Skip to content

Tanbasá mak Testemuña ba Jeová nia dalan atu komemora Jesus nia loron mate la hanesan ho relijiaun sira seluk?

Tanbasá mak Testemuña ba Jeová nia dalan atu komemora Jesus nia loron mate la hanesan ho relijiaun sira seluk?

Bainhira ami komemora “Naʼi nia Han-Kalan”, (neʼebé mós bele bolu nuʼudar Páskua ka Memoriál kona-ba Jesus nia mate) ami halo tuir deʼit buat neʼebé Bíblia hatete kona-ba tempu neʼe. (1 Korinto 11:20) Maibé relijiaun barak nia kostume no fiar kona-ba Naʼi nia Han Kalan la bazeia ba Bíblia.

Objetivu

Objetivu ba komemorasaun neʼe mak atu hanoin fali Jesus neʼebé fó ninia moris nuʼudar sakrifísiu mai ita hodi hatudu agradese. (Mateus 20:28; 1 Korinto 11:24) Komemorasaun neʼe laʼós sakramentu ida neʼebé ita halo hodi hetan perdua ba ita-nia sala. * Bíblia hatete katak ita bele hetan perdua, laʼós liuhusi komemorasaun ka selebrasaun ruma, maibé liuhusi fiar deʼit ba Jesus.​—Roma 3:25; 1 João 2:1, 2.

Komemora dala hira?

Jesus haruka ninia dixípulu sira atu komemora Naʼi nia Han-Kalan, maibé nia la dehan loloos dala hira. (Lucas 22:19) Ema balu hanoin katak tenke komemora neʼe fulan-fulan, ema seluk komemora ida-neʼe semana-semana, loron-loron, dala balu iha loron ida, ka tuir deʼit ema ida-idak nia sentimentu. Maibé ita presiza hanoin kona-ba buat importante balu.

Jesus mak hahú selebrasaun neʼe iha loron neʼebé ema judeu sira selebra festa Páskua ka Festa Salvasaun nian, no depois nia mate mós iha loron neʼebé hanesan. (Mateus 26:​1, 2) Ida-neʼe akontese iha loron ida deʼit nia laran. Eskritura sira kompara Jesus nia sakrifísiu hanesan ho bibi-oan ba Festa Salvasaun nian. (1 Korinto 5:​7, 8) Ema judeu sira selebra Festa Salvasaun nian iha tinan ida dala ida. (Êxodo [Keluaran] 12:​1-6; Levítico [Imamat] 23:5) Hanesan mós ema kristaun iha tempu uluk, sira hanoin fali Jesus nia loron-mate iha tinan ida dala ida, * tan neʼe Testemuña ba Jeová halo tuir deʼit ezemplu iha Bíblia.

Loron no oras

Ezemplu neʼebé Jesus hatudu ajuda ita atu laʼós deʼit hatene kona-ba dala hira mak komemora nia loron mate maibé mós kona-ba loron no oras. Nia komesa selebrasaun neʼe depois loro-matan monu iha loron 14 fulan-Nisan tinan 33 depois Kristu hodi tuir kalendáriu iha Bíblia nia tempu. (Mateus 26:18-​20, 26) Tan neʼe, tinan-tinan ami kontinua selebra Jesus nia loron-mate iha data neʼebé hanesan, hodi halo tuir ema kristaun iha tempu uluk. *

Maski iha tempu uluk loron 14 fulan-Nisan tinan 33 depois Kristu, monu iha loron-sesta, maibé tinan-tinan loron ba selebrasaun neʼe la hanesan. Ami determina data 14 fulan-Nisan tinan-tinan hodi uza métodu neʼebé hanesan ema uza iha Jesus nia tempu. *

Paun no tua

Jesus uza paun neʼebé laiha fermentu no tua restu husi Festa Salvasaun nian hodi hahú selebrasaun foun. (Mateus 26:26-​28) Tan neʼe mak ami uza paun neʼebé laiha fermentu ka la kahur ho buat ruma, no tua-uvas mean, laʼós uvas been ka tua neʼebé halo midar ona, ka kahur ona ho buat ruma.

Relijiaun balu uza paun neʼebé halo ho fermentu, maibé baibain Bíblia uza liafuan fermentu atu reprezenta sala no korrupsaun. (Lucas 12:1; 1 Korinto 5:​6-8; Galásia 5:​7-9) Tan neʼe, só deʼit paun neʼebé laiha fermentu ka la kahur ho buat ruma mak bele reprezenta Kristu nia isin perfeitu neʼebé laiha sala. (1 Pedro 2:​22) Toman ida tan neʼebé la tuir Bíblia mak sira uza deʼit uvas been neʼebé seidauk sai tua. Sira halo hanesan neʼe tanba sira bandu ema atu la hemu tua, neʼe mós la tuir Bíblia.​—1 Timóteo 5:23.

Símbolu deʼit, laʼós isin no raan neʼebé loos

Paun neʼebé laiha fermentu no tua-uvas mean neʼebé uza iha komemorasaun neʼe mak símbolu deʼit hodi reprezenta Jesus nia isin no raan. Ema barak hanoin katak Jesus nia isin no raan mak nakfila sai paun no tua-uvas, maibé neʼe la loos. Haree toʼok eskritura sira neʼebé koʼalia kona-ba neʼe.

  • Se Jesus mak haruka ninia dixípulu sira atu hemu raan, neʼe hanesan nia kontra hasoru fali Maromak nia ukun-fuan kona-ba labele uza raan. (Gênesis [Kejadian] 9:4; Apóstolu 15:28, 29) Maibé Jesus la halo hanesan neʼe, nia nunka haruka ema seluk atu kontra Maromak nia ukun-fuan kona-ba raan tanba raan mak sagradu.​—João 8:28, 29.

  • Se apóstolu sira mak hemu duni Jesus nia raan, Jesus sei la dehan katak nia “sei fakar” ninia raan, neʼe hatudu katak iha tempu neʼebá nia raan seidauk fakar.​—Mateus 26:28.

  • Jesus nia sakrifísiu neʼe hasaʼe “dala ida ba nafatin”. (Ebreu 9:​25, 26) Maibé se paun no tua mak nakfila duni sai isin no raan durante komemorasaun neʼe, neʼe hatudu katak Jesus nia sakrifísiu neʼe hasaʼe ba dala barak, laʼós dala ida deʼit.

  • Jesus hatete: “Kontinua halo ida-neʼe hodi hanoin haʼu”, laʼós kontinua halo sakrifísiu mai haʼu.​—1 Korinto 11:24.

Sira neʼebé fiar katak paun no tua nakfila sai Jesus nia isin no raan, sira uza sala eskritura balu husi Bíblia nuʼudar doutrina. Porezemplu, iha tradusaun Bíblia balu tradús Jesus nia liafuan kona-ba tua: “Neʼe mak haʼu-nia raan”. (Mateus 26:28) Maibé Jesus nia liafuan neʼe mós tradús nuʼudar “ida-neʼe reprezenta haʼu-nia raan”. * Bainhira Jesus hanorin, nia sempre uza komparasaun atu reprezenta buat ruma.​—Mateus 13:34, 35.

Se mak sei han paun no hemu tua?

Bainhira Testemuña ba Jeová komemora Naʼi nia Han-kalan, ema uitoan deʼit husi ami mak sei han no hemu tua. Tanbasá?

Jesus ninia raan fakar atu halo “aliansa foun” hodi troka fali aliansa entre Maromak Jeová ho nasaun Izraél antigu. (Ebreu 8:​10-​13) Sira neʼebé hola parte iha aliansa foun mak bele han paun no hemu tua. Neʼe laʼós ema kristaun hotu maibé inklui deʼit “sira neʼebé Maromak bolu ona”. (Ebreu 9:​15; Lucas 22:20) Sira-neʼe mak sei ukun hamutuk ho Kristu iha lalehan, no Bíblia hatete katak só deʼit ema naʼin-144.000 mak hetan priviléjiu neʼe.​—Lucas 22:28-​30; Apokalipse 5:​9, 10; 14:​1, 3.

Sira neʼebé ukun hamutuk ho Jesus bolu nuʼudar “bibi-lubun kiʼik” no sira neʼebé bolu nuʼudar “ema-lubun boot” mak sei hetan moris ba nafatin iha rai. (Lucas 12:32; Apokalipse 7:​9, 10) Maski ita neʼebé iha esperansa atu moris ba nafatin iha rai la han ka hemu tua iha komemorasaun neʼe, maibé ita bele hatudu nafatin agradese ba sakrifísiu neʼebé Jesus halo ona mai ita.​—1 João 2:2.

^ par. 4 Livru McClintock and Strong’s Cyclopedia, Volume IX, pájina 212, hatete katak: “Iha Testamentu Foun, liafuan sakramentu nunka mosu; no mós liafuan Gregu μυστήριον [my·steʹri·on] nunka refere ba batizmu ka Naʼi nia Han-Kalan, ka komemorasaun seluk.”

^ par. 7 Haree livru The New Schaff-Herzog Encyclopedia of Religious Knowledge, Volume IV, pájina 43-​44, no McClintock and Strong’s Cyclopedia, Volume VIII, pájina 836.

^ par. 9 Haree livru The New Cambridge History of the Bible, Volume 1, pájina 841

^ par. 10 Ohin loron ema judeu nia kalendáriu modernu komesa sura fulan-Nisan bainhira sira haree fulan foun iha lalehan tuir dalan astronómiku nian, maibé apóstolu sira-nia tempu la hanesan neʼe. Iha sira-nia tempu sira komesa sura fulan-Nisan bainhira sira haree ona fulan foun foin mosu iha Jeruzalein, karik neʼe bele liutiha loron ida ka liu tuir dalan astronómiku nian. Tan neʼe dala ruma bainhira Testemuña ba Jeová sira komemora Memoriál neʼe la monu iha loron neʼebé ema judeu sira komemora Festa Salvasaun nian iha tempu modernu neʼe.

^ par. 20 Haree A New Translation of the Bible, by James Moffatt; The New Testament​—A Translation in the Language of the People, by Charles B. Williams; no The Original New Testament, by Hugh J. Schonfield.