Skip to content

Tansá mak Testemuña ba Jeová la envolve an iha funu?

Tansá mak Testemuña ba Jeová la envolve an iha funu?

Tansá mak Testemuña ba Jeová la envolve an iha funu, razaun sira mak tuirmai neʼe:

  1. Halo tuir Maromak. Bíblia dehan katak Maromak nia atan sira sei “tuku sira-nia surik sai xarrua no sira-nia diman sai kateri ai-sanak nian” no “sei la aprende tan funu”.—Isaías 2:4.

  2. Halo tuir Jesus. Dala ida Jesus fó-hatene ba apóstolu Pedro: “Hatama fali ó-nia surik ba nia fatin, tanba ema hotu neʼebé kaer surik sei mate ho surik.” (Mateus 26:52) Nuneʼe, Jesus hatudu katak ninia dixípulu sira sei nunka envolve an iha funu.

    Jesus nia dixípulu sira halo tuir ninia mandamentu atu la sai “parte husi mundu neʼe”, neʼe katak sira hakaʼas an atu neutrál nafatin kona-ba buat polítiku nian. (João 17:16) Sira mós sei la kontra hasoru militár nia serbisu ka hapara ema sira neʼebé hakarak tama serbisu militár.

  3. Hadomi ema seluk. Jesus haruka ninia dixípulu atu “hadomi malu”. (João 13:34, 35) Tan ida-neʼe mak sira iha unidade no sai ida deʼit nuʼudar maluk fiar-naʼin iha mundu tomak no sira nunka hakarak atu halo funu hasoru sira-nia maluk.—1 João 3:10-12

  4. Banati-tuir ema kristaun iha apóstolu sira-nia tempu. Livru The Encyclopedia of Religion and War fó sai katak “Jesus nia dixípulu sira mak ema sira neʼebé lakohi hola parte iha funu no tama militár” tanba sira hatene katak hahalok hanesan neʼe “la tuir prinsípiu kona-ba Jesus nia domin no ninia mandamentu kona-ba atu hadomi inimigu sira”. Nuneʼe mós matenek-naʼin ida iha rai-Alemaña naran Peter Meinhold dehan katak ba ema kristaun iha apóstolu sira nia tempu, “sai ona ema kristaun ida no tama fali militár neʼe mak buat neʼebé labele tau hamutuk”.

Hakarak halo buat diʼak iha komunidade nia leet

Testemuña ba Jeová mak ema sira neʼebé hatudu hahalok diʼak iha komunidade nia leet no la estraga unidade no dame iha fatin neʼebé sira hela. Ami respeitu ukun-naʼin sira governu nian hanesan buat neʼebé Bíblia hatete tuirmai neʼe:

  • “Hakruʼuk ba ukun-naʼin sira.”—Roma 13:1.

  • “Fó ba Liurai Roma buat neʼebé Liurai Roma nian.”—Mateus 22:21.

Tan neʼe, ami halo tuir lei, selu impostu, no apoia governu sira atu halaʼo moris hakmatek no dame iha komunidade.