Skip to content

BÍBLIA TROKA EMA NIA MORIS

“Dalan sira sai fali haʼu-nia hela-fatin”

“Dalan sira sai fali haʼu-nia hela-fatin”
  • Tinan moris: 1955

  • Husi rai: rai-España

  • Moris uluk nian: Uza droga, hemu tua demais no halo violénsia

HAʼU-NIA MORIS ULUK NIAN

Ema balu presiza tempu kleur atu aprende husi sira rasik nia esperiénsia aat. Haʼu mós hanesan neʼe. Haʼu moris no sai boot iha Barcelona, sidade boot segundu iha rai-España. Haʼu-nia família hela iha área naran Somorrostro, tasi-ibun mak okupa área neʼe. Somorrostro mak sidade neʼebé nakonu ho violénsia no droga.

Haʼu-nia inan-aman iha oan naʼin-sia, no haʼu mak oan primeiru. Ami-nia família kiak tebes, entaun haʼu-nia aman haruka haʼu atu serbisu iha kampu tenis nian, haʼu-nia serbisu mak hili bola sira. Iha tempu neʼebá, haʼu tinan sanulu no loron-loron haʼu serbisu ba oras sanulu. Tan neʼe, halo la bele bá eskola hanesan labarik sira seluk. No bainhira haʼu tinan 14, haʼu komesa hadiʼa mákina iha fábrika besi nian.

Iha tinan 1975, haʼu sai tropa militár Españól nian iha Áfrika Norte, no iha foto neʼe haʼu hatais farda espesiál.

Iha tinan 1975, haʼu komesa halo serbisu militár tanba neʼe obrigatóriu iha rai-España. Haʼu hakarak halo viajen hodi hetan esperiénsia, tan neʼe haʼu tau haʼu-nia naran atu sai tropa militár Españól iha Melilla, neʼe mak área España nian iha Áfrika Norte. Durante tempu neʼe haʼu komesa uza droga no hemu tua barak.

Bainhira haʼu sai husi militár, haʼu fila fali ba sidade Barcelona no haʼu forma gang ida. Ami naʼok buat naran deʼit. Depois ami faʼan sasán sira-neʼe hodi hetan osan atu bele sosa droga. Haʼu komesa uza droga naran LSD no droga seluk tan, no haʼu-nia moris nakonu ho hemu tua, joga osan no halo relasaun seksuál. Moris arbiru hanesan neʼe book haʼu atu halo violénsia makaʼas. Haʼu sempre lori tudik, baliu ka katana, no haʼu la taʼuk uza buat sira-neʼe se presiza duni.

Loron ida, haʼu no haʼu-nia gang naʼok karreta ida no polísia duni tuir ami. Ami-nia karreta duni malu hanesan iha filme sira neʼebé ita haree iha televizaun. Ami-nia karreta halai dook maizumenus kilómetru 30, depois polísia komesa tiru ami. Ikusmai, ami-nia karreta hetan asidente no ami halai husi fatin neʼe. Bainhira haʼu-nia aman hatene kona-ba neʼe, nia duni sai haʼu husi uma.

Ba tinan lima nia laran, haʼu toba iha dalan deʼit. Dala ruma iha ema nia odamatan oin, iha trek nia kotuk, jardín, no iha rate. Ba tempu balu, haʼu mós hela iha fatuk-kuak. Haʼu nia moris la iha objetivu, no haʼu la interese se haʼu mate ka moris. Haʼu hanoin-hetan haʼu koʼa haʼu-nia liman-fukun no liman kuandu haʼu lanu hela tanba uza droga. Toʼo ohin loron, haʼu sei iha fitar.

OINSÁ BÍBLIA TROKA HAʼU-NIA MORIS

Bainhira haʼu tinan 28, haʼu-nia inan mai buka haʼu no husu haʼu fila ba uma. Haʼu simu no promete ba nia katak haʼu sei hadiʼa haʼu-nia moris, maibé ba tempu kleur haʼu la bele kumpre promesa neʼe.

Loron ida, Testemuña ba Jeová naʼin-rua dere ami-nia odamatan. Bainhira haʼu rona hela ba sira, haʼu-nia aman hakilar hodi haruka haʼu atu duni sira. Maibé tanba haʼu la gosta ema manda haʼu, haʼu deside atu la rona ba apá no kontinua rona ba Testemuña sira. Sira fó haʼu livru kiʼik tolu no haʼu simu ho laran-kontente. Haʼu husu kona-ba sira-nia reuniaun fatin, no loron balu tuirmai, haʼu hein iha Reuniaun-fatin nia oin.

Buat neʼebé haʼu nota mak ema hotu hatais ho didiʼak. Maibé haʼu-nia fuuk naruk, hasarahun sabraut, no haʼu-nia roupa la kabeer. Haʼu sente katak haʼu la merese duni atu tama ho sira ba Reuniaun-Fatin, entaun haʼu nafatin hein iha liʼur. Maibé haʼu hakfodak bainhira haʼu haree haʼu-nia kolega gang ida naran João no nia hatais kazaku. Neʼe halo haʼu sente brani uitoan no tuir reuniaun. Nia foin sai Testemuña ba Jeová tinan ida liubá. Husi loron neʼe, haʼu komesa halo mudansa boot iha haʼu-nia moris.

Haʼu komesa estuda Bíblia no haʼu mós komprende katak atu Maromak bele simu haʼu, haʼu presiza troka haʼu-nia hahalok la morál no violénsia. La fasil atu halo mudansa. Haʼu aprende katak atu halo Maromak Jeová kontente, haʼu tenke ‘troka haʼu-nia an hodi hafoun haʼu-nia hanoin.’ (Roma 12:2) Maromak nia laran-sadiʼa book haʼu-nia laran. Maski uluk haʼu halo ona sala barak, maibé nia fó oportunidade ba haʼu atu hahú moris foun. Buat neʼebé haʼu aprende kona-ba Maromak Jeová tama kleʼan ba haʼu-nia laran. Haʼu rekoñese katak iha duni Kriadór neʼebé hanoin haʼu.​—1 Pedro 5:6, 7.

Ida-neʼe book haʼu atu halo mudansa. Porezemplu, bainhira ami estuda Bíblia no koʼalia kona-ba fuma, haʼu hanoin: ‘Se Maromak Jeová hakarak haʼu atu sai moos husi buat hotu neʼebé hafoʼer an, entaun haʼu sei la fuma tan!’ (2 Korinto 7:1) Depois haʼu soe kedas haʼu-nia sigarru ba foʼer fatin.

Haʼu mós presiza para atu faʼan no uza droga. Neʼe susar liu no presiza tempu. Atu bele halo nuneʼe, haʼu la bele ransu tan ho haʼu-nia kolega sira. Sira-nia hahalok la ajuda haʼu atu laʼo ba oin no hametin haʼu-nia relasaun ho Maromak. Haʼu komesa sadere liután ba Maromak no ba kolega foun sira iha kongregasaun. Uluk haʼu nunka iha kolega neʼebé hadomi no hanoin haʼu hanesan sira. Fulan balu liutiha, haʼu konsege sai livre husi droga no haʼu ‘tau hahalok foun nuʼudar haʼu-nia hatais’. (Éfeso 4:​24) Iha fulan Agostu tinan 1985, haʼu hetan batizmu nuʼudar Testemuña ba Jeová.

BUAT DIʼAK NEʼEBÉ HAʼU HETAN

Bíblia fó moris foun mai haʼu. Neʼe ajuda haʼu atu sai livre husi toman aat neʼebé estraga haʼu-nia isin no dignidade. Tuir loloos, haʼu-nia kolega gang naʼin-30 liu mak mate sedu tanba hetan moras AIDS ka moras seluk bainhira uza droga. Haʼu agradese tebes tanba hodi aplika Bíblia nia matadalan ajuda haʼu sees husi rezultadu aat hanesan neʼe.

Agora, haʼu la lori tan katana no kroʼat sira hanesan uluk. Tuir loloos, haʼu nunka hanoin katak haʼu sei soe haʼu-nia kroʼat sira no lori fali Bíblia atu ajuda ema. Ohin loron, haʼu no haʼu-nia feen serbí Jeová tempu-tomak.

Haʼu-nia inan-aman laʼós Testemuña ba Jeová, maibé sira kontente ho mudansa neʼebé haʼu halo tanba estuda Bíblia. Tuir loloos, haʼu-nia aman mós defende Testemuña ba Jeová kuandu ninia kolega serbisu hatún Testemuña. Nia haree rasik katak haʼu-nia fiar ajuda duni haʼu atu halo mudansa boot hodi bele hetan moris neʼebé diʼak. Dala barak haʼu nia inan hatete katak diʼak liu se haʼu komesa estuda Bíblia bainhira haʼu sei joven, no haʼu sente katak neʼe loos.

Husi haʼu-nia esperiénsia hotu, haʼu aprende katak la matenek atu buka kontente liuhusi droga no moris la morál. Agora haʼu sente kontente neʼebé loos bainhira haʼu ajuda ema seluk aprende Maromak nia Liafuan, hanorin neʼe salva duni haʼu-nia moris.