Skip to content

Skip to table of contents

 KONA-BA INFORMASAUN IHA OIN | ITA-BOOT BELE HAKBESIK BA MAROMAK

Ita-Boot sente besik loos ba Maromak ka lae?

Ita-Boot sente besik loos ba Maromak ka lae?

“Sai Maromak nia belun neʼebé besik loos halo haʼu sente laran-hakmatek, seguru, no la kuran buat ida. Haʼu sente katak Maromak sempre haree hela haʼu no lori haʼu ba diʼak.”—CHRISTOPHER, MANE JOVEN IDA HUSI RAI-GANA.

“Maromak haree duni haʼu-nia situasaun no susar hotu. Nia hanoin no hadomi haʼu liu fali buat neʼebé haʼu husu.”—HANNAH, FETO IDA HO TINAN 13 HUSI RAI-ESTADUS UNIDUS.

“Haʼu bele hakbesik ba Maromak no habelun ho nia, neʼe halo haʼu sente laran-kmaan tebes. Neʼe mak folin boot liu fali buat hotu.”—GINA, FETO IDA HO TINAN 40 RESIN HUSI RAI-JAMAIKA.

Laʼós Christopher, Hannah, no Gina deʼit mak sente hanesan neʼe. Ema barak iha mundu tomak mós sente ona katak Maromak haree sira nuʼudar ninia belun. Ita-Boot rasik sente oinsá? Ita-Boot sente besik loos ba Maromak ka lae? Ita-Boot hakarak atu hakbesik liután ba Maromak ka lae? Dala ruma, Ita-Boot hakarak hatene: ‘Ema bele hakbesik ba Maromak Kbiit Boot Liu Hotu no habelun ho nia ka lae? Oinsá mak ema bele halo nuneʼe?’

EMA BELE HAKBESIK BA MAROMAK

Bíblia dehan katak ema bele hakbesik ba Maromak no habelun ho nia. Iha Bíblia laran hakerek kona-ba mane ida naran Abraão neʼebé Maromak bolu nuʼudar “haʼu-nia belun”. (Isaías [Yesaya] 41:8) No mós iha konvite kapás ida neʼebé hakerek ona iha Tiago 4:8: “Hakbesik ba Maromak, no nia sei hakbesik ba imi.” Nuneʼe, ita ema bele duni hakbesik ba Maromak no habelun ho nia. Maibé tanba ita-nia matan la bele haree Maromak, oinsá mak ita bele hakbesik ba nia no sai belun diʼak?

Hanoin toʼok kona-ba oinsá ema ho ema bele sai belun diʼak. Baibain, ulukliu ema naʼin-rua fó-koñese naran ba malu. Depois, sira komesa koʼalia ba malu beibeik hodi fahe hanoin no sentimentu ba malu. Ikusmai sira sai belun neʼebé besik. Sira mós fó liman ba malu, no kontinua apoia malu, neʼe halo sira naʼin-rua sai belun neʼebé besik liután. Hanesan neʼe mós se ita hakarak sai belun diʼak ho Maromak. Mai ita haree toʼok hakat sira tuirmai neʼe.