Skip to content

Skip to table of contents

 HANORIN ITA-NIA OAN

Jesus Kristu agora nia halo saida?

Jesus Kristu agora nia halo saida?

Iha fulan-Dezembru, ema barak iha mundu tomak haree dezeñu sira kona-ba Jesus nuʼudar bebé. Iha dezeñu sira-neʼe, Jesus toba iha duʼut maran iha balada han-fatin. Maibé ita hanoin fali Jesus nuʼudar bebé deʼit ka lae? * Mai ita koʼalia kona-ba dalan neʼebé diʼak liu atu hanoin fali nia. Ita bele aprende kona-ba neʼe husi buat neʼebé akontese iha kalan ida ba bibi-atan balu neʼebé hein bibi besik Belein.

Derrepente deʼit anju ida mosu ba bibi-atan sira. Nia hatete: “Foin moris ba imi Maksoin ida, katak Kristu Naʼi.” Anju neʼe mós dehan katak sira bele hetan Jesus “haneras no toba iha balada han-fatin”. Iha tempu neʼe kedas anju sira seluk mós mosu no komesa “hahiʼi Maromak”.

Ó sei sente oinsá se ó mak rona anju sira hahiʼi Maromak?— Bibi atan sira-neʼe kontente tebes! Sira hatete: “Ita laʼo toʼok ba Belein, hodi haree buat neʼebé mosu, neʼebé Naʼi fó sai mai ita.” Iha neʼebá sira hetan duni “Maria, José no kosok-oan toba hela iha balada han-fatin”.

Lakleur, ema seluk husi Belein mós mai atu haree Maria, José no bebé Jesus. Kuandu bibi-atan sira konta kona-ba buat hotu neʼebé akontese ba sira, ema hotu hakfodak. Ó mós kontente atu hatene buat furak neʼe ka lae?— Ita hotu neʼebé hadomi Maromak kontente atu hatene. Agora mai ita haree tanbasá mak Jesus nia moris halo ema barak haksolok. Maibé antes neʼe, ita presiza hanoin fali tempu molok Maria kaben.

Loron ida, anju ida naran Gabriel vizita Maria. Nia hatete ba Maria katak nia sei tuur ahi oan-mane ida no “ema sei hanaran nia Naʼi aas liu hotu nia Oan”. Anju Gabriel hatutan tan: ‘Nia sei ukun no nia ukun sei rohan-laek.’

 Maria hakarak hatene oinsá mak ida-neʼe bele akontese tanba nia seidauk halo relasaun ho mane ida. Tan neʼe, Gabriel esplika tan hodi dehan: “Naʼi aas liu hotu nia kbiit sei hamahan ó.” No mós, nia hatete: “Santu neʼebé atu moris sei hanaran an ‘Maromak nia Oan’.” Maromak halo milagre boot duni kuandu nia foti ninia Oan-Mane no tau fali iha Maria nia knotak nuʼudar bebé.

Dala ruma ó haree ka lae dezeñu ka prezépiu neʼebé hatudu “ema matenek” naʼin-tolu neʼebé bá hodi haree Jesus hamutuk ho bibi-atan sira?— Durante tempu Natál, ita haree prezépiu barak hanesan neʼe. Maibé buat hirak-neʼe la loos. Tanba tuir loloos, “ema matenek” naʼin-tolu neʼe mak ema siʼikdór sira no ida-neʼe mak hahalok neʼebé Maromak la simu. Liután neʼe, Bíblia hatete katak kuandu sira “tama tiha uma laran, sira haree kiʼikoan ho nia inan Maria”. Ida-neʼe hatudu katak iha tempu neʼebá Jesus laʼós bebé nafatin iha balada han-fatin, maibé nia labarik kiʼikoan ona neʼebé hela hamutuk ho José no Maria iha uma!

Ó hatene ka lae, oinsá mak siʼikdór sira-neʼe hetan Jesus?— “Fitun” ida mak hatudu dalan ba sira. Maibé fitun neʼe lori sira laʼós ba Belein maibé foufoun ba Liurai Herodes iha Jeruzalein. Bíblia hatete katak Herodes hakarak atu hetan Jesus hodi oho nia. Hanoin toʼok, sé mak halo buat neʼebé haree hanesan fitun ida atu mosu no hatudu dalan ba siʼikdór sira-neʼe atu bá hasoru Herodes?— Laʼós Maromak Jeová, maibé Maromak nia inimigu naran Diabu Satanás!

Ohin loron, Satanás hakarak halo ema atu hanoin fali Jesus nuʼudar bebé neʼebé la bele halo buat ida. Maibé anju Gabriel hatete ba Maria: ‘Nia sei ukun no nia ukun sei rohan-laek.’ Agora daudaun Jesus ukun nuʼudar Liurai iha lalehan, no nia besik ona atu halakon Maromak nia inimigu hotu. Ida-neʼe mak buat neʼebé ita hakarak hanoin fali kona-ba Jesus, no mai ita fó-hatene ema seluk kona-ba neʼe.

^ par. 3 Se Ita lee hamutuk ho labarik ida, sinál neʼe — fó-hanoin Ita atu para uitoan atu husik labarik atu hatán rasik.