Ami Testemuña ba Jeová la selebra loron moris tanba ami fiar katak Maromak hakribi no lakohi ema halo selebrasaun neʼe. Maski Bíblia la temi eskritura neʼebé bandu kona-ba selebrasaun neʼe, maibé Bíblia konta istória importante balu neʼebé ita presiza hanoin didiʼak. Bíblia mós ajuda ita atu komprende saida mak Maromak nia hanoin kona-ba selebrasaun neʼe. Hanoin toʼok kona-ba buat haat iha kraik no prinsípiu husi Bíblia tuirmai neʼe.

1.   Selebrasaun loron moris nian mai husi kostume antigu. Livru Funk & Wagnalls Standard of Dictionary Folklore, Mythology, and Legend hatete katak selebrasaun neʼe mai husi fiar neʼebé dehan, kuandu ema ida halo tinan “espíritu sira no buat aat sira bele ataka ema neʼebé halo tinan iha loron neʼe”. Livru neʼe hatutan tan katak “bainhira iha kolega sira neʼebé fó parabens, neʼe bele proteje ema neʼebé halo tinan”. Tuir livru The Lore of Birthdays dehan, iha tempu uluk, data moris nian mak importante atu hatene hodi nuneʼe bele siʼik kona-ba ema neʼe nia futuru tuir astrolojia. Iha livru neʼe mos temi katak, iha tempu uluk ema fiar katak lilin tinan nian iha májiku ka forsa boot atubele halo buat neʼebé ema hakarak sai loos.

    Bíblia bandu ema atu halo májiku, siʼik futuru, ka buat sira neʼebé envolve ho anju aat sira-nia atividade. (Deuteronômio [Ulangan] 18:14; Galásia 5:19-21) Razaun ida tanbasá Maromak fó kastigu ba sidade Babilónia antigu mak tanba ema iha neʼebá uza astrolojia atu siʼik futuru. (Isaías [Yesaya] 47:11-15) Neʼe laʼós katak ami Testemuña ba Jeová hakarak buka-hatene informasaun hotu kona-ba ema nia toman ida-idak. Maibé se Bíblia fó sai matadalan neʼebé loos, ami tenke halo tuir.

2.   Ema Kristaun iha tempu uluk la selebra loron moris. Livru The World Book Encyclopedia hatete katak tuir ema Kristaun sira iha tempu uluk nia hanoin katak “selebra ema ida nia loron moris mak ema jentiu nia kostume”. Bíblia hatudu katak ema hotu presiza halo tuir apóstolu no dixípulu sira nia ezemplu neʼebé sira hatudu tuir buat neʼebé Jesus rasik hanorin ona ba sira.​—2 Tesalónika 3:6.

3.   Selebrasaun ida deʼit neʼebé ema Kristaun tenke hanoin-hetan mak Jesus nia loron mate, laʼós ninia loron moris. (Lucas 22:17-20) Bíblia mos hatete katak “Naran ida diʼak liu fali mina neʼebé diʼak, no loron mate diʼak liu fali loron moris”. (Eclesiastes [Pengkhotbah] 7:1) Bainhira Jesus mate, nia iha naran neʼebé diʼak iha Maromak nia oin. Ida-neʼe halo nia loron mate importante liu fali ninia loron moris.​—Ebreu 1:4.

4.   Bíblia nunka temi katak Maromak nia povu selebra loron moris. Bíblia temi selebrasaun rua kona-ba festa loron moris nian neʼebé ema halo, sira mak ema neʼebé la serbí Maromak. Selebrasaun rua neʼe aat tebetebes.​—Gênesis (Kejadian) 40:20-22; Marcos 6:21-29.

 Hanesan ho inan-aman sira seluk, testemuña sira hadomi sira-nia oan. Sira mós fó prezente no halibur hamutuk iha tempu naran deit, laʼós iha loron-boot deʼit. Sira koko banati-tuir Maromak neʼebé fó buat diʼak ba Ninia povu iha tempu naran deʼit. (Mateus 7:11) Tan neʼe, testemuña nia oan sira la laran tun. Tuirmai mak sira balu nia komentáriu:

•   “Bainhira hau simu prezente derrepente deʼit laʼós tanba razaun ruma, neʼe halo haʼu kontente loos.”​—Tammy, tinan 12.

•   “Tanba haʼu la selebra tinan, tan neʼe haʼu la hetan prezente iha loron neʼe. Maibé, haʼu-nia amá-apá fó prezente haʼu iha loron sira seluk. Haʼu kontente tanba neʼe halo haʼu hakfodak tebes.”​—Gregory, tinan 11.

•   “Ó hanoin katak ba minutu sanulu deʼit, iha dose uitoan no kanta mak festa ona ka? Ó tenke mai haʼu-nia uma no haree toʼok festa iha haʼu-nia uma!”​—Eric, tinan 6.