Skip to content

Testemuña ba Jeová sira haklaken husi uma ba uma atu sira bele hetan salvasaun nuʼudar sira-nia kolen ka lae?

Testemuña ba Jeová sira haklaken husi uma ba uma atu sira bele hetan salvasaun nuʼudar sira-nia kolen ka lae?

Lae. Maski ami haklaken beibeik, maibé ami la hanoin katak atividade hanesan neʼe mak fó garantia ba ami atubele hetan salvasaun. (Éfeso 2:8) Tanbasá?

Hanoin toʼok ezemplu tuirmai neʼe: Iha ema diʼak ida neʼebé riku tebes promete katak nia sei fó prezente ida neʼebé karun tebes ba ema hotu neʼebé bá toʼo fatin ida neʼebé nia fó-hatene ona. Nia mós fó-hatene sá loron no sá oras mak nia sei fó prezente neʼe ba ema hotu. Se Ita tau fiar duni ba ema riku neʼe, Ita sei halo tuir ninia liafuan sira atubele simu prezente neʼe, loos ka lae? Karik Ita mós hakarak tebes atu fó-hatene kona-ba ida-neʼe ba Ita-nia belun no família sira hodi sira mós bele simu prezente. Maski nuneʼe, prezente neʼebé Ita simu mak laʼós katak kolen neʼebé Ita manán tanba Ita halo tuir ona ema riku neʼe nia liafuan, maibé prezente mak nafatin prezente deʼit, loos ka lae?

Hanesan neʼe mós, ami Testemuña ba Jeová fiar katak Maromak sei fó moris rohan-laek ba ema hotu neʼebé halo tuir nia. (Roma 6:23) Tan neʼe, ami hakaʼas an atu fahe ami-nia fiar ba ema seluk, tanba ami hakarak sira mós bele simu bensaun husi Maromak nia laran-diʼak. Maibé ami la hanoin katak hodi haklaken, ami bele manán salvasaun nuʼudar ami-nia kolen. (Roma 1:17; 3:28) Tuir loloos, la iha ema ida mak bele halo hahalok diʼak tebes toʼo merese hetan bensaun furak husi Maromak, hanesan simu moris rohan-laek. Bíblia dehan, Maromak salva ita “laʼós tanba buat loos neʼebé ita halo, maibé tanba ninia laran-sadiʼa”.—Tito 3:5.