Skip to content

Testemuña ba Jeová apoia ema Judeu sira atu harii fali sira-nia nasaun iha rai-Palestina ka lae?

Testemuña ba Jeová apoia ema Judeu sira atu harii fali sira-nia nasaun iha rai-Palestina ka lae?

Lae. Ami Testemuña ba Jeová mak ema Kristaun neʼebé sadere ba Bíblia nuʼudar ami-nia fiar nia hun. Maski relijiaun balu hanorin katak ema Judeu sira sei halibur daudaun iha rai-Palestina atu kumpre profesia husi Bíblia, maibé ami la hanoin hanesan neʼe. Ami la fiar katak movimentu polítiku nian neʼebé ema bolu Sionizmu mak liga malu duni ho liafuan neʼebé hakerek nanis iha Bíblia. Tuir loloos, Bíblia la dehan katak ema nia governu ida ka rasa ida mak sei sai aas liu fali governu ka rasa seluk. Livru Haklaken neʼebé Testemuña ba Jeová mak halo, hatete: “Bíblia nia liafuan la apoia atividade Sionizmu nian.”

Tuir Encyclopædia Britannica, Sionizmu katak “movimentu husi ema Judeu sira neʼebé hadomi tebes sira-nia nasaun, sira-nia hakarak mak atu harii nasaun Judeu nian ida iha rai-Palestina no apoia nasaun neʼe”. Sira halo ida-neʼe tanba sira-nia fiar relijiaun nian no mós polítiku nian. Ami Testemuña ba Jeová la apoia hanorin Sionizmu nian no ami-nia pozisaun mak neutrál nafatin kona-ba problema polítiku Sionizmu nian.

Organizasaun Testemuña ba Jeová mak organizasaun relijiaun nian no nunka mete ba problema polítiku sira, inklui mós movimentu Sionizmu nian. Kona-ba ami-nia pozisaun neutrál, ema barak iha mundu tomak hatene ho momoos, no iha rai balu, Testemuña balu hetan susar oioin tanba sira lakohi hola parte iha atividade polítiku nian. Ami fiar metin katak Maromak nia Ukun iha lalehan deʼit mak bele lori dame rohan-laek ba mundu neʼe, no ami fiar katak ema nia ukun ka movimentu ruma sei labele lori dame.

Maski ami Testemuña ba Jeová hela iha nasaun oioin, maibé ami hanoin katak importante tebes atu halo tuir nasaun ida-idak nia ukun-fuan. Ami nunka kontra hasoru governu, no ami mós nunka hola parte iha konflitu polítiku nian no nunka hola parte iha funu.