Skip to content

Skip to table of contents

 BÍBLIA NIA HANORIN | AGRADESE

Agradese

Agradese

Hatudu agradese lori benefísiu barak ba ita-nia moris iha dalan fíziku, mentál no emosaun. Tan neʼe, ema hotu tenke hatudu agradese iha sira-nia moris loroloron.

Oinsá mak hahalok agradese bele kona ita-nia moris?

SAIDA MAK DOUTÓR DEHAN?

Tuir artigu ida husi Harvard Mental Health Letter, “hodi hatudu agradese bele halo ita-nia moris sai kontente. Hahalok agradese ajuda ema atu haburas emosaun pozitivu, sente kontente, iha saúde diʼak, tahan susar no haburas relasaun neʼebé metin.”

SAIDA MAK BÍBLIA HANORIN?

Bíblia fó laran-manas ba ita atu haburas hahalok agradese. Apóstolu Paulo neʼebé hakerek liafuan: “Hatudu bá katak imi agradese”, nia rasik mós hatudu ezemplu neʼebé diʼak kona-ba neʼe. Porezemplu, nia ‘fó-agradese nafatin ba Maromak’ tanba ema barak simu liafuan diʼak neʼebé nia fahe. (Koloso 3:15; 1 Tesalónika 2:13) Kontente neʼebé loos mai husi toman atu hatudu agradese liuhusi ita-nia hahalok laʼós deʼit husi liafuan. Hodi haburas toman neʼe sei ajuda ita atu sees husi hahalok aat hanesan foti-an, laran-moras, no rai odi. Hahalok aat sira-neʼe bele hadook ita husi ema seluk no halo ita-nia moris la kontente.

Ita-nia Kriadór mós hatudu ezemplu diʼak kona-ba hatudu agradese. Maski ita ema deʼit, maibé nia nafatin hatudu agradese ba ita. Ebreu 6:10 dehan: “Maromak nunka hatudu hahalok aat hodi haluha imi-nia serbisu no imi-nia domin neʼebé imi hatudu ba ninia naran.” Loos duni, ba ita-nia Kriadór, atu la hatudu agradese mak hanesan deʼit ho hahalok aat ka la justu.

“Haksolok nafatin bá. Fó-agradese kona-ba buat hotu.”1 Tesalónika 5:16, 18.

 Oinsá mak hatudu agradese hametin ita-nia relasaun ho ema seluk?

SAIDA MAK ESPERIÉNSIA HATUDU?

Hodi hatudu agradese husi laran ba prezente no ajuda neʼebé ita simu, bele halo ema neʼe sente katak ita hafolin duni nia. Ema neʼebé ita la koñese mós sei sente kontente bainhira ita hatudu agradese ba buat neʼebé sira halo, maski neʼe mak buat kiʼik deʼit.

SAIDA MAK BÍBLIA HANORIN?

Jesus dehan: “Fó ba ema seluk, no sira mós sei fó ba imi. Ho laran-diʼak sira sei fakar iha imi-nia bolsu, doko tan, hanehan tun, no sai nakonu liu.” (Lucas 6:38) Hanoin toʼok kona-ba esperiénsia ida husi labarik-feto neʼebé tilun-diuk naran Rose neʼebé hela iha rai-Vanuatu, iha tasi Pasífiku Súl.

Maski Rose asiste Testemuña ba Jeová nia reuniaun sira, maibé nia ladún hetan benefísiu tanba nia no Testemuña sira iha neʼebá seidauk aprende kona-ba língua liman nian. Iha tempu neʼebá, iha kaben-naʼin ida neʼebé hatene língua liman nian bá vizita kongregasaun neʼe. Kaben-naʼin neʼe deside atu hanorin língua liman nian bainhira sira hatene kona-ba buat neʼebé akontese daudaun. Rose sente agradese tebes hodi dehan: “Haʼu kontente atu iha kolega barak neʼebé hadomi haʼu.” Kaben-naʼin neʼe sente kontente tanba Rose hafolin sira-nia ajuda no mós hola parte iha reuniaun sira. Rose agradese liután tanba ema barak hakaʼas an atu aprende língua liman nian hodi bele koʼalia ho nia.—Apóstolu 20:35.

“Ema neʼebé hasaʼe agradese nuʼudar ninia sakrifísiu fó glória ba [Maromak].”Salmo (Mazmur) 50:23.

Oinsá ita bele haburas hahalok agradese?

SAIDA MAK BÍBLIA HANORIN?

Ita-nia hanoin bele book ita-nia sentimentu. Liurai David halo orasaun ba Maromak hodi dehan: “Haʼu hanoin kleʼan kona-ba Ita-nia hahalok hotu; haʼu hanoin didiʼak kona-ba serbisu neʼebé Ita halo ho Ita-nia liman.” (Salmo [Mazmur] 143:5) Loos duni, David mak ema neʼebé tau fokus ba buat neʼebé importante. Durante ninia moris tomak, nia iha toman atu hanoin didiʼak kona-ba Maromak nia hahalok furak, neʼe book nia atu hatudu agradese.—Salmo (Mazmur) 71:5, 17.

Bíblia fó konsellu neʼebé kapás hodi dehan: ‘Buat naran deʼit neʼebé loos, haburas domin, merese respeitu, santu no merese hahiʼi, kontinua hanoin kona-ba buat sira-neʼe.’ (Filipe 4:8) Liafuan “kontinua hanoin” hatudu katak ita presiza iha toman atu hanoin kleʼan hodi bele haburas hahalok agradese.

“Haʼu-nia laran sei hanoin kleʼan hodi hatudu kbiit atu komprende.”Salmo (Mazmur) 49:3.