Ita sente susar atu hanoin-hetan eskritura favoritu ruma ka lae? Karik neʼe mak eskritura neʼebé fó kmaan ba Ita, ajuda Ita atu hadiʼa Ita-nia hanoin, ka eskritura neʼebé Ita hakarak fahe ba ema seluk. (Sal 119:​11, 111) Tuirmai mak sujestaun balu neʼebé bele ajuda Ita atu hanoin-hetan eskritura sira.

• Uza aplikasaun JW Library^®. Kria kategoria ho naran “Eskritura Favoritu”, no bainhira Ita hetan eskritura neʼebé Ita hakarak hanoin-hetan, tau nota ba eskritura neʼe no rai iha “Eskritura Favoritu”.

• Rai eskritura iha fatin neʼebé Ita sempre haree. Hakerek eskritura neʼebé Ita hakarak hanoin-hetan iha surat-tahan ruma, no rai ida-neʼe iha fatin neʼebé Ita sempre haree. Ema balu rai ida-neʼe besik espellu, ka iha jeleira nia odamatan. Balu fali hasai foto ba eskritura no uza ida-neʼe nuʼudar sira-nia wallpaper iha telefone ka komputadór.

• Hakerek eskritura iha kartaun no uza ida-neʼe. Hakerek livru nia naran, kapítulu, no versíkulu iha sorin ida no ninia liafuan iha sorin seluk. Tuirmai haree ba parte livru nia naran, kapítulu, versíkulu, no koko hanoin-hetan liafuan husi eskritura neʼe, ka haree liafuan ba eskritura, no koko hanoin-hetan liafuan neʼe hakerek iha eskritura ida neʼebé.