Hakbesik ba Maromak

Maromak neʼebé “rona orasaun”

1 CRÔNICAS (1 TAWARIKH) 4:9, 10

MAROMAK JEOVÁ rona no hatán duni ba ninia fiar-naʼin sira-nia orasaun ka lae? Kuandu ita lee istória husi Bíblia kona-ba mane ida neʼebé ita barak seidauk hatene, naran Jabez, ida-neʼe sei hametin ita-nia fiar katak Maromak Jeová mak loloos Maromak neʼebé “rona orasaun”. (Salmo [Mazmur] 65:2) Istória badak neʼe konta iha livru 1 Crônicas, iha lista kona-ba ema Israel nia jerasaun sira. Mai ita haree 1 Crônicas (1 Tawarikh) 4:9, 10.

Bíblia hatete kona-ba Jabez iha versíkulu rua neʼe deʼit. Tuir versíkulu 9, nia inan “hanaran nia Jabez, hodi hatete: ‘Haʼu hahoris nia ho sente moras.’” * Tanbasá mak nia fó naran hanesan neʼe? Kuandu nia tuur ahi, karik nia sente moras tebetebes. Ka, karik nia laʼen mate tiha ona iha tempu neʼebá, no nia laran moras tebes tanba nia mesak simu sira-nia bebé neʼebé foin moris. Bíblia la hatete buat ida kona-ba neʼe. Maibé iha tempu neʼebá inan neʼe seidauk hatene katak ninia oan neʼe sei sai ema diʼak ida neʼebé halo nia kontente. Karik nia maun-alin sira mós ema diʼak, maibé Jabez nia hahalok diʼak ruma halo nia “ema naran-boot liu duké nia maun-alin sira”.

Jabez iha toman atu halo orasaun ho laran. Nia komesa ninia orasaun hodi husu Maromak nia bensaun. Nia husu kona-ba buat tolu, no ida-neʼe hatudu katak nia ema neʼebé fiar metin ba Maromak.

Primeiru, Jabez husu ba Maromak: “Haluan haʼu-nia rai.” (Versíkulu 10) Jabez mak ema naran-boot neʼebé ema barak respeitu, nia laʼós ema kaan-teen neʼebé hakarak hadau ema seluk nia rai. Karik nia husu nuneʼe tanba nia hanoin, laʼós kona-ba rai, maibé kona-ba ema. Karik nia hakarak atu haluan ninia rai hodi nia bele ajuda ema barak neʼebé hela iha rai neʼe atu hatene no adora Maromak neʼebé loos. *

Segundu, Jabez husu Maromak nia “liman” atu hamutuk ho nia. Maromak nia liman reprezenta Maromak nia forsa neʼebé nia uza atu ajuda ninia atan sira. (1 Crônicas [1 Tawarikh] 29:12) Atu ninia hakarak sai loos, Jabez sadere ba Maromak neʼebé prontu atu lolo nia liman ba ema neʼebé tau fiar iha nia.—Isaías (Yesaya) 59:1.

Terseiru, Jabez husu: “Proteje haʼu husi dezastre, atu ida-neʼe labele hakanek haʼu.” Liafuan “atu ida-neʼe labele hakanek haʼu” karik hatudu katak Jabez husu Maromak laʼós atu dezastre labele kona nia, maibé atu ajuda nia labele sai triste demais ka labele husik buat aat neʼe halakon ninia fiar.

Jabez nia orasaun hatudu katak nia hanoin tebes kona-ba adorasaun neʼebé loos no hatudu mós katak nia tau fiar metin ba Maromak neʼebé rona orasaun. Oinsá mak Maromak Jeová hatán ba ninia orasaun neʼe? Istória badak kona-ba Jabez ramata ho liafuan tuirmai neʼe: “Maromak halo buat neʼebé nia husu.”

Maromak neʼebé rona orasaun, ninia hahalok la troka toʼo ohin loron. Nia sente kontente atu rona ninia atan sira-nia orasaun. Tan neʼe, sira neʼebé tau fiar tomak ba Maromak bele hatete: “Ita laran-metin iha Maromak futar oin, katak wainhira ita husu buat ruma tuir nia hakarak, nia rona ita.”—1 Joao 5:14.

[Nota–rodapé]