Skip to content

Skip to table of contents

Ita tenke halo orasaun ba santu-santa sira ka lae?

Ita tenke halo orasaun ba santu-santa sira ka lae?

DALA ruma ita sente laran-susar no presiza buka ajuda husi ema ida ka lae? Ita hakarak koʼalia ho kolega ida neʼebé hanoin ita no komprende ita-nia susar. Kolega neʼebé iha hahalok hanesan neʼe mak diʼak duni.

Ema balu sente hanesan neʼe kuandu sira halo orasaun. Duké reza ba Maromak, sira sente diʼak liu atu reza ba santu-santa sira. Sira hanoin katak Maromak aas liu no ida-neʼe halo sira sente taʼuk, maibé sira la sente taʼuk atu halo orasaun ba santu sira. Sira mós hanoin katak santu sira uluk hasoru problema neʼebé hanesan ho ema, tan neʼe sira bele komprende ema nia situasaun. Porezemplu, ema neʼebé lakon buat ruma neʼebé importante, karik sira hili atu halo orasaun ba Santu António de Padua, tanba nia mós uluk lakon ninia sasán balu. Sira neʼebé iha animál neʼebé moras karik halo orasaun ba São Francisco de Assis. Se sira laran-susar tebes tanba lakon esperansa, sira hili Santu Tadeu. No se joven sira hakarak hetan susesu iha aban-bainrua, sira halo orasaun ba São João Bosco.

Maibé oinsá mak ita bele hatene se halo orasaun ba santu-santa sira mak tuir Bíblia nia hanorin ka lae? Liafuan neʼebé ita temi iha ita-nia orasaun mak liafuan neʼebé ita hakarak Maromak atu rona, tan neʼe ita presiza hatene: Maromak simu duni ita-nia orasaun ka lae? Maromak sente oinsá kona-ba halo orasaun ba santu-santa sira?

SAIDA MAK BÍBLIA HANORIN KONA-BA HALO ORASAUN BA SANTU-SANTA SIRA?

Igreja Katólika hanorin kona-ba doutrina intersesaun, neʼe mak halo orasaun ba santu-santa sira atu sira bele ajuda ema. Livru New Catholic Encyclopedia hatete katak doutrina neʼe envolve halo orasaun ba santu-santa sira neʼebé iha pozisaun aas iha Maromak nia oin, hodi sira bele simu no hatoʼo fali ita-nia orasaun ba Maromak. Baibain ema halo orasaun ba santu-santa sira hodi hein katak sira bele hetan ajuda tanba sira iha pozisaun espesiál iha Maromak nia oin.

Bíblia hanorin ida-neʼe ka lae? Ema balu hatete katak apóstolu Paulo hatudu katak ita bele halo orasaun ba santu-santa sira. Porezemplu, ba ema kristaun sira iha Roma, nia hakerek: “Haʼu husu imi ho laran, maun-alin sira, tan ita Naʼi Jesus Kristu no tan domin espíritu santu nian, atu imi ida deʼit ho haʼu iha haʼu-nia hakaʼas-an, husi imi-nia harohan ba Maromak ba haʼu-nia diʼak.” (Roma 15:30) Ho liafuan sira-neʼe, apóstolu Paulo husu ninia maluk kristaun sira atu hatoʼo ninia susar ba Maromak ka lae? Lae duni. Entaun Paulo nia liafuan neʼe katak sá? Neʼe katak ita bele husu ita-nia maluk kristaun atu halo orasaun ba Maromak  atu ajuda ita. Maibé atu hatoʼo ita-nia orasaun liuhusi santu-santa neʼebé ita hanoin iha lalehan, neʼe la hanesan. Tanbasá?

Iha apóstolu João nia evanjellu, Jesus hatete: “Haʼu neʼe dalan, lia-loos no moris. Ema ida la liu karik husi haʼu, nia la bele hakbesik haʼu Aman.” (Joao 14:6) Nia mós hatete: “Buat hotu neʼebé imi husu ba Aman hodi haʼu naran, nia sei haraik ba imi.” (Joao 15:16) Jesus la dehan katak ita tenke hatoʼo ita-nia orasaun ba nia, depois nia sei hatoʼo fali ba Maromak. Tuir loloos, atu Maromak bele rona ita-nia orasaun, ita tenke hatoʼo ita-nia orasaun ba Maromak liuhusi Jesus deʼit.

Kuandu Jesus nia dixípulu sira husu nia atu hanorin sira halo orasaun, Jesus hatete: “Wainhira imi harohan, hateten nuneʼe: ‘Aman, tulun ema atu hahiʼi Ita naran.’” (Lucas 11:2) Neʼe hatudu katak, orasaun ida-idak neʼebé ita halo, ita la hatoʼo ba Jesus ka ba santu-santa sira, maibé ita hatoʼo ba Maromak rasik. Tanba Jesus esplika ida-neʼe ho klaru, ita bele komprende katak ita presiza hatoʼo ita-nia orasaun ba Maromak, liuhusi Jesus Kristu, laʼós liuhusi santu-santa sira.

Orasaun mak parte importante husi ita-nia adorasaun. Se ita adora buat seluk hanesan santu-santa sira, klaru katak neʼe kontra Bíblia nia hanorin. (Joao 4:23, 24; Apokalipse 19:9, 10) Tan neʼe mak ita tenke hatoʼo ita-nia orasaun ba Maromak deʼit.

ITA TENKE TAʼUK ATU HALO ORASAUN BA MAROMAK KA LAE?

Iha Jesus nia diskursu neʼebé nia hatoʼo iha foho, nia fó ezemplu kona-ba oan ida neʼebé husu nia aman atu fó buat ruma atu han. Aman neʼe sei fó fatuk ba nia oan kuandu nia oan husu paun ka lae? Ka nia sei fó samea ba nia oan kuandu nia husu ikan? (Mateus 7:9, 10) Klaru katak aman sei nunka halo nuneʼe, loos ka lae?

Hanesan aman ida neʼebé hadomi ninia oan, Maromak mós hakarak ita atu koʼalia ba nia

Hanoin toʼok kona-ba ai-knanoik neʼe. Ita iha relasaun diʼak ho Ita-nia oan no Ita sempre prontu atu ajuda nia. Loron ida nia hakarak husu buat ruma ba Ita. Maibé, nia taʼuk kona-ba oinsá Ita sei hatán ba nia, tan neʼe nia husu ema seluk atu husu ba Ita. Ita sei sente oinsá? Oinsá se nia sempre husu ema neʼe atu fó-hatene ba Ita? Ita sei kontente atu nia halo ida-neʼe ka lae? Lae duni. Inan-aman sira neʼebé hadomi sira-nia oan hakarak oan neʼe atu koʼalia kedas ba sira no la sente taʼuk atu husu buat neʼebé sira presiza.

Jesus esplika ninia ezemplu kona-ba oan neʼebé husu hahán, hodi hatete: “Neʼe duni, imi sira neʼebé aat hatene fó buat diʼak ba imi-nia oan sira, liután mak imi-nia Aman iha lalehan sei la fó buat diʼak ba sira neʼebé husu ba Nia!” (Mateus 7:11) Klaru katak inan-aman sira hakarak tebes atu fó buat diʼak ba sira-nia oan. Ita-nia aman iha lalehan hakarak liután atu rona no hatán ita-nia orasaun.

Maromak hakarak ita atu hatoʼo kedas ita-nia orasaun ba nia, maski ita sente laran-todan tanba ita-nia fraku ruma. Maromak mós la fó knaar ba anju seluk atu rona ita-nia orasaun. Bíblia dehan: “Soe ó-nia todan ba Jeová, no nia rasik sei apoia ó.” (Salmo [Mazmur] 55:22) Duké halo orasaun liuhusi santu-santa sira, ita hakarak atu sente kmaan hodi hakbesik ba Maromak Jeová iha orasaun.

Ita-nia aman iha lalehan hadomi ita ida-idak. Nia hakarak ajuda ita ho ita-nia susar no nia konvida ita atu hakbesik ba nia. (Tiago 4:8) Ita kontente tebes tanba ita iha oportunidade atu halo orasaun ba ita-nia Aman Jeová, ida neʼebé “rona orasaun”.—Salmo 65:2.