Skip to content

Se haʼu estuda Bíblia ho Testemuña ba Jeová, neʼe katak haʼu tenke sai Testemuña ba Jeová ida ka lae?

Se haʼu estuda Bíblia ho Testemuña ba Jeová, neʼe katak haʼu tenke sai Testemuña ba Jeová ida ka lae?

Lae, ami nunka obriga ema. Ema rihun ba rihun estuda Bíblia ho ami maski la sai Testemuña ba Jeová. * Ami-nia objetivu mak atu hatudu Bíblia nia hanorin ba Ita. Depois, Ita rasik mak deside atu halo saida. Ami hatene katak ema ida-idak mak tenke deside rasik kona-ba sira-nia fiar.​—Josué (Yosua) 24:15.

Haʼu bele uza haʼu-nia Bíblia rasik bainhira estuda ho Testemuña ba Jeová ka lae?

Sin. Maski ami gosta uza Bíblia Sagrada Tradusaun Mundu Foun neʼebé uza liafuan modernu no hakarak atu fó ida-neʼe ba ita, maibé ami mós kontente se Ita hakarak uza Ita-nia Bíblia rasik. Tuir loloos, ita bele aprende nafatin Bíblia nia mensajen neʼebé lori esperansa no salvasaun ba ita maski uza tradusaun Bíblia naran deʼit.

Tanbasá mak imi estuda ho ema neʼebé la sai Testemuña?

  • Razaun boot liu mak tanba ami hadomi Maromak Jeová, no Nia hakarak ema kristaun atu ajuda ema seluk hodi aprende kona-ba Nia. (Mateus 22:37, 38; 28:19, 20) Ba ami, la iha priviléjiu boot liu duké sai “Maromak nia maluk serbisu-naʼin” hodi hanorin Maromak nia Liafuan ba ema seluk.​—1 Korinto 3:​6-9.

  • Domin ba ema mós book ami atu estuda ho sira. (Mateus 22:39) Ami sente haksolok bainhira ami fahe fali hanorin furak neʼebé ami aprende ona.​—Apóstolu 20:35.

^ par. 2 Durante tinan 2018, ami halaʼo estudu 10.079.709 fulan-fulan, no dala barak ami halaʼo estudu ida ho ema naʼin-rua ka liu iha tempu hanesan. Maibé ema naʼin-281.744 deʼit mak hetan batizmu atu sai Testemuña ba Jeová iha tinan neʼe.