Skip to content

Skip to table of contents

Laran-manas nafatin iha serbisu haklaken

Laran-manas nafatin iha serbisu haklaken

SERBISU haklaken mak serbisu importante liu neʼebé halaʼo iha mundu ohin loron. Ita hatene katak lori Jeová nia naran hodi hanorin ema seluk mak buat espesiál duni. Maibé dala ruma susar uitoan atu sente laran-manas nafatin iha serbisu neʼe. Tanbasá mak hanesan neʼe?

Saida mak bele ajuda Ita laran-manas nafatin iha serbisu haklaken?

Haklaken-naʼin balu dehan katak susar atu koʼalia ho ema tanba la hetan sira iha uma. No se hetan ema karik, dala ruma sira la interese ba ita-nia mensajen, no balu tan siʼak ita. Iha rai balu, área haklaken boot tebes no ema barak gosta rona kona-ba lia-loos. Neʼe halo haklaken-naʼin balu hanoin barak tanba sira la bele haklaken ba ema hotu iha sira-nia área. Ema balu tan haklaken ba tinan barak ona maibé sente laran-tun tanba Armajedón seidauk mai.

Ita moris iha mundu neʼebé “aat-naʼin” Satanás mak domina. Tan neʼe ita la hakfodak bainhira ita hasoru susar neʼebé bele hamenus ita-nia laran-manas ba haklaken.—1 João 5:19.

Susar naran deʼit neʼebé ita hasoru bainhira ita haklaken, Jeová sei ajuda ita atu tahan. Maibé saida mak bele halo ita laran-manas nafatin iha serbisu haklaken? Mai ita koʼalia kona-ba sujestaun balu.

AJUDA HAKLAKEN-NAʼIN FOUN

Tinan-tinan, ema rihun ba rihun hetan batizmu nuʼudar Testemuña ba Jeová. Se Ita mak foin hetan batizmu, Ita bele aprende buat barak husi irmaun-irmán sira neʼebé iha ona esperiénsia kona-ba haklaken, loos ka lae? No se Ita mak ema neʼebé kleur iha lia-loos, Ita sei kontente tebes hodi uza oportunidade furak neʼebé Ita iha atu fó treinu ba sira neʼebé foun.

Jesus hatene katak ninia dixípulu sira presiza hetan treinu oinsá atu haklaken, tan neʼe Jesus hanorin sira. (Lucas 8:1) Ohin loron, irmaun-irmán foun sira mós presiza ema seluk atu hanorin sira hodi sai haklaken-naʼin neʼebé diʼak.

 Ita la bele hanoin katak, tanba ema sai haklaken-naʼin ona, entaun nia hatene ona oinsá atu hanorin ema. Nia presiza irmaun ka irmán ida hatudu laran-diʼak hodi treinu nia ho domin. Ita presiza hanorin haklaken-naʼin foun neʼe kona-ba (1) oinsá atu prepara liafuan atu koʼalia ba uma-naʼin no pratika ho sira, (2) dada lia ho ema, (3) fahe livru sira, (4) vizita fali ema neʼebé hatudu interese, no (5) estuda Bíblia ho ema. Se haklaken-naʼin foun haree oinsá ema seluk neʼebé iha esperiénsia ona haklaken, no banati-tuir sira-nia ezemplu, nia mós bele sai haklaken-naʼin diʼak. (Lucas 6:40) Se haklaken-naʼin foun hatene katak iha ema neʼebé sempre prontu atu ajuda nia, nia mós sei la sente taʼuk atu bá haklaken. Ita mós bele gaba no fó sujestaun ba nia.—Eclesiastes (Pengkhotbah) 4:9, 10.

KOʼALIA HO ITA-NIA PÁR BAINHIRA BÁ HAKLAKEN

Bainhira ita bá haklaken, ita hakarak fahe hanoin ho uma-naʼin sira, maibé dala barak liu ita fahe hanoin ho ita-nia pár haklaken. Neʼe halo ita hanoin fali tanbasá mak Jesus haruka ninia dixípulu sira haklaken “rua-rua”. (Lucas 10:1) Tanba hodi nuneʼe, sira bele koʼalia ba malu no anima malu. Ita mós bele aproveita oportunidade neʼebé ita iha bainhira ita bá haklaken ho ita nia irmaun-irmán sira hodi “fó laran-manas ba malu”.—Roma 1:12.

Entaun, Ita bele koʼalia kona-ba saida nuʼudar Ita haklaken hamutuk ho Ita-nia pár? Ita foin hetan esperiénsia diʼak iha serbisu haklaken neʼebé Ita bele konta ka lae? Ka Ita aprende buat furak ruma iha adorasaun família nian? Karik Ita rona buat ruma husi reuniaun neʼebé kona Ita-nia laran, Ita bele fahe ida-neʼe ka lae? Se Ita haklaken hamutuk ho irmaun ka irmán neʼebé Ita ladún koñese didiʼak, Ita bele husu nia pergunta ruma hanesan: “Oinsá Ita hetan lia-loos? Saida mak halo Ita fiar metin katak Testemuña ba Jeová mak relijiaun neʼebé loos? Ita hetan esperiénsia diʼak ruma ka lae?” Husu tiha Ita-nia pár, Ita mós bele fahe Ita-nia esperiénsia sira. Hanesan neʼe, maski Ita hetan ema diʼak iha serbisu haklaken ka lae, Ita nafatin bele “hametin malu”.—1 Tesalónika 5:11.

 HAKAʼAS AN HALAʼO ESTUDA MESAK

Hodi ita bele sente laran-manas nafatin iha serbisu haklaken, ita presiza estuda kleʼan uitoan bainhira ita estuda Bíblia mesak. Liuhusi “atan laran-metin no matenek”, ita hetan informasaun barak tebes neʼebé ita bele uza hodi estuda. (Mateus 24:45) Hanoin toʼok kona-ba tópiku ida neʼebé diʼak atu estuda, neʼe mak: “Tanbasá mak serbisu haklaken importante tebes?” Iha kaixa iha pájina 16, ita bele hetan razaun balu.

Se Ita hanoin didiʼak kona-ba razaun sira iha kaixa neʼe, neʼe bele book Ita-nia laran atu kontinua haklaken nafatin ho laran-manas. Koko toʼok hanoin kona-ba razaun saida tan mak ita haklaken ho laran-manas, depois medita, ka hanoin didiʼak kona-ba razaun sira-neʼe. Tanba se Ita halo nuneʼe, Ita sei aumenta Ita-nia laran-manas ba serbisu haklaken.

KOKO DALAN FOUN ATU HAKLAKEN

Ita sempre hetan sujestaun sira husi Jeová nia organizasaun oinsá atu hetan rezultadu diʼak liután iha serbisu haklaken. Porezemplu, maski dalan importante liu neʼebé ita hasoru ema mak liuhusi haklaken uma ba uma, maibé ita mós bele koko haklaken liuhusi surat ka telefone, haklaken iha dalan ka fatin públiku seluk, haklaken la formál, no haklaken ba loja sira. Karik ita mós bele halo planu atu haklaken iha área neʼebé Testemuña ba Jeová seidauk haklaken.

Ita prontu atu koko dalan foun hanesan neʼe ka lae? Ema barak neʼebé koko ona dalan foun sira-neʼe hetan esperiénsia kapás. Haree toʼok ezemplu tolu tuirmai neʼe.

Irmán ida naran April koko halo tuir sujestaun ida husi Ita-nia Serbisu Kristaun kona-ba oinsá atu komesa estuda Bíblia ho ema. Nia husu ema naʼin-tolu iha ninia serbisu-fatin atu estuda Bíblia ho nia. April hakfodak no kontente tebes  bainhira sira hotu simu atu estuda Bíblia no mós komesa tuir reuniaun sira.

Iha Ita-nia Serbisu Kristaun ita mós hetan sujestaun atu hili informasaun ruma iha ita-nia revista sira hodi fó ba ema neʼebé ita hanoin sei gosta lee informasaun neʼe. Revista ida neʼebé iha informasaun kona-ba roda sira, katuas área ida iha Estadus Unidus deside atu fó ba manager hotu iha loja roda sira iha área ida. Nia ho ninia feen mós fó revista ba doutór sira hamutuk 100 tanba revista neʼe iha informasaun ho títulu “Komprende doutór sira”. Irmaun neʼe hatete katak, tanba sira halo vizita sira hanesan neʼe, ema bele hatene serbisu neʼebé ita halo no revista sira neʼebé ita fahe. No tanba irmaun neʼe no ninia feen komesa koñese didiʼak ema iha sira-nia haklaken fatin, neʼe loke dalan ba sira atu halo vizita fali ba ema.

Irmán ida naran Judy hakerek surat ba ita-nia sede jerál hodi hatoʼo ninia agradese tanba sujestaun sira neʼebé ita hetan atu koko haklaken liuhusi telefone. Nia hatete katak ninia inan ho idade 86, neʼebé iha problema barak ho saúde, haklaken beibeik liuhusi telefone. Ikusmai nia konsege estuda ho ferik ida ho idade 92.

Husi esperiénsia sira-neʼe, ita haree katak sujestaun sira neʼebé ita simu husi ita-nia livru sira bele lori rezultadu diʼak tebes. Se Ita mós koko sujestaun sira-neʼe ita bele kontente no laran-manas nafatin iha serbisu haklaken.

HALO PLANU SIRA

Ita-nia susesu iha serbisu haklaken la depende ba livru hira mak ita fahe, ka ema naʼin-hira mak ita fó estuda, ka naʼin-hira mak hetan batizmu. Hanoin toʼok kona-ba Noé. Ema naʼin-hira mak nia ajuda atu serbí Jeová? Ninia família deʼit mak tama iha ró laran, loos ka lae? Maibé neʼe la dehan katak nia la hetan susesu nuʼudar haklaken-naʼin ida. Hanesan mós ho ita, importante mak ita serbí Jeová ho laran tomak.—1 Korinto 4:2.

Atubele sente laran-manas nafatin iha serbisu haklaken, irmaun-irmán barak gosta halo planu ruma neʼebé sira bele kumpre. Planu hanesan saida mak diʼak? Kaixa iha pájina neʼe temi kona-ba planu balu neʼebé ita bele halo.

Husu Jeová nia ajuda hodi ita bele iha solok no susesu iha serbisu haklaken. Bainhira Ita kumpre Ita-nia planu, Ita sei sente kontente tanba Ita halo buat barak atu haklaken liafuan diʼak.

Loos, dala ruma susar atu haklaken liafuan diʼak. Maibé la haluha buat sira neʼebé ita foin koʼalia hodi ajuda ita laran-manas nafatin. Koʼalia hamutuk ho Ita-nia pár hodi anima malu. Halaʼo beibeik estuda Bíblia mesak. Koko sujestaun oioin husi atan laran-metin no matenek. No halo planu sira neʼebé ita bele kumpre. Liután neʼe, hanoin kona-ba knaar furak neʼebé Maromak Jeová fó ba Ita atu haklaken liafuan diʼak nuʼudar ninia Testemuña ida. (Isaías [Yesaya] 43:10) Hodi haklaken ho laran-manas, Ita sei haksolok tebes iha Jeová nia serbisu!