Skip to content

Skip to table of contents

 HAKBESIK BA MAROMAK

“Husu bá, imi sei simu”

“Husu bá, imi sei simu”

Jesus nia dixípulu ida husu ba nia: “Naʼi, hanorin ami atu harohan.” (Lucas 11:1) Atu ajuda nia, Jesus konta ai-knanoik rua neʼebé hanorin ita oinsá atu halo orasaun no saida mak ita presiza halo atu Maromak rona ba ita. Se ita duvida katak Maromak rona ita-nia orasaun ka lae, ita sei gosta atu hatene buat neʼebé Jesus koʼalia kona-ba neʼe.—Lee Lucas 11:5-13.

Jesus nia ai-knanoik primeiru mak kona-ba oinsá ita halo orasaun. (Lucas 11:5-8) Iha ninia istória, mane ida simu bainaka maibé nia moe tanba nia la iha hahán atu fó ba bainaka neʼe. Maski kalan boot ona, maibé mane neʼe bá ninia kolega nia uma atu husu paun. Foufoun, ninia kolega lakohi atu ajuda tanba ninia família hotu toba ona. Maibé mane neʼe la moe no nia bolu nafatin ninia kolega toʼo hadeer, hodi fó buat neʼebé nia presiza. *

Ai-knanoik neʼe hatudu saida mai ita kona-ba orasaun? Jesus hakarak hatudu mai ita katak kuandu ita halo orasaun, ita presiza hakaʼas an. Ita tenke husu beibeik, buka beibeik no dere beibeik. (Lucas 11:9, 10) Tanbasá? Jesus la dehan katak kuandu ita halo orasaun, neʼe hanesan ita dere odamatan maibé Maromak lakohi loke. Tuir loloos, Maromak hein namanas atu fó buat neʼebé ita husu ho fiar. Ita hatudu katak ita iha fiar hanesan neʼe hodi husu beibeik. Tanba kuandu ita halo nuneʼe, ita hatudu katak ita presiza duni buat neʼebé ita husu. Ita mós fiar katak Maromak sei hatán, se ida-neʼe tuir Maromak nia hakarak.—Marcos 11:24; 1 Joao 5:14.

Ai-knanoik segundu mak kona-ba ida neʼebé “rona orasaun”, neʼe mak Maromak Jeová. (Salmo [Mazmur] 65:2) Jesus husu: “Iha imi leet, aman ida neʼebé mak sei fó samea wainhira nia oan husu ikan? Eh sei fó sakunar ida wainhira nia husu manu-tolun?” Klaru katak aman neʼebé hadomi nia oan sei nunka fó buat neʼebé aat ba sira. Depois neʼe, Jesus esplika ninia ai-knanoik: Se aman sira neʼebé sala-naʼin, “fó buat diʼak” ba sira-nia oan, ‘oinsá liután mak Aman iha lalehan sei haraik buat neʼebé diʼak liu hotu ba ninia oan sira’, neʼe mak espíritu santu! *Lucas 11:11-13; Mateus 7:11.

Ai-knanoik neʼe hatudu saida kona-ba Maromak, ida neʼebé “rona orasaun”? Jesus hakarak ita atu haree Jeová nuʼudar aman ida neʼebé hakarak tebes fó buat neʼebé ninia oan sira presiza. Tan neʼe, ema neʼebé adora Maromak Jeová bele sente livre atu husu Jeová husi sira-nia laran buat neʼebé sira presiza. No tanba sira fiar katak Jeová hakarak atu fó buat neʼebé diʼak ba nia oan sira, sira sei simu dalan neʼebé Jeová hatán sira-nia orasaun. *

Programa atu lee Bíblia

Lucas 7-21

^ par. 2 Jesus nia ai-knanoik neʼe hatudu kostume no toman sira iha tempu neʼebá. Tuir loloos, ema judeu sira haree katak atu hatudu laran-luak ba bainaka sira mak importante tebes. Família ida tunu paun neʼebé toʼo ba sira-nia presiza iha loron ida. Tan neʼe, se sira-nia paun hotu ona, baibain sira presiza husu ema seluk. No mós, se família ida kiak, sira hotu toba deʼit iha rai iha kuartu ida.

^ par. 4 Dala barak kuandu Jesus uza ai-knanoik, nia hatudu katak Maromak nia dalan mak diʼak liu fali ema nian hodi uza liafuan “oinsá liután”.

^ par. 5 Atu aprende liután kona-ba oinsá atu halo orasaun no saida mak ita presiza halo atu Maromak rona ba ita, haree kapítulu 17 husi livru Tuir Loloos, Saida mak Bíblia Hanorin? Livru neʼe husi Testemuña ba Jeová.

Maromak hein namanas atu fó buat neʼebé ita husu ho fiar