Skip to content

Skip to table of contents

Maromak nia naran neʼebé hakerek ho letra ebraiku antigu mosu dala barak iha manuskritu Bíblia

 BÍBLIA NIA HANORIN

Maromak nia naran

Maromak nia naran

Ema millaun ba millaun bolu Maromak ho títulu sira hanesan Allah, Naʼi ka Maromak. Maibé, tuir loloos, Maromak iha naran rasik. Ita presiza uza naran neʼe ka lae?

Maromak nia naran mak saida?

EMA BALU HATETE

 

Ema kristaun barak fiar katak Maromak nia naran mak Jesus. Ema seluk hatete katak tanba iha Maromak ida deʼit, entaun ita la presiza uza ninia naran rasik. Ema seluk tan hatete, se ita uza Maromak nia naran, ita la hatudu respeitu ba nia.

SAIDA MAK BÍBLIA HANORIN?

 

Maromak neʼebé Kbiit Boot Liu Hotu nia naran laʼós Jesus, tanba Jesus laʼós Maromak neʼebé Kbiit Boot Liu Hotu. Tuir loloos, Jesus hanorin ninia dixípulu sira atu halo orasaun ba Maromak, hodi dehan: “Aman, halo Ita-nia naran sai santu.” (Lucas 11:2) Jesus rasik mós halo orasaun ba Maromak, hodi dehan: “Aman, fó glória ba Ita-nia naran.”—João 12:28.

Iha Bíblia, Maromak hatete: “Haʼu mak Jeová. Neʼe mak haʼu-nia naran; Haʼu la fó haʼu-nia glória ba buat seluk.” (Isaías [Yesaya] 42:8) “Jeová” mak Maromak nia naran iha lia-tetun neʼebé tradús husi letra haat YHWH iha lia-ebraiku. Naran neʼe mosu maizumenus dala 7.000 iha Eskritura Lia-Ebraiku ka Testamentu Tuan. * Naran neʼe mosu dala barak liu fali títulu sira hanesan “Maromak”, ka “Naʼi”, no barak liu fali naran sira seluk hanesan Abraão, Moisés ka David.

Iha Bíblia laran, Jeová la bandu ita atu uza ninia naran iha dalan neʼebé hatudu respeitu. Bíblia hatudu katak Maromak nia atan sira sempre uza Maromak nia naran. Porezemplu, Maromak nia atan barak iha naran neʼebé iha ligasaun ho Maromak nia naran, hanesan Elias, neʼebé iha arti “Jeová mak haʼu-nia Maromak” no Zacarias neʼebé iha arti “Jeová hanoin-hetan ona”. Sira mós uza Maromak nia naran iha sira-nia moris loroloron.—Rute 2:4.

Maromak hakarak ita atu uza ninia naran. Bíblia anima ita atu “fó-agradese ba Jeová, bolu ninia naran bá”. (Salmo [Mazmur] 105:1) Maromak mós sente kontente bainhira ema “hanoin kleʼan kona-ba ninia naran”.—Malaquias (Maleakhi) 3:16.

“Halo ema hotu hatene katak Ita, neʼebé naran Jeová, Ita mesak deʼit mak Maromak neʼebé Aas Liu Hotu iha mundu tomak.”Salmo (Mazmur) 83:18.

 Maromak nia naran katak sá?

Matenek-naʼin balu fiar katak Maromak nia naran iha lia-ebraiku iha arti “Nia mak Halo”. Neʼe katak Maromak bele sai buat naran deʼit no nia mós bele halo Ninia kriatura sira sai buat naran deʼit atu kumpre ninia hakarak. Só ita-nia Kriadór deʼit mak bele halo ida-neʼe.

NEʼE AJUDA ITA OINSÁ?

 

Hodi hatene Maromak nia naran, neʼe sei ajuda Ita atu iha hanoin neʼebé loos kona-ba nia no mós hakbesik ba nia. Tuir loloos, susar ba Ita atubele hakbesik ba ema ida se Ita la hatene ninia naran. Hodi fó sai ninia naran iha Bíblia, neʼe hatudu katak Maromak hakarak Ita atu hakbesik ba nia.—Tiago 4:8.

Ita bele fiar metin katak Maromak sei sai buat naran deʼit atu kumpre ninia promesa sira. Tan neʼe mak Bíblia hatete: “Sira neʼebé hatene Ita-nia naran sei tau fiar ba Ita.” (Salmo [Mazmur] 9:10) Hodi buka-hatene liután kona-ba Jeová nia naran, neʼe sei hametin ita-nia fiar tanba ita sei aprende katak ninia hahalok sira, hanesan domin neʼebé laran-metin, laran-sadiʼa, laran-diʼak no justisa mak book nia atu halo buat hotu. (Êxodo [Keluaran] 34:5-7) Ita sente kmaan hodi hatene katak Jeová sempre kumpre ninia promesa sira, no nia sei nunka halo buat neʼebé kontra malu ho ninia hahalok.

Klaru katak, hodi hatene Maromak neʼebé Kbiit Boot Liu Hotu nia naran mak priviléjiu ida. Neʼe loke dalan ba ita atu simu bensaun barak agora no iha futuru. Maromak promete: “Haʼu sei proteje nia tanba nia hatene haʼu-nia naran.”—Salmo (Mazmur) 91:14.

“Ema hotu neʼebé bolu Jeová nia naran sei hetan salvasaun.”Joel 2:32.

Maromak nia naran hakerek iha língua oioin

^ par. 9 Tradusaun Bíblia barak hasai tiha Maromak nia naran no troka fali ho títulu hanesan “NAʼI”. No iha tradusaun Bíblia seluk, Maromak nia naran mosu iha versíkulu balu deʼit ka iha nota-rodapé sira. Maibé Bíblia Sagrada Tradusaun Mundu Foun uza fali Maromak nia naran.