Skip to content

Skip to table of contents

 KONA-BA INFORMASAUN IHA OIN

Tanbasá mak ema hanoin katak Maromak laran-aat?

Tanbasá mak ema hanoin katak Maromak laran-aat?

PERGUNTA iha livru neʼe nia oin halo ita hakfodak ka lae? Karik ita hanoin katak Maromak nunka hatudu hahalok laran-aat. Maibé ohin loron, iha ema balu neʼebé hanoin katak Maromak laran-aat. Tanbasá mak sira hanoin nuneʼe?

Ema balu neʼebé hasoru dezastre naturál hatete: “Tanbasá mak Maromak husik ida-neʼe akontese? Nia hanoin ita ka lae? Nia laran-aat ka lae?”

Ema seluk mós husu pergunta neʼe kuandu sira lee Bíblia. Sira lee istória sira kona-ba Rai-Nabeen iha Noé nia tempu no istória sira seluk, no ida-neʼe halo sira hanoin: “Tanbasá mak Maromak domin nian bele oho ema barak hanesan neʼe? Nia laran-aat duni ka lae?”

Dala ruma ita mós husu pergunta hanesan neʼe ka lae? Ka ita sente susar atu fó resposta ba ema seluk neʼebé husu kona-ba neʼe? Hanoin toʼok kona-ba pergunta tuirmai neʼe neʼebé sei ajuda ita.

TANBASÁ MAK ITA ODI HAHALOK AAT?

Ita odi hahalok aat tanba ita iha matenek atu hatene buat neʼebé loos no sala. Kona-ba neʼe, ita la hanesan duni ho animál sira. Ita-nia Kriadór kria ita “tuir nia ilas”. (Gênesis [Kejadian] 1:27) Neʼe katak sá? Neʼe katak nia fó kbiit mai ita hodi ita bele halo tuir ninia hanoin no hahalok no atu hatene buat neʼebé loos no sala. Hanoin toʼok kona-ba neʼe: Se ita-nia matenek atu hatene buat neʼebé loos no sala mai husi Maromak, no ita mós odi hahalok aat, neʼe hatudu saida? Ida neʼe hatudu katak Maromak mós odi hahalok aat.

Bíblia mós hanorin ida-neʼe tanba Maromak hatete: “Haʼu-nia dalan sira aas liu fali imi-nia dalan sira, no haʼu-nia hanoin aas liu fali imi-nia hanoin.” (Isaías [Yesaya] 55:9) Se ita tesi lia ba Maromak nia hahalok, hodi hatete katak nia laran-aat, neʼe hanesan ita fiar katak ita-nia hahalok mak diʼak liu fali ninian. Maibé ema neʼebé matenek hakarak atu hatene buat hotu antes sira tesi lia kona-ba buat ruma. Tan neʼe duké hatete katak Maromak laran-aat, diʼak liu buka-hatene tanbasá mak ninia hahalok balu haree hanesan la justisa. Atu ajuda ita, mai ita hanoin uluk kona-ba liafuan “laran-aat” katak sá.

Kuandu ita dehan katak ema ida laran-aat, ita tesi lia ba ninia laran. Ema neʼebé laran-aat gosta atu haree ema seluk hetan terus, ka nia la hanoin sira kuandu sira hasoru susar. Tan neʼe, se aman ida fó dixiplina ba ninia oan, tan deʼit nia gosta hakanek ninia oan nia laran, ita bele dehan katak aman neʼe laran-aat. Maibé se aman ida fó dixiplina ba ninia oan tanba nia hakarak hanorin nia oan ka proteje oan neʼe, aman neʼe mak aman neʼebé diʼak. Ita la hatene saida mak iha ema nia laran, nuneʼe mós ema la hatene saida mak iha ita-nia laran.

Mai ita hanoin kona-ba razaun rua tanbasá mak ema balu hanoin katak Maromak laran-aat. Razaun primeiru mak tanba dezastre naturál neʼebé ita haree ohin loron, no segundu mak Maromak nia tesi-lia iha Bíblia laran. Husi informasaun neʼe, ita sei haree katak Maromak laʼós laran-aat.