Skip to content

Skip to table of contents

Laran-diʼak importante iha Maromak nia haree

Laran-diʼak importante iha Maromak nia haree

TANBA katuas ida hatudu laran-diʼak ba mane joven ida iha rai-Japaun, ida-neʼe kona loos joven neʼe nia laran. Katuas neʼe mak misionáriu ida neʼebé foin muda ba rai neʼe no nia aprende hela lia-japonés. Maibé semana-semana nia vizita mane joven neʼe atu koʼalia hamutuk kona-ba Bíblia. Ho oin-midar no laran-diʼak, katuas neʼe hatán ho pasiénsia joven neʼe nia pergunta sira.

Karik joven neʼe sei nunka haluha laran-diʼak neʼebé misionáriu neʼe hatudu ba nia. Mane joven neʼe hanoin: ‘Se Bíblia bele halo ema sai laran-diʼak no hatudu domin, entaun haʼu tenke aprende kona-ba neʼe.’ Katuas nia laran-diʼak book duni joven neʼe atu hakarak aprende buat neʼebé foun ba nia. Sin, dala barak laran-diʼak iha forsa liu fali liafuan no bele book duni ema nia laran.

Maromak nia hahalok ida neʼebé ita haleno

Baibain deʼit ba ita atu hatudu laran-diʼak ba ita-nia família. Ida-neʼe loos tanba laran-diʼak iha arti katak domin neʼebé ema hatudu iha família laran. Maibé tuir loloos, laran-diʼak mak Maromak nia hahalok ida. Jesus hatete katak ninia Aman iha lalehan hatudu laran-diʼak laʼós deʼit ba sira neʼebé hadomi Nia, maibé mós “ba ema aat” sira. Jesus haruka ninia dixípulu sira atu banati-tuir Maromak nia ezemplu kona-ba neʼe. Jesus hatete: “Imi sai diʼak loos bá, hanesan imi-nia Aman iha lalehan diʼak loos.”—Lucas 6:35; Mateus 5:48; Êxodo (Keluaran) 34:6.

Tanba Maromak kria ita tuir ninia ilas, ita bele haleno no hatudu hahalok laran-diʼak. (Gênesis [Kejadian] 1:27) Sin, ita bele banati-tuir Maromak no aprende atu hatudu laran-diʼak ba ema seluk. Bíblia dehan katak laran-diʼak mak parte husi hahalok sira neʼebé Maromak nia espíritu santu lori mai. (Galasia 5:22) Tan neʼe, nuʼudar ita aprende liután kona-ba ita-nia Maromak, no hakbesik liután ba nia, ita bele haburas laran-diʼak.

Laran-diʼak laʼós deʼit parte husi ema nia an. Iha Maromak nia haree, hahalok neʼe mak importante tebes. Tan neʼe ita bele komprende tanbasá Maromak haruka ita atu hatudu “laran-diʼak ba malu”. (Efeso 4:32) Bíblia mós fó-hanoin ba ita atu “simu ema laʼo-rai sira ho laran-diʼak”.—Ebreu 13:2.

Iha mundu neʼe neʼebé nakonu ho ema neʼebé la hatene fó-agradese no la hatudu laran-diʼak, ita bele ka lae hatudu laran-diʼak ba ema seluk, inklui mós ema neʼebé ita la koñese? Saida mak bele ajuda ita atu halo ida-neʼe? No tanbasá mak ita presiza hanoin atu halo ida-neʼe?

Importante ba Maromak

Karik ita hakfodak atu hatene katak kuandu apóstolu Paulo koʼalia tiha kona-ba hatudu laran-diʼak ba ema laʼo-rai, ka estranjeiru, nia mós hatete: “Hodi halo nuneʼe ema balun simu tiha anju sira hodi la hatene.” Ita sei sente oinsá se Ita hetan oportunidade atu simu anju sira nuʼudar bainaka? Maibé Paulo dehan katak sira halo nuneʼe “hodi la hatene”. Buat neʼebé Paulo hakarak hatete mak, se ita iha toman atu hatudu laran-diʼak ba ema seluk, inklui mós ema neʼebé ita la koñese, karik ita sei simu bensaun iha dalan neʼebé ita la hatene.

Husi tradusaun Bíblia balu neʼebé iha referénsia, Paulo nia liafuan neʼe liga ho istória kona-ba Abraão no Lot iha Gênesis kapítulu 18 no 19. Iha situasaun rua neʼe, ita lee kona-ba anju sira neʼebé mosu ba sira nuʼudar estranjeiru  no lori mensajen neʼebé importante. Mensajen neʼebé anju hatoʼo ba Abraão mak kona-ba oinsá Maromak sei kumpre ninia promete hodi fó ba sira oan-mane ida. No kona-ba Lot, neʼe mak kona-ba sira-nia salvasaun kuandu Maromak sobu sidade rua naran Sodoma no Gomorra.—Gênesis 18:1-10; 19:1-3, 15-17.

Se Ita lee eskritura sira neʼebé temi iha leten, Ita sei haree katak Abraão no Lot hatudu laran-diʼak ba ema estranjeiru neʼebé mai iha sira-nia área. Klaru katak iha tempu Bíblia, ema iha toman atu hatudu laran-diʼak ba ema seluk hanesan kolega, família, ka ema estranjeiru. Tuir loloos, iha Moisés nia Ukun-Fuan, haruka ema Israel sira atu fó ajuda ba ema husi rai seluk neʼebé hela iha sira-nia rai. (Deuteronômio [Ulangan] 10:17-19) Maski ema iha toman atu hatudu laran-diʼak iha tempu neʼebá, maibé buat neʼebé Abraão no Lot halo, liu fali buat neʼebé ukun-fuan haruka. Sira hakaʼas an atu hatudu laran-diʼak iha dalan neʼebé boot liu, no tanba ida-neʼe sira simu bensaun.

Bensaun neʼebé Abraão simu tanba hatudu laran-diʼak mak nia hetan oan-mane. Maibé liuhusi nia ita mós hetan bensaun. Oinsá? Tanba Maromak uza Abraão no ninia oan Isaac atu kumpre ninia hakarak. Husi sira-nia família mak Mesias, Jesus, mosu mai. No tanba Abraão no Isaac hatudu laran-diʼak no sira laran-metin ba Maromak, neʼe reprezenta oinsá Maromak salva ema hotu liuhusi ninia domin no laran-diʼak.—Gênesis 22:1-18; Mateus 1:1, 2; Joao 3:16.

Istória sira-neʼe hatudu saida mak Maromak nia hakarak husi sira neʼebé nia hadomi, no oinsá nia haree hahalok laran-diʼak nuʼudar importante tebes. Tanba hahalok laran-diʼak importante iha Maromak nia haree, ita hotu presiza hatudu ida-neʼe.

Hatudu laran-diʼak ajuda ita atu hatene Maromak diʼak liután

Bíblia esplika katak iha ita-nia tempu, ema barak sei “la hatene fó-agradese, la hatene Maromak; la hatene sadiʼa maluk”. (2 Timoteo 3:1-3) Klaru katak loroloron Ita hasoru ema sira hanesan neʼe. Maski nuneʼe, neʼe laʼós razaun ba ita atu haluha ona hatudu laran-diʼak ba ema seluk. Ema kristaun sira simu avizu tuirmai neʼe: “Keta selu aat ho aat ba ema; buka buat neʼebé loos iha ema hotu-hotu nia oin.”—Roma 12:17.

Ita bele hakaʼas an atu hatudu laran-luak no laran-diʼak ba ema seluk. Bíblia hatete: “Ema neʼebé hadomi, . . . nia hatene Maromak,” no dalan ida atu hatudu domin mak hodi hatudu laran-diʼak ba ema seluk. (1 Joao 4:7; 1 Korinto 13:4) Sin, kuandu ita hatudu laran-diʼak ba ema seluk, neʼe sei ajuda ita atu hatene Maromak diʼak liután, no neʼe sei halo ita kontente liu. Iha Jesus nia diskursu iha foho ida, nia hatete:  “Ksolok ba sira neʼebé laran-luak, basá sira sei hetan laran-luak. Ksolok ba sira neʼebé laran moos, basá sira sei haree Maromak.”—Mateus 5:7, 8.

Tanba Abraão hatudu laran-diʼak, nia simu bensaun

Hanoin toʼok kona-ba feto ida ho oan naʼin-rua husi rai-Japaun naran Aki. Derrepente deʼit ninia inan mate, no neʼe halo nia sai laran-tun toʼo nia hetan moras depresaun. Dala ruma nia situasaun sai aat liu toʼo nia presiza bá doutór. Depois, família ida muda iha ninia área. Família neʼe foin lakon sira-nia aman tanba asidente, no husik hela nia feen atu tau matan ba sira-nia oan naʼin-lima neʼebé sei kiʼik. Aki sente hanoin tebes família neʼe no nia hakaʼas an atu habelun ho sira. Nia halo buat hotu neʼebé nia bele atu ajuda família neʼe. Porezemplu, nia fahe ai-han ba sira, fó roupa sira neʼebé ninia família la uza ona, no buat seluk tan. Tanba Aki halo ida-neʼe, nia hetan fali ninia forsa. Bíblia hatete: “Diʼak liu fó liu fali simu.” (Apostolu 20:35) Aki sente katak Bíblia nia liafuan neʼe mak loos duni. Sin, hatudu laran-diʼak ba ema seluk mak buat diʼak neʼebé ita bele halo ba ita-nia an kuandu ita sente laran-tun.

“Fó empresta ba Maromak Jeová”

Ita la presiza gasta osan barak atu hatudu laran-diʼak. No mós ida-neʼe la depende ba ita-nia matenek ka forsa. Dala ruma kuandu ita hatudu oin-midar, koʼalia ho domin, prontu atu ajuda, fó prezente kiʼik ruma, ka maski fó tempu ba ema seluk atu uluk liu ita, neʼe bele halo sira kontente iha laran. Kuandu ita ladún hatene atu halo saida ka hatete saida iha situasaun ruma, hatudu deʼit laran-diʼak ho ita-nia liafuan ka hahalok. Iha parágrafu primeiru temi kona-ba mane joven ida. Maski katuas misionáriu seidauk bele koʼalia moos iha lia-japonés, maibé ninia laran-diʼak kona duni joven neʼe nia laran. Ho ida-neʼe ita bele komprende tanbasá Maromak hakarak sira neʼebé adora nia atu “hadomi laran-diʼak”.—Miquéias (Mikha) 6:8.

Sin, hatudu laran-diʼak lori duni rezultadu diʼak. Kuandu ita hatudu laran-diʼak ho razaun neʼebé loos, no liuliu kuandu halo ida-neʼe tanba ita hadomi Maromak, neʼe sei halo Ita no mós ema seluk sente diʼak. Maski ema seluk la hafolin ita-nia hahalok neʼe, maibé neʼe la saugati deʼit. Tanba hahalok neʼe importante iha Maromak nia haree. Bíblia hatete mai ita katak kuandu ita hatudu laran-diʼak ba ema seluk, neʼe hanesan ita “fó empresta ba Maromak Jeová”. (Provérbios [Amsal] 19:17) Entaun, diʼak atu buka oportunidade atu hatudu laran-diʼak ba ema seluk, loos ka lae?

The Oxford English Dictionary shows that the original meaning of “kindness” is “kinship; near relationship; natural affection arising from this.”