Skip to content

Iha mundu tomak Testemuña ba Jeová hamutuk naʼin-hira?

Iha mundu tomak Testemuña ba Jeová hamutuk naʼin-hira?

Relatóriu serbisu nian ba tinan * 2018

Totál husi Testemuña ba Jeová iha mundu tomak

8.579.909

Kongregasaun

119.954

Testemuña ba Jeová haklaken iha rai

240

Oinsá imi sura imi-nia membru sira?

Só sira neʼebé fulan-fulan hola parte iha serbisu atu haklaken Maromak nia Ukun mak ami sura nuʼudar Testemuña ba Jeová. (Mateus 24:14) Neʼe inklui sira neʼebé hetan ona batizmu no mós sira neʼebé kumpre kritériu atu haklaken maibé seidauk hetan batizmu.

Atu sai membru ida, ita presiza fó osan ka lae?

Lae. Atu sai Testemuña ba Jeová, hetan knaar ka priviléjiu ruma iha ami-nia organizasaun, neʼe la depende ba osan neʼebé ita fó ka la fó. (Apóstolu 8:​18-​20) Tuir loloos, dala barak, ema seluk la hatene sé mak fó kontribuisaun. Testemuña ida-idak uza sira-nia tempu, oras, no buat neʼebé sira iha atu apoia serbisu haklaken tuir sira-nia kbiit no situasaun.​—2 Korinto 9:7.

Oinsá imi bele hatene ema naʼin-hira mak hola parte daudaun iha serbisu haklaken?

Kada fulan, haklaken-naʼin ida-idak hatama sira-nia relatóriu haklaken nian ba sira-nia kongregasaun ida-idak. Atu hatama relatóriu neʼe laʼós obrigatóriu.

Totál relatóriu husi kongregasaun ida-idak sei tau hamutuk, no sei haruka ba rai ida-idak nia sukursál. Depois, sukursál ida-idak sei haruka fali totál sira-neʼe ba ami-nia sede-jerál.

Kada tinan serbisu nian nia rohan, * ami sei haree Testemuña iha naʼin-hira iha rai ida-idak no foti númeru neʼebé aas liu husi rai ida-idak. Númeru sira-neʼe sei tau hamutuk atu bele hatene totál husi Testemuña ba Jeová iha mundu tomak. Relatóriu husi rai ida-idak sei fó sai iha ami-nia sítiu ofisiál iha parte ida ho naran “Mundu Tomak”. Relatóriu sira-neʼe fó laran-manas ba ami, hanesan buat neʼebé akontese ba ema kristaun sira iha tempu antigu.​—Apóstolu 2:​41; 4:4; 15:3.

Imi mós sura sira neʼebé la hola parte iha serbisu haklaken ka lae?

Lae. Maibé ami nafatin simu sira iha ami-nia kongregasaun. Sira barak tinan-tinan tuir Memoriál kona-ba Kristu nia mate, tan neʼe, atu hatene ema sira-neʼe maizumenus naʼin-hira, bele kompara totál husi ema neʼebé tuir Memoriál ho Testemuña naʼin-hira iha mundu tomak. Iha 2018, ema neʼebé tuir memoriál hamutuk naʼin-20.329.317.

Sira barak neʼebé la tuir ami-nia reuniaun mós hetan benefísiu liuhusi ami-nia programa estudu Bíblia neʼebé gratis iha sira rasik nia uma. Iha 2018, ami halaʼo estudu Bíblia ho ema hamutuk naʼin-10.079.709 fulan-fulan. No maski ami estuda ho ema naʼin-rua ka liu iha tempu ida deʼit, maibé ami sura nuʼudar estudu ida deʼit.

Tanbasá númeru sensus neʼebé governu fó sai kona-ba Testemuña ba Jeová barak liu fali númeru neʼebé imi fó sai?

Bainhira governu halaʼo sensus atu hatene ema naʼin-hira, baibain sira husu ema mak fó-hatene rasik sira-nia relijiaun saida. Porezemplu, organizasaun neʼebé halaʼo sensus iha rai-Estadus Unidus hatete katak sira-nia hakarak mak atu buka-hatene ema neʼebé haree sira-nia an nuʼudar membru husi relijiaun ruma ka laʼós, tan neʼe rezultadu husi sira-nia sensus tuir deʼit ema nia opiniaun, laʼós tuir informasaun neʼebé loos.

^ par. 2 Tinan serbisu nian mak komesa husi 1 Setembru 2016 toʼo 31 Agostu 2017 iha tinan tuirmai. Porezemplu, tinan serbisu 2015 nian mak husi 1 Setembru 2014 toʼo 31 Agostu 2015.

^ par. 16 Tinan serbisu nian mak komesa husi 1 Setembru 2016 toʼo 31 Agostu 2017 iha tinan tuirmai. Porezemplu, tinan serbisu 2015 nian mak husi 1 Setembru 2014 toʼo 31 Agostu 2015.