Skip to content

Skip to table of contents

Hatene Maromak nia naran envolve hatene mós saida?

Hatene Maromak nia naran envolve hatene mós saida?

 Hatene Maromak nia naran envolve hatene mós saida?

ITA-NIA naran iha arti ruma ka lae? Iha rai balu, kuandu ema fó naran ba sira-nia oan, sira iha kostume atu fó naran neʼebé iha arti. Naran neʼebé inan-aman hili atu fó ba sira-nia oan karik hatudu kona-ba sira-nia fiar ka hakarak ba sira-nia oan nia futuru.

Kostume atu fó naran neʼebé iha arti laʼós buat neʼebé foun. Iha Bíblia nia tempu mós, baibain inan-aman ka ema seluk hili naran ba sira-nia oan neʼebé iha arti. Dala ruma naran hatudu hahalok ka knaar neʼebé nia atu halo iha ninia moris. Porezemplu, kuandu Maromak Jeová hatete ba David kona-ba ninia oan Salomão nia knaar iha futuru, Nia hatete: “Ema sei bolu nia Salomão [neʼebé mai husi liafuan neʼebé iha arti “Dame”], no iha ninia loron sira haʼu sei fó dame no hakmatek ba Izraél.”—1 Crônicas 22:9.

Dala ruma Maromak Jeová fó naran foun ba ema neʼebé atu hetan knaar foun. Porezemplu, Maromak fó naran foun ba Abraão nia feen, naran neʼe mak Sara, katak “Liurai-Oan Feto”. Tanbasá? Maromak Jeová esplika hodi dehan: “Haʼu sei fó bensaun ba nia no mós fó ba ó oan-mane husi nia; no haʼu sei fó bensaun ba nia no nia sei sai nasaun barak; povu sira-nia liurai sei mai husi nia.” (Gênesis 17:16) Nuneʼe, atu komprende tansá Sara hetan naran foun presiza komprende mós kona-ba ninia knaar foun.

Oinsá ho naran neʼebé importante liu naran seluk hotu, Jeová? Ita hatene naran neʼe nia arti ka lae? Kuandu Moisés husu Maromak kona-ba Ninia naran, Maromak Jeová hatán: “Haʼu sei sai saida deʼit neʼebé haʼu hakarak.” (Êxodo 3:14) Maromak Jeová nia naran hatudu katak nia iha knaar oioin. Porezemplu, inan ida karik presiza halaʼo knaar barak iha loron ida nia laran atu tau matan ba ninia oan sira tuir situasaun neʼebé mosu. Se ninia oan kanek, nia sai hanesan enfermeira; kuandu hanorin ninia oan, nia sai hanesan mestra. Nuneʼe mós ho Maromak Jeová, maibé iha dalan boot liután. Atu Maromak bele halo ninia hakarak ba ema hotu, nia bele halaʼo knaar saida deʼit neʼebé presiza hodi sai saida deʼit neʼebé nia hakarak. Tan neʼe, atu hatene didiʼak Maromak Jeová, ita presiza komprende no hafolin knaar oioin neʼebé nia halaʼo.

Triste tanba ema neʼebé la hatene didiʼak Maromak, sira la hatene kona-ba ninia hahalok furak sira. Maibé, hodi estuda Bíblia, ita bele hafolin Maromak Jeová nia knaar oioin, hanesan Ida neʼebé fó konsellu ho matenek, Ida neʼebé iha kbiit atu fó salvasaun, no Ida neʼebé fó ho laran-luak buat neʼebé ninia kriatura sira presiza. Hatene kona-ba Maromak Jeová nia naran nia arti, ida-neʼe halo ita sente katak ninia hahalok sira furak tebes.

Maski nuneʼe, dala ruma susar atu hatene didiʼak Maromak. Informasaun tuirmai sei esplika tansá.