Skip to content

Tansá mak Testemuña ba Jeová la selebra Natál?

Tansá mak Testemuña ba Jeová la selebra Natál?

Ema barak hanoin sala kona-ba ami, porezemplu:

Ema nia hanoin sala: Testemuña ba Jeová la selebra Natál tanba sira la fiar ba Jesus.

Realidade: Ami Testemuña ba Jeová mak ema kristaun. Ami fiar metin katak liuhusi Jesus Kristu deʼit mak ita ema bele hetan salvasaun.—Apóstolu 4:12.

Ema nia hanoin sala: Testemuña ba Jeová haketak moris família nian tanba sira hanorin ema seluk iha família laran labele selebra Natál.

Realidade: Ami hanoin no hafolin tebes moris família, no ami uza Bíblia atu ajuda moris família nian sai metin liután.

Ema nia hanoin sala: Testemuña sira lakohi hatudu hahalok diʼak sira neʼebé ema barak hatudu durante tempu Natál, hanesan buka dame iha mundu tomak, hatudu laran-luak no laran-diʼak ba ema seluk.

Realidade: Ami hakaʼas an atu hatudu laran-luak no buka dame loroloron. (Provérbios 11:25; Roma 12:18) Porezemplu, ami halaʼo reuniaun no haklaken hodi halo tuir Jesus nia liafuan, dehan: “Imi simu la selu, fó mós hodi la hein atu ema selu imi.” (Mateus 10:8) Ami mós fahe esperansa furak ba ema seluk katak Maromak nia Ukun deʼit mak sei lori dame ba mundu tomak.—Mateus 10:7.

Tansá mak Testemuña ba Jeová la selebra Natál?

  • Jesus haruka ema atu komemora ninia mate, laʼós ninia loron-moris.—Lucas 22:19, 20.

  • Jesus nia apóstolu no ninia dixípulu sira la selebra Natál. Tuir New Catholic Encyclopedia dehan, “ema foin hahú selebra Jesus nia loron-moris tempu balu depois tinan 243 liutiha Kristu”, neʼe katak liutiha tinan atus ida resin depois apóstolu ida ikus mate.

  • Ema ida la bele prova katak Jesus moris duni iha loron 25 Dezembru; Bíblia la fó sai kona-ba data neʼebé Jesus moris iha rai.

  • Ami fiar katak Maromak la kontente ho Natál, tanba Natál nia hun mak husi ema jentiu sira-nia lisan no selebrasaun.—2 Korinto 6:17.

Selebra deʼit Natál, neʼe la buat ida, loos ka lae?

Maski ema barak hatene ona katak Bíblia la fó-hatene ho loloos sá loron mak Jesus moris, no mós Natál nia hun mak husi ema jentiu nia selebrasaun, maibé sira nafatin selebra Natál. Ema sira hanesan neʼe karik hanoin: ‘Tansá mak haʼu tenke hanoin demais atu selebra ka la selebra Natál? Selebra deʼit Natál hodi halo ema seluk kontente, neʼe la buat ida, loos ka lae?’

Bíblia anima ita atu tetu rasik ho ita ida-idak nia “kbiit atu hanoin”. (Roma 12:1, 2) Bíblia mós hanorin ita atu hafolin lia-loos no halo tuir. (João 4:23, 24) Tan neʼe, maski ami hanoin ema seluk nia sentimentu kona-ba ami no lakohi halo ema seluk la kontente ho ami, maibé ami nafatin hakarak halo tuir Bíblia nia matadalan sira.

Maski ami la selebra Natál, maibé ami respeitu nafatin ema seluk nia direitu atu halo tuir sira ida-idak nia hakarak rasik, tan neʼe ami la bandu no la hanetik ema seluk neʼebé hakarak selebra Natál.