Amy itika mbe tan-troke aoy, le sela raike kedekede heike ty niatombohantikagne. Tsy trea ty maso zay naho tsy henteagne amy ty mikroskopy. Ie afake volagne maromaro afara atoy, le manjare ajaja i sela kidikidy raike ignehoe. Manjare maro i sela raikey sady mamorogne sela 200 mahery sambe karaza’e. Sambe managne ty pozi’e iareo, ty habei’e naho ty asa’e.

 Dineho zao: Manjare mivaky roe i sela raikey sady mitovy iaby ty ADN amy iareo ao tsikiraidraike. Le lia’e mivaky mivaky hoe izay iaby avao ty sela tsikiraidraike. Amy ty voaloha’e i sela vaovao rey, le mitovitovy iaby. Misy ADN ty amo o sela tsikiraidraike reo ao. Le fa amy i ADN-y ao ty fagnazavagne ilae’e, mba hahafaha’e mamorogne sela sambe karaza’e.

 Heregnandro raike afara ty iforogna i sela rey, le manjare mizara ho karaza’e roe iareo. Ty ila’e amy i sela rey zao manjare ajaja, ty ila’e manjare entan’ajaja, le ty ila’e manjare sela maromaro mitambatse magnampe amy ty fitomboa i ajajay.

 Ie naho fa amy i heregnandro fahateloy, le manjare telo sosogne i sela manjare ajajay. I sela amy i sosogne fara’e ambone rey, le manjare nerf, betro, vava, holitse naho sela hafa amy i ajajay. I sosogne agnivoy ka manjare lio, taolagne, voa, hozatse naho sela hafa mitambatambatse. Le i sosogne fara’e ambaney amy izay manjare taova. Agnisa izay ty rabo, tragnon’amany naho taova sambe hafa fandevonan-kanegne.

 Amy i ajajay mbe agnate troke aoy, le misy amy ty ila’e amy i sela rey mifindrafindra amy ty faritse ila’e amy ty vata i ajajay ao. Ty ila’e mandeha raike fa ty ila’e ka mandeha mitambatambatse. Naho fa mitambatambatse ty ila’e amy i sela rey, le manjare hoe lamba manify ty ila’e, ty ila’e mirohidrohy manahake o talio, le ty ila’e hoe lavadavake. Misy fotoagne zao ohatse i sela hoe lamba manifỳ le mihoronkorogne, le manjare hoe tiò kidikidy zay. Agnate fotoagne raike avao ty isehoa izay, amy ty faritse sambe hafa magneneke ty vata i ajajay. Afara izay i raha hoe tiò kidikidỳ le miezagne sady misampatsampagne vaho mifandrae, le manjare lalan-drà.

 Amy i fotoagne iterahagne i ajajaỳ, le fa misy sela anjato’e miliara ty agnate’e ao. Fa vory soa iaby ty karaza ty sela agnate’e ao sady fa amy ty toera’e tamy ty fotoagne mete.

 Akore ty heve’o? Nisinisy hoaze avao vao ty fahaia o sela mamorogne sela hafa sambe karaza’e naho mamantatse ty asa toko’e hatao’e, sa nisy namorogne?