Skip to content

Skip to table of contents

Ita sei tau fiar ba Maromak ka lae?

Ita sei tau fiar ba Maromak ka lae?

HANOIN toʼok katak Ita iha belun ida neʼebé Ita gosta tebes, maibé loron ida nia halo buat ruma neʼebé Ita la komprende. Ema seluk la gosta buat neʼebé nia halo no sira tesi lia ba nia. Sira hatete katak Ita-nia belun ema neʼebé laran-aat tebes. Ita sei apoia sé? Ema neʼebé koʼalia aat kona-ba Ita-nia belun, ka Ita sei hein Ita-nia belun atu fó ninia razaun? Se Ita-nia belun la iha atu defende ninia an, Ita sei hatudu pasiénsia no la tesi lia kedas ba nia ka lae?

Antes Ita apoia sira neʼebé la gosta Ita-nia belun, diʼak atu husu ba Ita-nia an: “Haʼu koñese haʼu-nia belun didiʼak ka lae? Tanbasá mak haʼu bele fiar haʼu-nia belun nia hahalok?” Hanesan neʼe, Ita mós bele husu pergunta sira-neʼe kona-ba Maromak.

Karik Ita seidauk komprende buat balu neʼebé Maromak halo, ka Ita la hatene tanbasá mak Maromak husik buat aat akontese. Iha ema balu neʼebé la komprende Maromak no sira hanoin katak nia laran-aat. Sira mós duun Maromak. Maibé Ita sei tau fiar nafatin ba Maromak ka lae? Atu halo nuneʼe, Ita presiza atu hatene didiʼak nia. Husu Ita nia an: “Toʼo agora, Maromak hatudu laran-diʼak mai haʼu ka lae?”

Se Ita hasoru susar barak iha Ita-nia moris, karik Ita hanoin katak Maromak la hatudu laran-diʼak ba Ita. Maibé hanoin kona-ba neʼe: Maromak laʼós ida neʼebé fó susar ba Ita. Nia mak ida neʼebé fó buat diʼak iha Ita-nia moris. Tuir buat neʼebé Ita aprende ona iha informasaun neʼe, Satanás mak “liurai mundu neʼe nian”, laʼós Maromak Jeová. (Joao 12:31) Tan neʼe, ohin loron Satanás mak hun ba terus no susar hotu. Liután neʼe, ita mós hetan susar barak tanba ita ema sala-naʼin no situasaun susar neʼebé bele mosu derrepente deʼit.

Maromak mak ida neʼebé halo susar iha Ita-nia moris, ka ida neʼebé fó buat neʼebé diʼak?

Entaun se Satanás mak halo terus no susar, oinsá ho Maromak? Nia halo saida? Bíblia dehan katak Maromak mak “Kriadór ba lalehan no rai”, no nia mak halo ita-nia isin iha dalan neʼebé “furak”. No mós, Maromak mak ida neʼebé fó “iis moris nian” ba ita hotu. (Salmo [Mazmur] 124:8; 139:14; Daniel 5:23) Buat hotu neʼe katak sá mai ita?

Neʼe katak ita dada iis no moris tanba ita-nia Kriadór Maromak. (Apostolu 17:28) Maromak fó prezente barak mai ita, hanesan família neʼebé ita hadomi, belun neʼebé diʼak, hahán neʼebé gostu, ai-funan neʼebé morin, múzika neʼebé kapás no buat seluk neʼebé furak iha mundu neʼe. (Tiago 1:17) Buat sira-neʼe hatudu katak Maromak mak hanesan belun ida neʼebé ita bele hadomi no fiar, loos ka lae?

Karik Ita sente susar atu tau fiar ba Maromak tanba Ita seidauk koñese didiʼak nia. Ema barak sente hanesan neʼe. Tuir loloos, iha razaun barak neʼebé hatudu katak Maromak laʼós laran-aat, no iha livru neʼe, ita koʼalia kona-ba razaun balu deʼit. Maibé husi buat neʼebé ita foin lee, diʼak atu hakaʼas an atu koñese didiʼak Maromak, loos ka lae? * Klaru katak nuʼudar Ita aprende liután kona-ba Maromak, Ita sei hatene buat neʼebé loos kona-ba nia. Ita sei hatene katak Maromak laʼós laran-aat, maibé “Maromak mak domin”.—1 Joao 4:8.

^ par. 8 Porezemplu, atu hetan informasaun liután kona-ba tanbasá Maromak husik buat aat akontese, haree kapítulu 11 husi livru Tuir Loloos, Saida mak Bíblia Hanorin? Livru neʼe husi Testemuña ba Jeová.