Skip to content

Ema ida bele hili atu rezigna an husi Testemuña ba Jeová ka lae?

Ema ida bele hili atu rezigna an husi Testemuña ba Jeová ka lae?

Bele. Ema bele hili dalan rua atu rezigna an:

  • Nia mak husu. Ema ida bele fó-hatene ho ibun ka hakerek karta deʼit katak nia foti ona desizaun atu lakohi tan sai Testemuña ba Jeová.

  • Ho buat neʼebé nia halo. Ema ida bele halo buat ruma hodi hatudu katak nia lakohi tan atu sai Testemuña ba Jeová. (1 Pedro 5:9) Porezemplu, karik nia tama fali relijiaun seluk no nia fó-hatene katak nia hakarak metin ho relijiaun neʼe ona.​—1 João 2:​19.

Oinsá se ema ida la haklaken ona ka la tuir tan reuniaun sira, ba imi, ema neʼe rezigna an ona ka lae?

Lae. Ema neʼebé rezigna an ka lakohi tan hamutuk ho ami, la hanesan ho ema neʼebé sai fraku iha fiar. Baibain ema neʼebé ladún laʼo ba oin ka la halaʼo ona atividade adorasaun nian la dehan katak nia husik ona ninia fiar, maibé tanba nia laran-tun. Ba ema hanesan neʼe, ami koko atu fó konsola no apoia nafatin sira duké hasees an husi sira. (1 Tesalónika 5:​14; Judas 22) Se ema ida mak husu ajuda, katuas kongregasaun sei ajuda fali ema neʼe atu hametin fali ninia relasaun ho Maromak.​—Galásia 6:1; 1 Pedro 5:​1-3.

Maibé, katuas sira sei nunka atu haruka ka obriga ema ida atu sai nafatin nuʼudar Testemuña ba Jeová. Ema ida-idak mak hili nia rasik nia relijiaun. (Josué [Yosua] 24:15) Ami hakarak ema adora Maromak ho sira-nia hakarak rasik, husi sira-nia laran.​—Salmo (Mazmur) 110:3; Mateus 22:37.