. Fa ho ampahaefa ty fotoa’e ty lanie’e agnaliovagne ty vata’e naho fa tsy miroro reke. Mahavita magnalio soa ty vata’e o pisò satria tena hafa ty fomba nagnamboaragne ty lela’e.

 Dineho zao: Misy raha kedekede maragnidragnitse miisake 290 eo ho eo ty amy ty lela o pisò. Sambe misy karaza kanaly kedekede iaby ty agnate ireo ao. Naho ampidire o pisò ambava’e ao i lela’ey, le avy le misy rora mizilike ty amy i kanaly rey eo. Isake tie mitsela i volo’ey areke reke, le mandalo amy i voloy eo i raha maragnidragnitse kedekedey, le mamoake rora mandeha amy i holi’ey agne.

 Afake minday rora 48 mililitatse eo ho eo isan’andro mandeha amy i holi’ey agne naho amy i volo’ey agne ty lela o pisò. Misy anzima magnafake loto ty amy i rora’e ignehoe ao. Naho fa manjare etogne ka i rora’ey, le magnampe ty vata o pisò mba hanintsinintsigne avao ka igne. Tena paliae o pisò zay satria tsy ampe avao ty raha mitagne hafanagne amy ty vata’e ao.

 Naho fa misy mipako ty amy ty volo o pisò, le mipaike eo ty raike amy i raha maragnidragnitse amy i lela’e reỳ, le mizilike agnate volo’e agne, le mihamatanjake sady mampisaratsarake i voloy. Naho fa magnalio ty vata’e ka o pisò, le mikasike i holi’ey i loha i raha maragnidragnitse amy i lela’ey reỳ. Misy voka’e soa amy ty holi’e zay. Nangala tahake ty lela o pisò o mpikarokeo, le nagnandragne namboatse borosim-bolo tsy mitovy amo o borosim-bolo mahazatseo. Mora liovegne io, sady tsy voatere manintogne mafe rehe naho fa mampiasa aze. Mora ogoagne ka ze volo mipako naho fa tratse’e. Mieretseretse o mpikarokeo tie va’e hagnampe iareo hahatrea hevetse soa ty lela o pisò, agnisa izay ohatse tihoe, mba hamboaragne fitaovagne mete soa hagnaliovagne toeragne feno volo, ndra mba hagnasoagne ty fomba fagnosoragne ranon-draha ndra fagnafoly amy ty holitse misy volo.

 Akore ty heve’o? Vokatse ty evolisiona vao ty lela o pisò, sa nisy namorogne?