Skip to content

Saida mak Testemuña ba Jeová nia hanoin kona-ba serimónia hakoi ema mate?

Saida mak Testemuña ba Jeová nia hanoin kona-ba serimónia hakoi ema mate?

Ami-nia fiar no hanorin hotu bazeia ba Bíblia, inklui mós kona-ba serimónia hakoi ema mate. Hanorin balu neʼebé ami fiar mak:

  • Kuandu ema neʼebé ita hadomi mate, ita sente triste tebes. Jesus nia dixípulu sira sente triste tebes kuandu ema neʼebé sira hadomi mate. (João 11:33-​35, 38; Apóstolu 8:2; 9:​39) Ami la haree serimónia neʼe nuʼudar tempu atu halo festa arbiru. (Eclesiastes [Pengkhotbah] 3:​1, 4; 7:​1-4) Maibé neʼe mak tempu atu hatudu domin ba sira neʼebé sente triste tebes.​—Roma 12:15.

  • Ema neʼebé mate ona la hatene buat ida. Maski ami mai husi kultura oioin, maibé ami la halo tuir kostume neʼebé bazeia ba fiar neʼebé kontra Bíblia nia hanorin, hanesan fiar kona-ba mate-klamar neʼebé bele ajuda ka halo aat ba ema neʼebé sei moris. (Eclesiastes [Pengkhotbah] 9:​5, 6, 10) Neʼe inklui hadeer-mate, ai-funan moruk, ai-funan midar, kore-metan, oho animál atu hasaʼe ba matebian, ka koʼalia ba ema mate. Ami la hola parte iha atividade sira-neʼe tanba ami halo tuir Bíblia nia matadalan neʼebé dehan: “Haketak imi-nia an, . . . no keta kona buat neʼebé la moos.”​—2 Korinto 6:​17.

  • Iha esperansa ba ema neʼebé mate ona. Bíblia hanorin katak ema neʼebé mate ona sei hetan moris-hiʼas no mate sei la iha tan. (Apóstolu 24:15; Apokalipse 21:4) Esperansa neʼe ajuda ema fiar-naʼin sira iha tempu uluk no mós ohin loron atu la triste demais.​—1 Tesalónika 4:​13.

  • Bíblia fó konsellu atu halaʼo serimónia neʼebé simples. (Provérbios [Amsal] 11:2) Ami fiar katak serimónia hakoi ema mate laʼós tempu atu buka oin hodi hatudu ita-nia rikusoin ba ema seluk. (1 João 2:​16) Ami la halo serimónia ka festa neʼebé gasta osan barak, ka uza kaixaun neʼebé karun atu hatudu ami-nia rikusoin ba ema seluk.

  • Ami la obriga ema seluk atu iha fiar hanesan ho ami-nian kona-ba serimónia hakoi ema mate. Ami halo tuir Bíblia nia matadalan neʼebé dehan: “Ita ida-idak sei hatán ba Maromak kona-ba ita-nia hahalok rasik.” (Roma 14:12) Maibé se ema husu kona-ba ami-nia fiar, ami hakaʼas an atu esplika ho “laran-maus no respeitu”.​—1 Pedro 3:​15.

Testemuña ba Jeová nia serimónia hakoi mate mak hanesan saida?

Fatin: Se família ida deside atu halaʼo serimónia hakoi ema mate, sira bele hili fatin hanesan ami-nia reuniaun-fatin, uma, fatin neʼebé sira bele aluga, ka rate.

Programa: Ami halaʼo reuniaun no hatoʼo diskursu husi Bíblia neʼebé sei fó kmaan ba ema hodi esplika kona-ba mate no esperansa moris-hiʼas nian. (João 11:25; Roma 5:​12; 2 Pedro 3:​13) Liuhusi programa neʼe, ami bele hanoin fali kona-ba hahalok diʼak neʼebé ema mate neʼe hatudu durante ninia moris, no aprende oinsá mak ami bele halo tuir ninia ezemplu diʼak neʼe.—2 Samuel 1:​17-​27.

Baibain, ami mós kanta knananuk neʼebé bazeia ba Bíblia. (Koloso 3:​16) Programa neʼe sei remata ho orasaun neʼebé sei fó kmaan ba rona-naʼin hotu.​—Filipe 4:​6, 7.

Selu ka ezmola: Ami-nia reuniaun hotu mak gratis, inklui mós ami-nia serimónia hakoi ema mate, no ami mós la husu ezmola iha ami-nia reuniaun.​—Mateus 10:8.

Ema neʼebé tuir: Ema neʼebé laʼós Testemuña mós bele tuir serimónia neʼebé ami halaʼo iha ami-nia reuniaun-fatin. Hanesan ho ami-nia reuniaun sira seluk, ema hotu bele asiste serimónia hakoi ema mate.

Testemuña ba Jeová tuir serimónia hakoi ema mate neʼebé relijiaun seluk mak halaʼo?

Testemuña ba Jeová ida-idak sei deside rasik tuir sira-nia konxiénsia neʼebé treinu ona husi Bíblia. (1 Timóteo 1:​19) Maibé, ami la hola parte iha serimónia neʼebé kontra Bíblia nia matadalan.​—2 Korinto 6:​14-​17.